Niŋgbina san'auŋ ban'ad nyain malʋŋ yɛla
14
1 Zugsɔb la da yɛl Moses ye; 2 “Zi'elbama ka onɛ ka o niŋgbina san'auŋ ban'as bas na dɔlis saŋa kanɛ ka ba mɔr o kɛn maanmaan san'an na ye o maal maan linɛ na kɛ ka o lɛbig nyain la: Ba na mɔr o kɛn maanmaan la san'an na, 3 ka maanmaan la na yi la'asʋg zin'igin la keŋ teŋ la kpikpɛŋ, ka gɔsi o niŋgbina san'auŋ ban'as la. Ka o ban'as la ya'a bɔdig, 4 maanmaan la na kɛ ka ba zaŋ bʋn-ian'ada ayi' banɛ vʋe ka an nyain, nɛ na'aziinr daug nɛ pien zɛn'ug nɛ nyulinnyu'usi tis onɛ ka ba ye ba maal o ka o lieb nyain la. 5 Maanmaan la na tis nɔɔr ye ba nɔkim tandʋkʋ niŋ ku'osʋŋ ka kɔdig bʋn-ian'ada la yinne niŋ ziim la dʋkʋn la; 6 ka bʋn-ian'adir kanɛ vʋe la, o na nɔki li, la'am nɛ na'aziinr daug la nɛ pien zɛn'ug nɛ nyulinnyu'us la lɔsi ba wʋsa bʋn-ian'adir kanɛ ka ba kɔdig o ku'osʋŋin la ziimin. 7 O na misi mis onɛ ka o ye o maal o nyain la nɔɔr ayɔpɔi ka yʋ'ʋn mɔɔl ye o anɛ nyain, ka bas bʋn-ian'adir onɛ vʋe la ka o ianki keŋ mɔɔgin sa. 8 Ani ka onɛ ka ba ye ba maal o nyain la yʋ'ʋn na pie o fuud ka pʋn o zug, ka sʋ ku'om an nyain. Lin nya'aŋ o na kpɛn' la'asʋg zin'igin la, ka lɛɛ kʋ kpɛn' o dɔɔginɛ hali ka li ti paae daba ayɔpɔi. 9 Li ya'a paae daba ayɔpɔi daar la, o na maligim pʋni o zug la nyain, ka kɔɔnsi o tieŋ nɛ o ninkʋgʋdis kɔnbid, hali nɛ o niŋgbiŋ kɔnbilʋg wʋsa, ka yʋ'ʋn pie o fuud wʋsa ka sʋ, ka nyaan lieb nyain naae.10 “Daba anii daar, asɛɛ ka o zaŋ pɛribis ayi' banɛ ka' dɛŋŋa nɛ pɛsa'a kanɛ an yʋʋm yinne ka pʋ mɔr dɛŋŋa, nɛ zɔmbaanlig kuribir pʋdigir piiga, ka vaae atan' gɛndig nɛ kpaam ka li an zʋʋd maan, ka bɔ kpaam kɔlibir pʋsʋki paas. 11 Ka maanmaan onɛ na maal o nyain la na mɔr dau la nɛ la'ad la wʋsa na zi'el Zugsɔb la tuon La'asʋg Fuug Sʋgʋr la za'anɔɔrin. 12 Maanmaan la na zaŋ pɛribig yinne kɔdig ka paas kpaam kɔlibir pʋsʋki maal taal maan ka nyɔɔsimi li Zugsɔb la tuon ka li an nyɔɔsʋŋ maan. 13 O na kɔdig pɛribig la zin'ikanɛ an kasi ka ba kɔtid tʋʋmbɛ'ɛd maan nɛ nyu'or maana la. Taal maan la anɛ maanmaan la din wʋʋ tʋʋmbɛ'ɛd maan la aan o din si'em la. Li anɛ kasi. 14 Ka maanmaan la na zaŋ taal maan la ziim tin'e niŋ onɛ ka ba ye ba maal o nyain la datiuŋ tʋbir nɛ o datiuŋ nu'uraug nɛ o datiuŋ nɔbraugin. 15 Ka bu'oe malʋŋ kpaam kɔlibir pʋsʋk la bi'ela niŋ o mɛŋ dagɔbʋg nu'ugin 16 ka zaŋ o datiuŋ nu'ubili tʋm kpaam linɛ bɛɛ o dagɔbʋg nu'ugin la mis nɔɔra ayɔpɔi, Zugsɔb la tuon. 17 Ka kpaam kanɛ kpɛlim bɛɛ o nu'ugin la, maanmaan la na tin'e li bi'ela niŋ onɛ ka o ye o maal o nyain la datiuŋ tʋbir, nɛ datiuŋ nu'uraug nɛ datiuŋ nɔbraugin, m paas taal maan ziim la zug. 18 Maanmaan la na nɔk kpaam linɛ kpɛlim o nu'ugin la niŋ onɛ ka ba ye ba maal o nyain la zugin ka maal suguru sɔsʋg maannɛ o zug Zugsɔb la tuon. 19 Maanmaan la yʋ'ʋn na maal tʋʋmbɛ'ɛd maannɛ sɔs suguru tis o ka li kɛ ka onɛ kae nyain la lieb nyain. Ka lin nya'aŋ ka o kɔdig linɛ ka ba na maal nyu'or maan la, 20 nɛ zʋʋd maan la daka la zugʋ maal suguru sɔsʋg maan Zugsɔb la tuon, ka o lieb nyain.
21 “Ka o ya'a anɛ nɔŋdaan ka kʋ nyɛ la'ad la wʋsaa, on zaŋim pɛribig yinne ka li an taal maan ka ba nyɔɔsim maal suguru maannɛ tis o, ka lɛn zaŋ zɔmbaanlig kuriba pʋdigir piiga pɔɔgin yis ayinne gɛndig nɛ kpaam ka li an zʋʋd maan, nɛ kpaam kɔlibir pʋsʋk, 22 nɛ sian'adawana ayi', bɛɛ na'adawanbibis ayi', on na tun'e nyɛ si'em, ka yinne na an tʋʋmbɛ'ɛd maan, ka yinne mɛ na an nyu'or maan. 23 Ka daba anii daar la, ban ye ba maal o nyain daasi'el la, o na mɔri li wʋsa na tis maanmaan la La'asʋg Fuug sʋgʋr la za'anɔɔrin, Zugsɔb la tuon. 24 Ka maanmaan la na zaŋ pɛrakanɛ an taal maan la, nɛ kpaam linɛ an kɔlibir pʋsʋk la, ka zaŋi li ka li an nyɔɔsʋŋ maannɛ tis Zugsɔb la. 25 Ka linɛ paas anɛ o kɔdig pɛ'og linɛ an taal maan la, ka zaŋ taal maan la ziim tin'e li onɛ ka ba ye ba maal o nyain la datiuŋ tʋbir nɛ o datiuŋ nu'uraug nɛ o datiuŋ nɔbraug. 26 Ka bu'oe malʋŋ kpaam kɔlibir pʋsʋk la bi'ela niŋ o mɛŋ dagɔbʋg nu'ug pʋʋgin, 27 ka zaŋ o datiuŋ nu'ubili tʋm kpaam linɛ bɛɛ o dagɔbʋg nu'ugin la mis nɔɔra ayɔpɔi, Zugsɔb la tuon. 28 Ka kpaam kanɛ kpɛlim bɛɛ o nu'ugin la, maanmaan la na tin'e niŋ onɛ ka ba ye ba maal o nyain la datiuŋ tʋbir, nɛ o datiuŋ nu'uraug nɛ o datiuŋ nɔbraugin, paas on niŋ taal maan la ziim zin'isieba la. 29 Maanmaan la na zaŋ kpaam linɛ kpɛlim o nu'ugin la niŋ on ye o maal sɔ' nyain la zugin, maal suguru sɔsʋg maannɛ tis o Zugsɔb la tuon. 30 Ka o na nɔk sian'adawana la bɛɛ na'adawanbibis la maal maan la wʋʋ nid la paŋi na tun'e nyɛ si'el, 31 ka yinne an tʋʋmbɛ'ɛd maan ka oŋa la mɛ an nyu'or maan, ka o la'as nɛ zʋʋd maan, ka maanmaan la na sɔs suguru tis o ka maal o nyain Zugsɔb la tuon. 32 Nɛ'ɛŋa an nɔzi'ela tis on mɛkama ka niŋgbina san'auŋ ban'as bɛɛ o niŋgbiŋin ka o kʋ nyaŋi paam maana la'abanɛ ka ba na maali pie o ka o lieb nyain la.”
Yir nyain maan yɛla
33 Zugsɔb la da lɛn yɛl Moses nɛ Aaron ye, 34 “Ya ya'a kpɛn' Keenan teŋin la, teŋ kanɛ ka m ye m tisi ya ka ya sʋ'oe la, ka m kɛ ka dɛn'ɛm bɛ yisi'a ni, 35 onɛ sʋ'oe yir la na kena yɛl maanmaan la ye, m nyɛ si'el ka li nwɛnɛ dɛn'ɛm nɛ kpɛn'ɛm m yir la. 36 Ka maanmaan la na kɛ ka ba yis yir la la'ad wʋsa ka o nyaan kpɛn' yin la gɔs dɛn'ɛm la, ala ka ba kʋ yɛl ye linɛ bɛ yin la wʋsa ka' nyainnɛ: Ka lina nya'aŋ, maanmaan la na kpɛn' gɔs yir la. 37 O na gɔs dɛn'ɛm la, ka zanbin banɛ bɛ yir la dɔkpina ni la ya'a an dɛn'ɛm bɛɛ zɛn'ug ka kpɛn' dɔkpin la pʋʋgin, 38 o na yi yir la za'anɔɔrin na, ka yɔ' yir la daba ayɔpɔi. 39 Ka daba ayɔpɔi la daar maanmaan la na lɛn keŋ gɔs yir la, ka dɛn'ɛm la ya'a yadigid yir la dɔkpina la ni, 40 o na yɛli ba ye, ba nwa'am yis kugbanɛ ka zanbina la bɛɛ ba ni la, ka zaŋi ba bas zin'ikanɛ ka' nyainnɛ, tempʋʋg la yiŋ sa. 41 Asɛɛ o kɛ ka ba ur yir la pʋʋgin wʋsa gilig ka la'as titaad linɛ ka ba kɔɔns la zaŋi li yi teŋ la yiŋ sa, zin'ikanɛ ka' nyainnɛ, kpa'ae bas anina. 42 Ka zaŋ kugsieba kpɛn'ɛsi lɛdig kugbanɛ ka ba yis la zin'igin, ka bɔ mʋma'adi taae linɛ ka ba urisi yis la.
43 “Ka dɛn'ɛm la ya'a lɛn lɛb na bɛ yin la on vɔn' kuga la yis ka uris ka lɛm maligim taae li nya'aŋ la, 44 maanmaan la na lɛn kena gɔs yir la, ka o ya'a nyɛ ka dɛn'ɛm la sid yadig yin la, li anɛ dɛn'ɛm kanɛ mɔr san'auŋ ka yir la ka' nyainnɛ. 45 Asɛɛ ka ba da'ae yir la bas, ka vaae li kuga la, nɛ li daad nɛ titaad linɛ bɛ yin la wʋsa, zaŋi li yi tempʋʋg la yiŋi keŋ zin'ikanɛ ka' nyain la bas. 46 Ka onɛ mɛkama kpɛn' yin la saŋa kanɛ ka li yɔ la na lieb dian'ad sɔb, hali ti paae zaam. 47 Ala mɛn, ka onɛ mɛkama digin yikan la bɛɛ di diib yikan la pʋʋgin, na pie o fuud.
48 “Amaa maanmaan la ya'a lɛb na kpɛn' yin la gɔsi li ka dɛn'ɛm la pʋ tʋgis ban uris ka lɛbi taae titaad la nya'aŋa, maanmaan la na yɛl ye, yir la anɛ nyain bɔzugɔ, dɛn'ɛm la pʋ lɛn lɛb naa. 49 O ya'a ye o pie yir la, asɛɛ ka o zaŋ niimis ayi', nɛ na'aziinr daug nɛ pien zɛn'ug nɛ nyulinnyu'us, 50 ka zaŋ tandʋkʋ niŋ ku'osʋŋ ka kɔdig niimis la yinne niŋ ziim la dʋkʋn la, 51 ka nɔk niiŋ kanɛ kpɛlim la la'am nɛ na'aziinr daug la nɛ pien zɛn'ug nɛ nyulinnyu'us la lɔsi ba wʋsa niiŋ kanɛ ka ba kɔdig la ziimin nɛ ku'osʋŋin la, ka nɔki li misi mis yir la nɔɔra ayɔpɔi. 52 O na zaŋ niiŋ la ziim nɛ ku'osʋŋ la la'am nɛ bʋnvʋr la nɛ na'aziinr daug nɛ nyulinnyu'us nɛ pien zɛn'ug la pie yir la ka li an nyain. 53 Ka mɔr niiŋ onɛ kpɛlim la yi teŋ la yiŋi bas o ka o ianki keŋ mɔɔgin sa, anwa ka o na maal suguru sɔsʋg maan ka yir la lieb nyain.”
54 Bama an nɔzi'ela banɛ ka ya na dɔlis niŋgbina san'auŋ ban'as yɛla hali baa li ya'a anɛ niŋgbina mun, 55 bɛɛ li anɛ fuud bɛɛ li bɛnɛ yir pʋʋgin. 56 Li ya'a anɛ sankpana bɛɛ mɔda ka o niŋgbiŋ la tiaki las piela-piela bɛɛ mu'oe bɛɛ sɔbig; 57 nɛ'ɛŋa an niŋgbina san'auŋ ban'as la nɔzi'ela ka ya na dɔlisi baŋ linɛ an nyain nɛ linɛ ka' nyainnɛ.