Biig du'am malʋŋ
12
1 Ka Zugsɔb la da lɛm pian' tis Moses n yɛt o ye, 2 “Pian'am tis Israel nidib la ye pu'a ya'a gban'e pʋʋgʋ du'a biribiŋ, o kʋ an nyainnɛ ti paae daba ayɔpɔi nwɛnɛ on ka' nyain o nwadig pier saŋa si'em la. 3 Ba kpɛn'ɛsim biig la baŋʋ daba anii la daar. 4 Pu'a la na gu'usi o mɛŋ dabisa pistan' nɛ atan' o ku'od la nan kpɛn yit la; o da si'is bʋn linɛ an Zugsɔb la dinnɛ, o mɛ da kpɛn' Fuug Sʋgʋrin la, hali ka o zuŋur saŋa ti gaad. 5 O ya'a du'a bipuŋ, asɛɛ ka o zaŋ dabisa pii nɛ anaasi bɛ yin nwɛnɛ o pier saŋa la; o na zaŋ dabisa pisyuobʋ nɛ ayuobʋ ka ba nyaan zuŋ o.6 “Onɛ du'a biribiŋ bɛɛ bipuŋ ka o zuŋur saŋa ti gaad, on zaŋim yʋʋm pɛribig n keŋ Fuug Sʋgʋr la za'anɔɔrin n tis maanmaan la ka li an nyu'or maan, nɛ sian'adawan bɛɛ na'adawanbil ka li an tʋʋmbɛ'ɛd maan. 7 Maanmaan la na zaŋi ba maal Zugsɔb la tuon ka li an suguru sɔsʋg maan linɛ na zuŋ pu'a la ka o yʋ'ʋn an nyain o ku'od yiib la zug. Nwa ka m zi'eli tis pu'a kanɛ du'a biribiŋ bɛɛ bipuŋ. 8 Onɛ kʋ nyaŋ pɛribiga, on zaŋim sian'adawan ayi', bɛɛ na'adawanbibis ayi' na; yinne anɛ ba nyu'oe li ka li an nyu'or maan, ka onɛ kpɛlim la an tʋʋmbɛ'ɛd maan. Anwa ka maanmaan la na maal suguru sɔsʋg maan pu'a la yɛla.”