Maanmaannib la pin'ili ba tʋʋma
9
1 Ka daba anii daar ka Moses buol Aaron nɛ o biribis la nɛ Israel kpɛɛmnam, 2 ka yɛl Aaron ye, “Nɔkim na'araug ka li an tʋʋmbɛ'ɛd maan, ka mɛ nɔk pɛraug ka li an nyu'or maan. Bʋnkɔnbid la pʋ sʋm ye ba mɔr dɛŋŋa; ka fʋ na nɔki maali tis Zugsɔb la. 3 Yɛlim Israel dim la ka ba nɔk bʋʋg ka li an tʋʋmbɛ'ɛd maan ka nɔk yʋʋm na'abil nɛ yʋʋm pɛraug ka li an nyu'or maan. Bʋnkɔnbid nwa mɛ pʋ sʋm ye ba mɔr dɛŋŋa. 4 Yɛlimi ba ye ba nɔk na'araug nɛ pɛraug linɛ na an taaba la'asʋg maan ka nɔk zɔm gɛndig nɛ kpaam ka li an zʋʋd maannɛ maali tis Zugsɔb la, ka o na nie o mɛŋ zina tisi ya.” 5 Ka Israel dim la sid da mɔr la'abanɛ ka Moses yɛli ba la keŋ La'asʋg Fuug Sʋgʋr la tuon, ka nidib la wʋsa kena zi'en Zugsɔb tuon. 6 Ka Moses yɛli ba ye, “Anwana ka Zugsɔb yɛli ya ye ya tʋm, ka Zugsɔb girima nɛɛsim na nie tisi ya.” 7 Ka Moses yɛl Aaron ye, “Kem maan daka la nii maali fʋ tʋʋmbɛ'ɛd maan la, nɛ fʋ nyu'or maan ka maal suguru sɔsʋg maannɛ tisi fʋ mɛŋ nɛ nidib la wʋʋ Zugsɔb la zi'el si'em la.”8 Ka Aaron keŋ daka la ni n kɔdig na'abil la ka li an o mɛŋ tʋʋmbɛ'ɛd maan, 9 ka o biribis la mɔr ziim la na tis o ka o nɔk o nu'ubili tʋm tʋʋmbɛ'ɛd maan ziim la ni n niŋ iila banɛ bɛ daka la ni la, ka kpa'ae ziim la daka la gbinnin, 10 ka yis naaf la kpaam, nɛ siyaanini la, ka nwaae sɔɔnr la bi'ela, nyu'oe daka la zug, wʋʋ Zugsɔb la yɛl Moses si'em la; 11 ka mɔr gbauŋ la nɛ ni'im la yi teŋ la kpikpɛŋi nyu'oe bugum.
12 Ka o da kɔdig nyu'or maan kɔnbʋg la, ka o biribis mɔri li ziim na tis o ka o di'e mis daka la gilig wʋsa, 13 ka ba mɔr bʋnkɔnbʋg la ni'im la yinne-yinne nɛ li zug la na ka o nyu'oe daka la zug, 14 ka pie pʋʋgin la'ad la nɛ nɔba la nyu'oe daka la zugʋ pa'al nyu'or maan la zugin.
15 Ka Aaron yʋ'ʋn mɔr bʋkanɛ ka o ye o nɔki maal nidib la tʋʋmbɛ'ɛd maan la na kɔdigi li maal tʋʋmbɛ'ɛd maan la wʋʋ on maal yiiga bʋʋg la tis o mɛŋ si'em la, 16 ka lɛm mɔri ba nyu'or maan la wʋsa na maal wʋʋ lin nar si'em la; 17 ka lɛm mɔr zʋʋd maan la na ka gbin'e zɔm la nu'ukukudugu nyu'oe daka la zugʋ paas bɛogʋn nyu'or maan la.
18 Ka o kɔdig na'araug nɛ pɛraug la ka li an taaba la'asʋg maannɛ tis nidib la, ka o biribis la mɔr ziim la na ka o mis daka la wʋsa gilig. 19 Ka yis na'araug nɛ pɛraug la zʋʋr la nɛ pʋʋgin la'ad la kpaam wʋsa, nɛ siyaanini la, ka nwaae sɔɔnr la yis bi'ela, 20 ka nɔk kpaam la wʋsa pa'al kugsa la zugin ka nɔk kpaam la nyu'oe li nɛ bugum. 21 Ka Aaron nyɔɔsim kugsa nɛ datiuŋ gbɛr la tis Zugsɔb ka li an nyɔɔsʋŋ maan wʋʋ Moses n yɛl si'em la.
22 Ka on maal tʋʋmbɛ'ɛd maan, nɛ nyu'or maan, nɛ taaba la'asʋg maannɛ naae la, Aaron da ʋk o nu'us agɔl ka sɔs Wina'am albareka tis nidib la, ka nyaan naam daka la nii sig na. 23 Moses nɛ Aaron da kpɛn' La'asʋg Fuug Sʋgʋrin la ka yina niŋ nidib la zug bareka, ka Zugsɔb girima nɛɛsim nie tis nidib la wʋsa. 24 Ka bugum da yi Zugsɔb san'an na di nyu'or maan nɛ kpaam la daka la zug, ka li malis nidib la ka ba maal tʋkpiidʋg ka igin teŋinɛ tis Zugsɔb la na'asi.