Suguru sɔsʋg malʋŋ dabisir yɛla
16
1 Aaron biribis ayi' la da kpɛn' Zugsɔb la tuon ka li pʋ dɔl suorɛ ka ba kpi la nya'aŋ, Zugsɔb la da yɛl Moses ye, 2 “Yɛlimi fʋ bier Aaron ye o da kpɛn'ɛd Kasi Wʋsa Kasi zin'ikanɛ ka fuug bɛŋ ka li bɛ suguru sɔsʋg liŋ kanɛ pibil nɔnaar daka la ni yɔɔg, yɔɔgɔ, ya'a ka' ala o na kpi. Bɔzugɔ, man naanid saŋgbauŋinɛ niedi m mɛŋ anina. 3 Aaron na kpɛn' Kasi wʋsa Kasi Zin'ig la ni si'em nwa: O na mɔr na'arapɔl ka li an tʋʋmbɛ'ɛd maan nɛ pɛraug ka li an nyu'or maan. 4 O na zaŋ fupielig kanɛ an nyain ka bɛɛ li kɔn' la yɛ, ka zaŋ kurigiŋ la sɔn, ka zaŋ sɛnbidiŋi lɔɔ o siaa, ka pid zupibpielig. O na sʋ ka nyaan zaŋi li wʋsa yɛ. 5 O na di'e bʋraad ayi' Israel dim la san'an ka li an tʋʋmbɛ'ɛd maan, nɛ pɛraug ka li an nyu'or maan.6 “Aaron na zaŋ na'araug la maal o mɛŋ tʋʋmbɛ'ɛd maan ka li an suguru sɔsʋg maannɛ tis o mɛŋ nɛ o yidim wʋsa. 7 Ka zaŋ bʋʋs ayi' la zi'el Zugsɔb la tuon La'asʋg Fuug Sʋgʋr la za'anɔɔrin, 8 ka maal bʋgʋlʋm-bʋgʋlʋm bʋʋs ayi' la zugin, ka li na pa'al bʋkanɛ an Zugsɔb la din ka yinne la mɛ an bʋkanɛ ka ba na piigi bas ka li an teŋin bɔɔm. 9 Ka Aaron na zaŋ bʋkanɛ an Zugsɔb din la tis Zugsɔb la ka li an tʋʋmbɛ'ɛd maan; 10 Amaa bʋkanɛ ka ba bʋgʋlʋm gaŋ la, Aaron na zaŋi li zi'el Zugsɔb la tuon, ka li an suguru sɔsʋg maan, ka yʋ'ʋn zaŋi li bas ka li keŋ sian'arin ka an teŋin bɔɔm.
11 “Aaron na zaŋ na'araug la maal ka li aan o mɛŋ tʋʋmbɛ'ɛd ka maal suguru sɔsʋg maannɛ tis o mɛŋ nɛ o yidim la wʋsa, ka kɔdigi li ka li an tʋʋmbɛ'ɛd maannɛ tis o mɛŋ. 12 O na zaŋ bugumsaana maan daka la zug Zugsɔb la tuon, n niŋ tudaar laan, ka gbin'e bʋnnyubisa linɛ an tudaar baanlig la nu'ukukudus ayi' ka zaŋi li kpɛn' Kasi Wʋsa Kasi Zin'igin la. 13 Ka zaŋ tudaar la niŋ bugum la ni Zugsɔb la tuon, ka tudaar la nyɔ'ɔs duoe gɛɛl suguru sɔsʋg liŋ kanɛ bɛ Nɔnaar Daka la zugin la. Linɛ na kɛ ka o kʋ kpii. 14 O na zaŋ o nu'ubili tin'e na'araug la ziim misi mis suguru sɔsʋg liŋ la tuon baba, ka misig teŋin Nɔnaar Daka la tuon nɔɔra ayɔpɔi.
15 “Lin nya'aŋ o na zaŋ bʋʋg la kɔdig ka li an tʋʋmbɛ'ɛd maan nidib la yɛla, ka mɔri li ziim la kpɛn' Kasi Wʋsa Kasi Zin'ig la pʋʋgin, ka zaŋi li niŋ nwɛnɛ on maal na'araug la ziim si'em la, ka misi mis suguru sɔsʋg liŋ la zug nɛ li tuon. 16 O na maal ala sɔs suguru tis zin'ikanɛ an Kasi wʋsa Kasi la, nɛ Israel dimi ka' nyain la nɛ ba tʋbzian'asim la yɛla, ka lɛn sɔs suguru tis Fuug Sʋgʋr la wʋsa, lin bɛ nimbanɛ ka' nyain sʋʋgin la zug. 17 O ya'a kpɛn' Kasi Wʋsa Kasi zin'igin la ye o maal maan la, sɔ' da bɛ La'asʋg Sʋgʋrin la, asɛɛ ka o maali naae ka yina. Ala ka o na maali sɔs suguru o mɛŋ tʋʋmbɛ'ɛd yɛla nɛ o yidim nɛ Israel dim wʋsa tʋʋmbɛ'ɛd yɛla. 18 O yʋ'ʋn na yii keŋ maan daka linɛ bɛ zakin Zugsɔb la tuon la, ka maal suguru sɔsʋg maannɛ li zug, ka zaŋ na'araug la ziim nɛ bʋʋg la ziim, niŋ maan daka la iila la wʋsa ni. 19 O na zaŋ o nu'ubili tin'e ziim la misi-misi li nɔɔra ayɔpɔi ka li pie li nyain, kɛ ka li bɛɛ li kɔn'. Anwa ka o na niŋi pie li Israel dim la tʋm tʋʋmbɛ'ɛdi dian'a li la zug.
20 “Aaron ya'a maal suguru sɔsʋg maan la zin'ikanɛ an Kasi Wʋsa Kasi la, nɛ La'asʋg Fuug Sʋgʋr nɛ maan daka la wʋsa naae, o na mɔr bʋkanɛ vʋe la yina, 21 ka zaŋ o nu'us ayi' la wʋsa pa'al bʋʋg la zugin ka kaanb Israel dim la wʋsa tʋʋmbɛ'ɛd nɛ ba taal nɛ ba dian'ad yɛla ka li kpɛlim bʋʋg la zug, ka kɛ ka onɛ sʋ'oe li tʋʋma la mɔr o keŋ sian'arin 22 bas o anina. Ka bʋʋg la na zi tʋʋmbɛ'ɛd la wʋsa keŋ sian'akanɛ ka ninsaal kae la.
23 “Aaron yʋ'ʋn na lɛb La'asʋg Sʋgʋrin la ka yɛɛsi o fupiela banɛ ka o yɛɛn ka nyaan kpɛn' zin'ikanɛ an Kasi Wʋsa Kasi la digili li anina. 24 O na sʋ zin'ikanɛ an Kasi ka zaŋ o mɛŋ fuud la yɛ, ka yina maal nyu'or maannɛ tis o mɛŋ, ka mɛ maali tis nidib la sɔs suguru tis o mɛŋ nɛ nidib la wʋsa tʋʋmbɛ'ɛd yɛla. 25 Ka zaŋ tʋʋmbɛ'ɛd maan la kpaam nyu'oe maan daka la zug. 26 Onɛ zaŋ bʋʋg la keŋ bas ka li lieb teŋin bɔɔm la, o sɔb na pie o fuud ka sʋ, ka yʋ'ʋn lɛb la'asʋg zin'igin la na. 27 Ba na zaŋ na'araug nɛ bʋkanɛ ka ba zaŋi maal tʋʋmbɛ'ɛd maan ka mɔri ba ziim la kpɛn' zin'ikanɛ an Kasi Wʋsa Kasi sɔs suguru tʋʋmbɛ'ɛd yɛla la gbana nɛ ni'im la wʋsa nɛ li pʋd la yi yiŋi nyu'oe. 28 Ka onɛ nyu'oe li la na pie o fuud ka sʋ ka nyaan kpɛn' la'asʋg zin'igin la.
29 “Nwa' na an zi'elʋgʋ tisi ya saŋa wʋsa, nwadis ayɔpɔi la ni, li dabisa piiga la daar. Yanam nɛ saam banɛ la'am bɛ nɛ ya la na lɔ nɔɔr ka kʋ tʋm si'el daakan la, 30 bɔzugɔ daakan la maanmaan la na maal maannɛ sɔs suguru yisi ya tʋʋmbɛ'ɛd, ka kɛ ka ya an nyain Zugsɔb la tuon. 31 Li anɛ Vʋ'ʋsʋm Daare tisi ya, ka ya na sigisi ya mɛŋ ka lɔ nɔɔr; nwa anɛ zi'elkanɛ na bɛ saŋa wʋsa. 32 Maanmaan onɛ ka ba zaŋ malʋŋ kpaam bu'oe niŋ o zug ye o lieb maanmaan kpɛɛm di'e o ba' tʋʋma la na maal maannɛ sɔs suguru tisi ba tʋʋmbɛ'ɛd la yɛla. O na zaŋ fupiela linɛ bɛɛ li kɔn' la yɛ. 33 O na maal maannɛ sɔs suguru tis zin'ikanɛ an Kasi Wʋsa Kasi la, nɛ La'asʋg Fuug Sʋgʋr la wʋsa, nɛ maan daka la, ka maal maana la sɔs suguru tis maanmaannib la, nɛ nidib la wʋsa. 34 Nwa anɛ zi'elkanɛ na bɛ saŋa wʋsa tisi ya. Ka li na an maan kanɛ sɔsid suguru tisid Israel dim la wʋsa ba tʋʋmbɛ'ɛd yɛla, yʋʋm wʋsa pʋʋgin.”
Ka o niŋ nwɛnɛ Zugsɔb la zi'el si'em tis Moses la wʋsa.