Levi dim 13

Niŋgbina ban'as zi'ela

1 Ka Zugsɔb la lɛm pian' tis Moses nɛ Aaron ye, 2 “Sɔ' ya'a mɔr fɛn'ɛdi o niŋgbina ni bɛɛ mɔda bɛɛ li fʋlisnɛ nyɛɛnnɛ bɔɔdi kilim niŋgbina ban'as, on kem Aaron onɛ an maanmaan la san'an bɛɛ o biribis banɛ an maanmaannib la yinne san'an. 3 Maanmaan la na gɔs fɛn'ʋg la o niŋgbiŋin la ka niŋkɔnbilʋg banɛ bɛ fɛn'ʋgʋn la ya'a pɛlig ka nɔbigidi kpɛn'ɛdi o niŋgbina la ni, li anɛ niŋgbina san'auŋ ban'as; ka maanmaan la ya'a gɔs o, o na yɛl ye o ka' nyainnɛ. 4 Amaa li ya'a pʋ nɔbigi kpɛn' pʋʋginɛ, ka niŋkɔnbilʋg la mɛ pʋ pɛligɛ, maanmaan la na kɛ ka o bɛɛ o kɔn'ɔkɔn' ti paae daba ayɔpɔi. 5 Ka daba ayɔpɔi la daar ya'a paae, maanmaan la na lɛn gɔs o, ka li ya'a pʋ tiakɛ ka fɛn'ʋg la pʋ lɔ'ɔŋ o niŋgbiŋ la zin'isi'a, maanmaan la na lɛn kɛ ka o bɛɛ o kɔn'ɔkɔn' daba ayɔpɔi ya'as. 6 Ka maanmaan la na lɛn gɔs o daba ayɔpɔi daar la, ka fɛn'ʋg la ya'a bɔdig ka pʋ lɔ'ɔŋ o niŋgbiŋ la zin'isi'a, li pa'al ye li kʋdim anɛ sankpana ka maanmaan la yʋ'ʋn na yɛl o ye o anɛ nyain, ka o pie o fuud la ka lieb nyain. 7 Amaa sankpana la ya'a tiigi o niŋgbina wʋsa on pa'ali o mɛŋ la nya'aŋ, on kem nɔk o mɛŋi pa'al o ya'as. 8 Ka maanmaan la na gɔs o ka o sankpana la ya'a tiigidi o niŋgbina la wʋsa, o na yɛl ye o ka' nyainnɛ; ka li anɛ niŋgbina san'auŋ ban'as.

9 “Sɔ' ya'a mɔr niŋgbina san'auŋ ban'as, ban mɔr o keŋ maanmaan la ni. 10 Maanmaan la ya'a gɔs o ka o niŋgbiŋ zin'isi'a ya'a mɔdi pɛligi tiak niŋkɔnbilʋg la ka kɛ ka li pɛlig, ka fɛn'ɛpaala bɛ, 11 li anɛ niŋgbina san'auŋ ban'asi bɛɛ o niŋgbiŋin la yuug, ka maanmaan la na yɛl o ye o ka' nyainnɛ. O kʋ kɛ ka o bɛ zin'isi'a o kɔn'ɔkɔn' bɔzugɔ bi'esʋg lɛn kae ye o kae nyainnɛ. 12 Ka ban'as la ya'a tiigi o niŋgbina la wʋsa, lin yii o zugini ti paae o nɔba ni, ka maanmaan la mɛŋ nyɛ ka li aan ala, 13 o na gɔs o niŋgbina la wʋsa, ka yɛl o ye o an nyain; li wʋsa ya'a pɛligi naae, li pa'al ye o lieb nyain. 14 Amaa fɛn'ɛpaala ya'a lɛm bɛɛ o niŋgbina zin'isi'a, o ka' nyainnɛ. 15 Maanmaan la ya'a nyɛ fɛn'ʋg la o na yɛl o ye o ka' nyainnɛ, ka li anɛ niŋgbina san'auŋ ban'as. 16 Amaa o niŋgbina la zin'ikanɛ mɔr fɛn'ɛd la ya'a lɛn pɛlig, on zaŋim o mɛŋi pa'al maanmaan la 17 ka maanmaan la ya'a gɔs ka zin'ig la pɛlig wʋsa, o na yɛl o ye o anɛ nyain.

18 “Natiŋkpi'eŋ ya'a tɔn sɔ' ka bas o 19 ka li isir la an piel, bɛɛ mɔdi an wiya-wiya, o na pa'ali o mɛŋ maanmaan la. 20 Ka maanmaan la ya'a gɔs fɛn'ʋg la ka li kpɛn' o niŋgbina la pʋʋgin, ka niŋkɔnbilʋg la pɛlig, maanmaan la na yɛl o ye o ka' nyainnɛ. Fɛn'ʋg la anɛ niŋgbina san'auŋ ban'as. 21 Amaa maanmaan la ya'a gɔs o ka fɛn'ʋg la bas ka niŋkɔnbilʋg la pʋ pɛligɛ, ka li pʋ kpɛn' o niŋgbiŋinɛ, amaa ka mu'oe bi'ela, maanmaan la na kɛ ka o bɛɛ o kɔn'ɔkɔn' daba ayɔpɔi. 22 Ka o fɛn'ɛd la ya'a kpɛn paasid, maanmaan la na yɛl o ye o ka' nyainnɛ, o mɔr niŋgbina san'auŋ ban'as. 23 Amaa fɛn'ʋg la ya'a nam bɛ zin'ig yinne ka pʋ lɔ'ɔŋ niŋgbina zin'isi'a, li anɛ natiŋkpi'eŋ la isir, ka maanmaan la na yɛl o ye o an nyain.

24 “Bugum bɛɛ bʋntʋʋl ya'a pu'alim sɔ' niŋgbiŋ zin'isi'a ka li pɛlig bɛɛ an wiya-wiya, 25 maanmaan la na gɔsi li, ka niŋkɔnbilʋg la ya'a pɛlig ka li kpɛn' o niŋgbina la pʋʋgin, li anɛ niŋgbina san'auŋ ban'as la yi fɛn'ʋgin la na. Maanmaan la na yɛl o ye o ka' nyainnɛ, li anɛ niŋgbina san'auŋ ban'as. 26 Amaa ka maanmaan la ya'a gɔs o ka fɛn'ʋg la bas ka niŋkɔnbilʋg la pʋ pɛligɛ, ka li pʋ kpɛn' o niŋgbiŋin laa, amaa ka mu'oe bi'ela o niŋgbina ni, maanmaan la na kɛ ka o bɛɛ o kɔn'ɔkɔn' daba ayɔpɔi. 27 Daba ayɔpɔi la daar ya'a paae, maanmaan la na gɔs o ka o fɛn'ɛd la ya'a kpɛn paasid, maanmaan la na yɛl o ye o ka' nyainnɛ, o mɔr niŋgbina san'auŋ ban'as. 28 Amaa isir la ya'a kpɛn bɛ ka pʋ lɔ'ɔŋ o niŋgbina la wʋsa, ka mu'oe bi'ela, li anɛ isir la fʋlis, ka maanmaan la na yɛl o ye o anɛ nyain, li kʋdim anɛ pu'alʋŋ la isir.

29 “Dau bɛɛ pu'a zug bɛɛ tieŋgu'or ya'a mɔr fɛn'ʋg, 30 maanmaan la na gɔsi o fɛn'ʋg la ka li ya'a kpɛn' o niŋgbina ni ka kɔnbilʋg la nwɛnɛ dɔnbʋʋlim nɛ ka tulisi tulis, maanmaan la na yɛl o ye o ka' nyainnɛ, li anɛ niŋgbina san'auŋ ban'asi bɛɛ o zug nɛ tieŋgu'or la ni. 31 Amaa maanmaan la ya'a gɔs fɛn'ɛd la ka li pʋ kpɛn' o niŋgbina la nii ka kɔnbilʋg la pʋ sɔbigɛ, maanmaan la na kɛ ka o bɛɛ o kɔn'ɔkɔn' daba ayɔpɔi. 32 Daba ayɔpɔi la daar maanmaan la gɔsim o fɛn'ɛd la ya'as, ka fɛn'ɛd la ya'a pʋ tiig niŋgbiŋ laa, ka kɔnbilʋg la pʋ nwɛnɛ dɔnbʋʋlim, ka pʋ kpɛn' o niŋgbiŋin laa, 33 ban pʋnimi o zug ka kɛ fɛn'ʋg la zin'ig la. Ka maanmaan la kɛ ka o bɛɛ o kɔn'ɔkɔn' daba ayɔpɔi ya'as. 34 Daba ayɔpɔi la daar, maanmaan la na gɔs o fɛn'ʋg la, ka fɛn'ʋg la ya'a pʋ tiigid niŋgbina la, maanmaan la na yɛl o ye o an nyain; o piem o fuud ka lieb nyain. 35 Ka fɛn'ʋg la ya'a ti maligim paasid ban yɛl o ye o an nyain la nya'aŋ, 36 maanmaan la na gɔs o ya'as ka fɛn'ʋg la ya'a tiigidi o niŋgbina la, on pʋn da lɛn gɔs ye niŋkɔnbilʋg la nwɛnɛ dɔnbʋʋlim; ka o pʋn ka' nyainnɛ. 37 Amaa maanmaan la ya'a gɔs o, ka fɛn'ʋg la kpɛn bɛɛ ani ma'aa ka pʋ tiigidi o niŋgbinaa, ka li kɔnbilʋg sɔbigid, li pa'al ye ban'a la bas ya. Maanmaan la na yɛl o ye o anɛ nyain.

38 “Dau bɛɛ pu'a ya'a mɔr ban'asi'a o niŋgbiŋin ka li pɛlig, 39 maanmaan la na gɔs o, ka linɛ pɛlig la ya'a mu'oe bi'ela, li anɛ isir linɛ bɛɛ o niŋgbiŋin ma'aa, alazug o anɛ nyain.

40 “Dau sɔ' zug ya'a pie ka o lieb zupieʋŋ, o anɛ nyain. 41 O gbɛ'og baba ya'a pie ka o lieb zupieʋŋ, o anɛ nyain. 42 Amaa fɛn'ɛbanɛ an zɛn'ɛm-zɛn'ɛm bɛɛ piela-piela ya'a bɛɛ o gbɛ'og bɛɛ o zug zin'ikanɛ pie la, li anɛ niŋgbina san'auŋ ban'asi yiti o zugin bɛɛ gbɛ'ogʋn la na. 43 Maanmaan la na gɔs o, ka fɛn'ʋg kanɛ bɛɛ o gbɛ'ogʋn bɛɛ o zugin la ya'a fʋlisi mu'oe pɛlig nwɛnɛ niŋgbina san'auŋ ban'as nɛ, 44 dau la mɔr ban'as ka ka' nyainnɛ. Maanmaan la na yɛl o ye o ka' nyainnɛ, fɛn'ɛd la bɛɛ o zugin la yɛla.

45 “Ninkan daana yɛɛm fubanɛ aans, ka bas o zuobid ka li zunnim-zunnim, ka mɛ zaŋ si'eli lus o nɔŋgban baba, ka kennɛ maan vuudi yɛt ye ‘M ka' nyainnɛ, m ka' nyainnɛ!’ 46 Saŋkanɛ ka niŋgbina san'auŋ ban'as mɔr o la, o ka' nyainnɛ, li anɛ ye o bɛɛ o kɔn'ɔkɔn' kpikpɛŋ sa.”

Fuug kanɛ guunlim yɛla

47 “Fubanɛ an pien fuud bɛɛ banɛ ka ba zaŋ pɛ'ɛs kɔnbidi ʋg ya'a guunlim; 48 li ya'a anɛ ye ba zaŋ nɛ pɛ'ɛs kɔnbid bɛɛ gumme ʋg, hali li ya'a anɛ gbauŋ ka ba maali li, 49 zin'ikanɛ ka li bɛ fuugin bɛɛ gbauŋ linɛ ka ba zaŋ kɔnbid bɛɛ gumme ʋg ka li an zɛn'ɛm-zɛn'ɛm bɛɛ nwɛnɛ dɛn'ɛm nɛ bɛɛ li wʋsa ni ka o zaŋ ka ban'a la zanbin bɛɛ anina, ba na zaŋi li pa'al maanmaan la. 50 Ka maanmaan la na gɔs ban'a la ka zaŋ lauk la niŋ zin'isi'a li kɔn' daba ayɔpɔi. 51 Daba ayɔpɔi la daar o na gɔsi li ka guunluŋ la ya'a lɔ'ɔŋ fuug la bɛɛ lauk la zin'isi'a, baa li ya'a na zaŋi tʋm tʋʋm si'a, lin guunlim la zug, li ka' nyainnɛ. 52 Li anɛ o nyu'oe fuug la, baa li ya'a anɛ lauk si'a wʋsa, lin guunlim la zug, asɛɛ ba nyu'oe li nɛ bugum.

53 “Amaa maanmaan la ya'a gɔs ka guunluŋ la pʋ tiig fuug la bɛɛ lauk laa, 54 o na kɛ ka ba pie fuug la ka zaŋi li niŋ zin'isi'a li kɔn' daba ayɔpɔi ya'as. 55 Ka ba ya'a pie lauk la, maanmaan la na lɛn gɔsi li, ka guunluŋ la ya'a pʋ tiakɛ, li ka' nyainnɛ. Guunluŋ la ya'a si'isi li pʋʋgin bɛɛ li nya'aŋ o na nyu'oe li nɛ bugum.

56 “Maanmaan la ya'a gɔsi li ka zin'ikanɛ guunlim la lɛn kae ban pie li la zug, on aam zin'ikanɛ guunlim la bas. 57 Amaa ba ya'a pie fuug la ka guunluŋ la lɛn nie ya'as, ban nyu'omi li. 58 Li ya'a anɛ fuug bɛɛ fukanɛ ka ba ʋg bɛɛ li anɛ gbauŋ lauk ka ba pie li ka guunluŋ la yi wʋsa, ba na lɛm pie li ya'as ka li an nyain.

59 “Bama an zi'ela zaŋi ken guunluŋʋ na bɛ fuudin. Li ya'a anɛ ye ba zaŋ nɛ gumme ʋg, bɛɛ pɛ'ɛs kɔnbid, bɛɛ ba zaŋ nɛ gbauŋʋ maal; li na pa'al ka ya baŋ ye li an nyain bɛɛ li ka' nyainnɛ.”