Levi dim
1
1 Moses da bɛnɛ yiŋ, ka Zugsɔb naam Fuug Sʋgʋr kanɛ ka ba la'asid anina la buol o ka yɛl o ye, 2 “Yɛlim Israel dim la ye ya sɔ' ya'a ye o mɔr maan na tis man Zugsɔb ka li anɛ kɔnbʋg bɛɛ naaf, on yisim o bʋnkɔnbidin la yinne. 3 Maan la ya'a anɛ nyu'or maan ka o yis naaf o bakʋn ye o maal, on yisim na'arakanɛ ka' dɛŋi mɔri kɛn Fuug Sʋgʋr kanɛ ka ba la'asid la za'anɔɔrin na ka Zugsɔb na di'e li la. 4 O na nɔk o nu'ugʋ pa'al bʋnkɔnbʋg la zugin ka Zugsɔb la di'e li ka li an suguru sɔsʋg maannɛ tis o. 5 O yʋ'ʋn na kɔdig bʋnkɔnbʋg la Zugsɔb la san'an; ka Aaron yaas banɛ an maanmaannib la na mɔr ziim la na, misi mis maan daka linɛ bɛ dɔɔg la za'anɔɔrin la gilig. 6 O na si bʋnkɔnbʋg la bɛs baanlʋg-baanlʋg, 7 ka Aaron yaas banɛ an maanmaannib la na nyu'oe bugum la maan daka la zug ka paas daad bugum la ni, 8 ka maal na'araug ni'im la la'am nɛ zug la nɛ kpaam la wʋsa niŋ bugumin la, maan daka la zug. 9 Ba na nɔk ku'om pie li pʋʋgin la'ad la nɛ li nɔba la, ka maanmaan la na nyu'oe li wʋsa maan daka la zug. Li anɛ maan kanɛ nyu'od ka li nyuug la malisi tis Zugsɔb la.10 “Maan la ya'a anɛ bʋʋs bɛɛ pɛ'ɛs ka o ye o maal nyu'or maan, li sʋm ye o nɔk pɛraug bɛɛ bʋrakanɛ ka' dɛŋŋa. 11 O na kɔdig bʋnkɔnbʋg la maan daka la datiuŋ baba Zugsɔb la san'an, ka Aaron yaas banɛ an maanmaannib la na nɔk ziim la misi mis maan daka la gilig wʋsa. 12 Ba na bɛs bʋnkɔnbʋg la baanlʋg-baanlʋg ka maanmaan la na la'asi li zug nɛ kpaam la wʋsa pa'al bugum linɛ bɛ daka la zug la. 13 Ba na nɔk ku'om pie li pʋʋgin la'ad la nɛ li nɔba la, ka maanmaan la na mɔri li wʋsa kena nyu'oe daka la zug. Li anɛ maan kanɛ nyu'od ka li nyuug malisi tis Zugsɔb la.
14 “Maan la mɛ ya'a anɛ bʋn-ian'ada ka o ye o maal nyu'or maan, li sʋm ka li an sian'adawan bɛɛ na'adawan. 15 Maanmaan la na mɔri keŋ maan daka la ni ka nwɛligi fi'igi li zugʋ nyu'oe daka la zug, ka kpa'ae ziim la siɛn daka la kpikpɛŋ. 16 O na yis yɛog nɛ kɔnbid la bas daka la nya'aŋ, zin'ikanɛ mɔr tampɛligim la, 17 ka aaɛn biinr la vɛbil amaa ka lɛɛ kʋ yisi li nyainnɛ, ka maanmaan la na nyu'oe li daka la zug. Li anɛ maan kanɛ nyu'od ka li nyuug malisi tis Zugsɔb la.”