Taaba la'asʋg maan
3
1 Sɔ' ya'a bɔɔd ye o maal Taaba La'asʋg maannɛ tis Zugsɔb la ka li anɛ na'araug bɛɛ na'anya'aŋ, li pʋ sʋm ka bʋnkɔnbʋg la mɔr dɛŋŋa. 2 O nɔkimi o nu'ugʋ pa'al naaf la zugin ka kɔdig o Fuug Sʋgʋr la za'anɔɔrin, ka Aaron biribis banɛ an maanmaannib la na nɔk ziim la misi mis maan daka la gilig wʋsa. 3 Taaba la'asʋg maan la ni, li sʋm ye o yis kpaam linɛ bɛ pʋʋgin la'ad la nii nyu'oe tis Zugsɔb la. 4 O yisim siyaanini la nɛ kpaam linɛ bɛɛ li ni la wʋsa, ka nwaae sɔɔnr la bi'ela, 5 ka Aaron biribis la na nyu'oe li maan daka la zug. Li anɛ maan kanɛ nyu'od ka li nyuug la malisi tis Zugsɔb la.6 O ya'a ye o maal Taaba La'asʋg Maannɛ tis Zugsɔb la, ka li anɛ pɛ'og bɛɛ bʋʋg, li ya'a anɛ pɛraug bɛɛ bʋraug, li pʋ sʋm ka li mɔr dɛŋŋa. 7 O ya'a mɔr pɛ'og na ye o maal maan, on nɔkim tis Zugsɔb la, 8 ka nɔk o nu'ugʋ pa'ali li zugin ka kɔdigi li Fuug Sʋgʋr za'anɔɔrin la ka Aaron biribis la nɔk ziim la misi mis maan daka la lʋga wʋsa gilig. 9 O na yis kpaam nɛ zʋgan'ar la nɛ kpakanɛ ligil kɔnbʋg la pʋʋgin la'ad la wʋsa nyu'oe tis Zugsɔb la. 10 O na yis siyaanini la nɛ kpaam linɛ bɛɛ anina la wʋsa, ka nwaae sɔɔnr la bi'ela, 11 ka maanmaan la na nyu'oe li maan daka la zug ka li an nyu'or maannɛ tis Zugsɔb la.
12 O ya'a mɔr bʋʋg na ye o maal maan, on nɔkimi li tis Zugsɔb la, 13 ka nɔk o nu'ugʋ pa'ali li zugin ka kɔdigi li Fuug Sʋgʋr la za'anɔɔrin, ka Aaron biribis la na nɔk ziim la misi mis maan daka la lʋga wʋsa gilig. 14 O maan la pʋʋgin, o yisim la'abama wʋsa nyu'oe tis Zugsɔb la: Kpaam linɛ bɛ pʋʋgin la wʋsa 15 nɛ siyaanini la nɛ kpaam linɛ bɛɛ li ni la wʋsa, ka nwaae sɔɔnr la bi'ela paas 16 ka maanmaan la na nyu'oe li maan daka la zug. Li anɛ maan kanɛ nyu'od ka li nyuug la malisi tis Zugsɔb la. Kpaam la wʋsa anɛ Zugsɔb din. 17 Mid ka ya ɔnb kpaam la bɛɛ ziim la. Li anɛ zi'elʋgʋ tis yanam nɛ ya yaas wʋsa zin'ikanɛ wʋsa ka ya na bɛ.