Bʋnkɔnbid banɛ nar ye ba ɔnb
11
1 Ka Zugsɔb la da lɛm pian' tis Moses nɛ Aaron ye, 2 “Pian'am tisi Israel dim la ye, bʋnvʋbanɛ bɛ teŋgbauŋ zug ka ya na di anɛ bama: 3 Ya na tun'e ɔnb bʋnkɔnbʋg kanɛ ka o tafɛɛd buak ayi' ka o mɛ ʋgʋsid yaama bugusid la. 4 Amaa bʋnkɔnbid banɛ ʋgʋsid yaama bugusid ka ba tafɛɛd pʋ buak ayi', bɛɛ banɛ tafɛɛdi buak ayi' ka ba pʋ ʋgʋsid yaama bugusid la, anɛ kisʋgʋ tisi ya. Hali baa yʋgʋme ʋgʋsid yaama bugusid ka o tafɛɛd pʋ buak ayi' la, o anɛ bʋnkɔnb kanɛ an dian'ad ka li pʋ nar ye ya ɔnbi lii. 5 La'am nɛ zansirigi ʋgʋsid yaama bugusid, ka o tafɛɛd pʋ buak ayi' la, o anɛ bʋnkɔnbkanɛ an dian'ad ka li pʋ nar ye ya ɔnbi lii. 6 Su'oŋ mɛ ʋgʋsid yaama, ka o tafɛɛd pʋ buak ayi' la'am nɛ ala, o anɛ bʋnkɔnb kanɛ an dian'ad ka li pʋ nar ye ya ɔnbi lii. 7 La'am nɛ dɛɛg tafɛɛdi buak ayi', ka o pʋ ʋgʋsid yaama bugusid la, o anɛ bʋnkɔnb kanɛ an dian'ad ka li pʋ nar ye ya ɔnbi lii. 8 Mid ka ya ɔnbi ba ni'im bɛɛ si'isi ba bʋnkpiilʋŋ, ba wʋsa anɛ bʋnkɔnb banɛ an dian'ad ka li pʋ nar ye ya ɔnbi baa.9 “Ya tun'e ɔnb bʋnvʋya woo banɛ bɛɛ atɛukʋn bɛɛ kɔldaadin bɛɛ mu'arin ka mɔr pa'ad nɛ kpʋkpama wʋsa. 10 Amaa linɛ wʋsa bɛɛ atɛukʋn nɛ ku'omin wʋsa ka pʋ mɔr pa'ad nɛ kpʋkpama la; li ya'a anɛ bʋmbibis bɛɛ bʋntitada, ya kisi ba. 11 Ya da ɔnbi ba ni'im bɛɛ si'isi ba bʋnkpiilʋŋɔ, ka ba wʋsa anɛ kisʋgʋ tisi ya. 12 Linɛ wʋsa bɛ ku'omin ka pʋ mɔr pa'ad nɛ kpʋkpama la anɛ ya kisi li.
13 “Ni'imbama ka ya kisi ba ɔnbir: Abaar nɛ zuung 14 bɛɛ silʋg buudi wʋsa, 15 bɛɛ agaand buudi wʋsa, 16-18 bɛɛ viiug buudi wʋsa, bɛɛ ku'omin niiŋ, 19 bɛɛ adaalʋŋ nɛ ziiŋyaadiŋ buudi wʋsa nɛ zinzauŋ.
20 “Bʋn-ian'ad-baanlʋg banɛ wʋsa mɔr nɔba ken la, ya kisi ba. 21 Amaa bʋn-ian'ada banɛ mɔr nɔba anaasi ka ba nɔba mɔr duta ka ba mɔri ian'ad la, ya tun'e ɔnb. 22 Bama taaba ka ya na tun'e ɔnb, na'azɔmnam buudi wʋsa, bɛɛ sisɔma buudi wʋsa nɛ kpaanmis. 23 Amaa bʋn-ian'ada banɛ vuud teŋin ka mɔr nɔba anaasi ken la anɛ ya kisi ba.
24 “Bʋmbama anɛ kisʋg ka ba ya'a kpi ka sɔ' si'isi li, on sɔb na an dian'ad sɔb hali ti paae zaam, 25 ka onɛ wʋsa mɛ vaae li bʋnkpiilʋŋ la mɔri keŋ, na pie o fuud ka kpɛn an dian'ad sɔb hali ti paae zaam. 26 Bʋnkɔnbid banɛ tafɛɛdi buak ayi' ka pʋ buaki naae la, bɛɛ ka pʋ ʋgʋsid yaama bugusid la, ba bʋnkpiilima ka' nyain tisi ya, ka onɛ si'isi li na an dian'ad sɔb. 27 Linɛ wʋsa mɔr nɔba anaasi ken amaa ka ka' tafɛɛd la, li ka' nyain tisi ya. Onɛ wʋsa si'isi li bʋnkpiilima, o na anɛ dian'ad sɔbi ti paae zaam. 28 Ka onɛ wʋsa mɛ vaae li bʋnkpiilʋŋʋ mɔri keŋ, na pie o fuud ka an dian'ad sɔb hali ti paae zaam. Ba anɛ dian'adi tisi ya.
29 “Bʋn linɛ vuud teŋgbauŋ nwa zug wʋsa ka' nyainnɛ, linɛ an tintɔɔndig bɛɛ dayuug nɛ kuug bɛɛ atiwindaug nɛ linɛ nwɛnɛ bama taaba la, 30 nɛ akɔn'ɔs nɛ gbanzaug, nɛ abanja nɛ abaŋkʋsɔl nɛ dindɛog. 31 Banɛ wʋsa vuud teŋin ka' nyain tisi ya. Ba ya'a kpinɛ ka sɔ' si'isi ba o na an dian'ad sɔbi ti paae zaam. 32 Ka bʋn bama ya'a kpi ka luu si'is si'el, bʋn kan ka' nyain nɛ, baa li ya'a anɛ tʋʋma lauk, li na anɛ dian'ad; baa ba ya'a zaŋ nɛ daadi maali li bɛɛ pien bɛɛ gbauŋ bɛɛ bɔto fuug, asɛɛ ka ba zaŋi li niŋ ku'omin, ka li kʋ an nyainnɛ hali ti paae zaam, ka yʋ'ʋn na lieb nyain. 33 Ka ba yinne ya'a lu tandʋkʋn, linɛ wʋsa bɛɛ li ni ka' nyainnɛ, asɛɛ ya nwa'ae dʋk la. 34 Dikanɛ wʋsa ka ya na di ka dʋk nwa ku'om si'isi li, diib la ka' nyainnɛ, nɛ bʋnnuuda linɛ ka ya na nu la ya'a bɛ dʋk la pʋʋgin, li wʋsa ka' nyainnɛ. 35 Bʋn linɛ wʋsa ka bʋnkpiilʋŋ luu li zugʋ si'isi li la lieb nɛ dian'ad. Li ya'a anɛ siŋ bɛɛ dan'anvi'and, asɛɛ ba nwa'ae ba bɔzugɔ ba ka' nyainnɛ, ka na kpɛn an linɛ ka' nyain tisi ya hali ken sa. 36 Li ya'a lu nɛ buligin bɛɛ kɔlʋgin, ku'om la kpɛn anɛ nyain, amaa sɔ' ya'a gban'e bʋnkpiilʋŋ la, on sɔb kʋ an nyainnɛ. 37 Ka bʋnkpiilʋŋ la ya'a si'is bʋmbʋʋda linɛ ka ya ye ya zaŋi bʋd la, li na kpɛn anɛ nyain, 38 amaa sɔ' ya'a zaŋ ku'om niŋ bʋmbʋʋda la ni ka bʋnkpiilʋŋ si'isi li, li anɛ linɛ ka' nyain tisi ya.
39 “Bʋnkɔnbʋg kanɛ ka ya zaŋ ka li an diibi tisi ya la ya'a kpi nɛ, ka sɔ' si'isi li, o kʋ an nyainnɛ ti paae zaam. 40 Onɛ wʋsa ɔnb bʋnkpiilʋŋ la piemi o fuud ka an dian'ad sɔbi ti paae zaam, ka onɛ vaae bʋnkpiilʋŋ la mɔri keŋ la piemi o fuud ka an onɛ ka' nyainnɛ ti paae zaam.
41 “Bʋnvʋr kanɛ wʋsa vuud teŋin na anɛ kisʋg, ka li pʋ sʋm ye ya ɔnbi lii. 42 Ya mɛ da ɔnb bʋnvʋr kanɛ vuud o pʋʋr zug teŋin bɛɛ linɛ mɔr nɔba bɛdegʋ, li anɛ linɛ ka ya kis. 43 Da ganlimi ya mɛŋ nɛ bʋnvʋr bamanam taabaa. Da kɛ ka bamanam kɛ ka ya dian'a ya mɛŋa. 44 Manɛ aan ya Zugsɔb Wina'am, zaŋimi ya mɛŋi tis mam, aaɛn kasi bɔzugɔ, mam anɛ kasi. Da kɛ ka bʋnvʋr kanɛ vuud teŋgbauŋ nwa zug kɛ ka ya kʋ an nyainnɛ. 45 Manɛ aan ya Zugsɔb onɛ mɔri ya yi Egipt teŋgbauŋʋn na ye m aan ya Wina'am la. Alazugɔ, bɛɛi kasi, bɔzugɔ, mam anɛ kasi.