Dau daulim na yuod yɛla
15
1 Zugsɔb la da yɛl Moses nɛ Aaron ye, 2 “Pian'am tis Israel dim la ka yɛli ba ye, mɛt ya'a yuod dau daulimin, li anɛ dian'ad. 3 Ka o mɛt la ya'a kpɛn yuod bɛɛ li guoe nɛ, li na kɛ ka o an dian'ad sɔb. 4 Digisig kanɛ wʋsa ka o sɔb diginɛ li ni na lieb dian'ad, ka linɛ mɛkama zug ka o zin'in na lieb dian'ad, 5 ka sɔ' ya'a si'isi o digisig la, o na pie o fuud ka sʋ, ka na an dian'ad sɔbi ti paae zaam; 6 ka onɛ mɛkama zin'in zin'ikanɛ ka dau la zin'ini li zug mɛ na pie o fuud ka sʋ, ka na an dian'ad sɔbi ti paae zaam. 7 Ala mɛn ka onɛ mɛkama si'is ninkan sɔb na pie o fuud ka sʋ, ka an dian'ad sɔbi ti paae zaam; 8 hali dau la ya'a tʋ'ʋsi o nintɔɔndi mad onɛ an nyain, o sɔba mɛ na pie o fuud ka sʋ, ka an dian'ad sɔbi ti paae zaam; 9 ka ga'ar mɛkama linɛ ka ninkan sɔb zin'ini li zug mɛ na an dian'ad. 10 Onɛ mɛkama si'is linɛ wʋsa ka o zin'in bɛɛ digini li zug na anɛ dian'ad sɔbi ti paae zaam, ka onɛ si'is la'abama mɛ na pie o fuud ka sʋ, ka an dian'ad sɔbi ti paae zaam. 11 Ala mɛn ka onɛ daulim yuod la ya'a pʋ pie o nu'usɛ ka si'is sɔ', o sɔba na pie o fuud ka sʋ, ka an dian'ad sɔbi ti paae zaam. 12 Ka tandʋk kanɛ ka onɛ daulim yuod la si'is, ban nwa'ami li, ka la'abanɛ ka ba zaŋ daadi maal la asɛɛ ba pie li ku'omin.13 “Ka linɛ yuod dau la daulimin la ya'a bas ka o lieb nyain, o na kaal daba ayɔpɔi, o nyain maan la yɛla, ka yʋ'ʋn pie o fuud ka sʋ ku'osʋŋin, ka lieb nyain. 14 Ka daba anii la daar o na zaŋ sian'adawana ayi', bɛɛ na'adawanbibis ayi' kɛn Zugsɔb la tuon na, La'asʋg Fuug Sʋgʋr la za'anɔɔrine zaŋi li tis maanmaan la, 15 ka maanmaan la na zaŋi ba maal maan, ka yinne an tʋʋmbɛ'ɛd maan ka onɛ kpɛlim la an nyu'or maan. Ala ka maanmaan la na maal suguru maannɛ tis dau la Zugsɔb la tuon bʋnkanɛ yuodi o tuon la yɛla.
16 “Ka dau daulim ya'a duoe ka li ku'om yina, o na sʋʋ o niŋgbiŋ wʋsa ka an dian'ad sɔbi ti paae zaamnɔɔr. 17 Bʋn kanɛ wʋsa an fuug bɛɛ gbauŋ ka o yu'oku'om la madi li, ba na pie li ku'omin ka li na an dian'adi ti paae zaam, 18 ka dau nɛ pu'a ya'a digin nɛ taaba, babayi' la wʋsa na sʋ, ka an dian'ad dimi ti paae zaam.”
Pu'a pier nɛ ziim yuob yɛla
19 Ka lɛn yɛl ye, “Pu'a ya'a nyɛɛ o nu'ug, o na an dian'ad sɔbi ti paae daba ayɔpɔi, ka sɔ' ya'a si'is o, o sɔba na lieb dian'ad sɔbi ti paae zaam. 20 O nu'ug nyɛɛb la saŋa, linɛ mɛkama linɛ ka o digini li zug, na anɛ dian'ad, ka linɛ mɛkama zug ka o zin'in mɛ na an dian'ad. 21 Ka onɛ si'isi o digisig na pie o fuud ka sʋ, ka an dian'ad sɔbi ti paae zaam, 22 ka onɛ mɛkama si'is linɛ wʋsa ka o zin'ini li zug na pie o fuud ka sʋ, ka an dian'ad sɔbi ti paae zaam. 23 Li ya'a an digisig bɛɛ bʋnkanɛ wʋsa ka o zin'ini li zug, sɔ' ya'a si'isi li, o na an dian'ad sɔbi ti paae zaam. 24 Ka pu'a ya'a nyɛ nu'ug ka dau digin nɛ o, dau la na anɛ dian'ad sɔb daba ayɔpɔi, on digin nɛ o la zug; ka digisig kanɛ zug ka o digin la mɛ na lieb dian'ad.
25 “Ziim ya'a yit pu'a tuon dabisa bɛdegʋ ka li ka' o nu'ug nyɛɛb saŋa, bɛɛ o nyɛnɛ nu'ug ka li tʋʋg saŋa kanɛ ka o ɛɛnti nyɛt la, o na anɛ dian'ad sɔb nwɛnɛ on ɛɛnti nyɛ nu'ug ka li an si'em la; 26 ka digisig kanɛ wʋsa ka o digin dabisbanɛ ka o nyɛ nu'ug la anɛ dian'ad, wʋʋ o nwadig-nwadig nu'ug nyɛɛb saŋa an si'em la, ka linɛ wʋsa ka o zin'ini li zug na anɛ dian'ad, saŋkanɛ ka o nan ka' nyain la. 27 Onɛ wʋsa si'isi ba na an dian'ad sɔb; asɛɛ ka o sʋ ka pie o fuud, ka an dian'ad sɔbi ti paae zaam. 28 Ka pu'a la ya'a lieb nyain, o na kaal daba ayɔpɔi, o nyain maan la yɛla, ka li nya'aŋ o na lieb nyain. 29 Ka daba anii la daar, pu'a la mɛŋ na zaŋ sian'adawana ayi', bɛɛ na'adawanbibis ayi' n kɛn Zugsɔb la tuon na, La'asʋg Fuug Sʋgʋr za'anɔɔrin la zaŋi li tis maanmaan la, 30 ka maanmaan la na zaŋi ba maal maan, ka yinne an tʋʋmbɛ'ɛd maan ka onɛ kpɛlim la an nyu'or maan. Ala ka maanmaan la na sɔs suguru tis o Zugsɔb la tuon, o nu'ug nyɛɛb la kɛ ka o an dian'ad sɔb la yɛla.
31 “Ya ya'a dɔlis anwana wʋsa ya na gu' Israel dim la ka ba kʋ tʋm tʋʋm kanɛ na kɛ ka ba an dian'ad dima, ka kʋ kpi ka li anɛ ban miligid mam La'asʋg Fuug Sʋgʋr kanɛ bɛɛ ba san'an la zugɔ.