Nadab nɛ Abihu kum yɛla
10
1 Aaron biribis banɛ yʋda da buon Nadab nɛ Abihu la da zan'as Zugsɔb la nɔɔr ka zaŋ laa dinɛ ka ba niŋid tudaar la nyu'oe bugum la maal tudaar maan linɛ pʋ dɔl suorɛ. 2 Ka bugum da kpɛn yi Zugsɔb la san'an na dii ba ka ba kpi o tuon. 3 Ka Moses yɛl Aaron ye, “Ala ka Zugsɔb la yɛl ye,“Banɛ li'el man san'an na la,
li nar ye ba baŋ ye m anɛ kasi.
Asɛɛ ka m paam zun'ori
m nidib la wʋsa san'an.”
Ka Aaron kpɛn an baanlimm.
4 Ka Moses buol Misael nɛ Elizafan banɛ an Aaron saambil Uziel biribis la yɛli ba ye, “Kemi na zaŋi ya ba'abiis banɛ kpi nwa n yi Fuug Sʋgʋrin la ka mɔri ba yis teŋ la kpikpɛŋ!” 5 Ka ba yi tuon na gban'e banɛ kpi la fuud la mɔri ba yi ba la'asʋg zin'ig la kpikpɛŋ nwɛnɛ Moses yɛli ba si'em la. 6 Ka Moses yɛl Aaron nɛ o biribis Eleazar nɛ Itamar ye, “Da basi ya zuobid yɔri-yɔri ka maali sʋnsa'aŋa; mɛ da aansi ya fuudɛ, ya'a ka' alaa ya na kpi, ka Zugsɔb la sʋʋnr mɛ duoe nɛ nidib la wʋsa. Amaa kɛl ka ya ba'abiis banɛ an Israel dim la wʋsa maal sʋnsa'aŋ banɛ ka bugum di la yɛla. 7 Mid ka ya yi Fuug Sʋgʋr la yiŋ, ya'a ka' alaa ya na kpi. Bɔzugɔ Zugsɔb la gaŋi ya ka bu'oe malʋŋ kpaam la niŋi ya ye ya an maanmaannib.” Ka Aaron nɛ o biribis ayi' la da siak Moses nɔɔr.
Maanmaannib kisʋg
8 Ka Zugsɔb yɛl Aaron ye, 9 “Fʋn bɛɛ fʋ biribis la ya'a ye ya kpɛn' Fuug Sʋgʋrin la, yanam da nu daam; ya ya'a niŋ ala, ya na kpi. Nwa anɛ zi'elʋgʋ tisidi ya zʋmaana wʋsa ni. 10 Li anɛ tilas ye ya baŋ linɛ an kasi nɛ linɛ an daar wʋsa din, nɛ linɛ an nyain nɛ linɛ ka' nyainnɛ, 11 ka mɛ pa'al Israel dim la zi'elʋg linɛ ka Zugsɔb pian' tis Moses la wʋsa.”
Malʋŋ diib la kisʋg
12 Ka Moses yɛl Aaron nɛ o biribis Eleazar nɛ Itamar banɛ kpɛlim la ye, “Zaŋimi zʋʋd linɛ ka ba maal bugum maannɛ tis Zugsɔb ka li kpɛlim la, li maan daka la baba; da nɔk danbinnɛ niŋi li, bɔzugɔ li anɛ kasi tis Zugsɔb la. 13 Dimini li zin'ikanɛ an kasi la bɔzugɔ, li anɛ fʋn nɛ fʋ biribis la din, ka an bugum maan kanɛ ka ba maali tis Zugsɔb la. Ala ka Zugsɔb zi'eli tisim. 14 Ka fʋn nɛ fʋ biribis nɛ fʋ bipumis na tun'e ɔnb maan la kugsir kanɛ ka ba nyɔɔsim la, nɛ gbɛr kanɛ ka ba yis la. Ɔmmini li zin'isʋŋin la, li anɛ ya dinɛ yi Israel dim la tisid taaba la'asʋg maana la ni. 15 Ka gbɛr la, nɛ kugsir kanɛ nyɔɔsim la, ba na mɔri li kena nɛ li kpaam la ka li an bugum maan, ka nyɔɔsimi li tis Zugsɔb la ka li an nyɔɔsʋŋ maan, ka nwa na an fʋn nɛ fʋ biribis la pʋʋr saŋa wʋsa, nwɛnɛ Zugsɔb la zi'el si'em la.”
16 Moses da bu'os bʋkanɛ an tʋʋmbɛ'ɛd maan la yɛla ka baŋ ye ba nyu'oe li nɛ la, ka o sʋnf duoe nɛ Aaron biribis Eleazar nɛ Itamar banɛ kpɛlim la, ka o yɛl ye 17 “Bɔ ka ya pʋ ɔnbid tʋʋmbɛ'ɛd maan la ni'im zin'ikanɛ an kasi la ni? Bɔzugɔ, li anɛ bʋnkanɛ ka Zugsɔb la sʋ'oe ka li an kasi, ka o zaŋi tisi ya ye ya maan suguru maannɛ tisid Zugsɔb la ka o yisid nidib la tʋʋmbɛ'ɛdi basid. 18 Kɔnbʋg la Ziim la sadigim pʋ kpɛn' Zin'ikanɛ an kasi la, li narin ye ya ɔnbi li Fuug Sʋgʋr la baba wʋʋ man zi'el si'em la.” 19 Ka Aaron yɛl Moses ye, “Ba maal tʋʋmbɛ'ɛd maan nɛ nyu'or maan la zina, ka yɛlbama paae mam; ka m ya'a ɔnbin nwa, Zugsɔb la sʋnf naan malisinɛɛ? Ayei!” 20 Moses n wʋm nwa la, li da malisi o sʋʋnr.