Zʋʋd maan la yɛla
2
1 Sɔ' mɛ ya'a mɔr ki na ye o tis Zugsɔb ka li an zʋʋd maan, li sʋm ye ba nɛɛmi li ka li an zɔmbaanlig, ka o niŋ kpaam ka paas tudaar, 2 ka nɔki tis Aaron biribis banɛ an maanmaannib la, ka ba na gbin'e zɔm la nu'ukukudug la'am nɛ kpaam la nɛ tudaar la wʋsa nyu'oe daka la zug, ka li an tiɛnr maan, ka an maan kanɛ malisi tis Zugsɔb la. 3 Ka linɛ kpɛlim la na an Aaron nɛ o biribis la bʋn, bɔzugɔ li anɛ maan kanɛ ka ba maal ka li an kasi hali tis Zugsɔb. 4 Sɔ' mɛ ya'a mɔr zʋʋd maan linɛ ka ba maal wʋʋ bodobodo nɛ, asɛɛ ka o nɔk zɔmbaanlig linɛ pʋ gɛndig danbinni maal. Nɔkim gɛndig kpaam sɛn'; bɛɛ sɛn' li naae ka yʋ'ʋn niŋ kpaam.5 Li ya'a anɛ zʋʋd maan linɛ ka ba maali li wʋʋ pɛmpɛm nɛ, li sʋm ye li an zɔmbaanlig ka gɛndig kpaam amaa ka danbin kae. 6 Ka gbin'esi li zɔra-zɔra ka niŋ kpaam bɔzugɔ li anɛ zʋʋd maan. 7 Ka maan la ya'a anɛ bodobodo ka ba maal bodobodo laasin, li sʋm ye li an zɔmbaanlig ka gɛndig kpaam. 8 Mɔri zʋʋd maan la wʋsa na tis Zugsɔb la, ka nɔki tis maanmaannib la ka ba mɔri keŋ nyu'or malʋŋ daka la ni. 9 Ba na yis tiɛnr maan la zʋʋd maan la ni nyu'oe daka la zug, ka li nyuug la malisi tis Zugsɔb la. 10 Ka linɛ kpɛlim la na an Aaron nɛ o biribis la bʋn. Li anɛ maan kanɛ an kasi ka ba nyu'oe li tis Zugsɔb la. 11 Mid ka ya gɛndig danbin zʋʋd maan kanɛ wʋsa ka ya ye ya maali tis Zugsɔb la; li pʋ sʋm ye ya nyu'oe maan la ka danbin bɛɛ siind bɛɛ anina.
12 Ya tun'e mɔr danbin nɛ siindi kena tis Zugsɔb ka li pa'al ye ya yiiga bunib maana la, amaa maan ban pʋ maannɛ nyu'od daka la zug wʋʋ linɛ tisid nyuug linɛ malis la.
13 Zʋʋd maan kanɛ wʋsa ka ya ye ya maal, yanam on pɛ'ɛsim yaarim; mid ka ya tam yaarim niŋir ka li anɛ Wina'am nɛ yanam nɔnaar malʋŋ, pɛ'ɛsimi yaarim zʋʋd maan wʋsa ni. 14 Ya ya'a mɔr ki dɛɛnna na ye ya maal zʋʋd maannɛ tis Zugsɔb la, asɛɛ ka ya kiimi li arig kayaama. 15 Pɛ'ɛsimi kpaam nɛ tudaar ka li anɛ zʋʋd maan. 16 Maanmaan la na gbin'e zɔm kayaama nɛ kpaam la bi'ela la'am nɛ tudaar la wʋsa nɔki nyu'oe, ka li na an nyu'or maannɛ tis Zugsɔb la.