Ziim kisʋg yɛla
17
1 Ka Zugsɔb la yɛl Moses ye, 2 “Pian'am tis Aaron nɛ o biribis la nɛ Israel dim la wʋsa ye Zugsɔb la yɛl si'em nwa ye, 3 ‘Israel ninkanɛ wʋsa kɔdig na'araug bɛɛ pɛ'og bɛɛ bʋʋgʋ maal maan, on da kɔdigi ya la'asʋg zin'igin la bɛɛ li yiŋa, 4 asɛɛ ka o mɔri li keŋ La'asʋg Fuug Sʋgʋr la za'anɔɔrin, ka li an maan Zugsɔb la tuon; ya'a ka' ala ninkan sɔba mɔr taal on yis ziim la zug, ba na yis o buudi la ni. 5 Linɛ sʋ'oe la anɛ ye, Israel dim kʋ lɛm maali ba maana paalʋʋ, amaa ba na zaŋi tis Zugsɔb, La'asʋg Fuug Sʋgʋr la za'anɔɔrin, ka kɛ ka maanmaan la maali tisi ba, ka li an taaba la'asʋg maana tis Zugsɔb la. 6 Maanmaan la na zaŋ ziim la mis maan daka la gilig La'asʋg Fuug Sʋgʋr la za'anɔɔrin, Zugsɔb la tuon, ka zaŋ kpaam la nyu'oe ka li an maan kanɛ malisi tis Zugsɔb la. 7 Ba kʋ lɛm maannɛ ba maana n tisid kikiris bada banɛ nwɛnɛ bʋʋs wʋʋ pu'agɔɔnda banɛ zan'asi ba sidib, ka dɔl dap si'em laa. Nwa anɛ zi'elʋgʋ tisi ba saŋa wʋsa ti paae zʋmaana banɛ na ti duoe na.’ ”8 Yɛlimi ba ye, “Ninkanɛ wʋsa an Israel buudi, bɛɛ o anɛ saan ka zaŋ nyu'or maana tis 9 ka pʋ mɔri li keŋ La'asʋg Fuug Sʋgʋr la za'anɔɔrine tis Zugsɔb la, ba na yis ninkan sɔba Israel nidib la kallin.”
10 Israel nid bɛɛ saan ya'a bɛɛ ya sʋʋgin, ka dit ziim, m sʋnf na duoe ka m yisi o sɔbi m nidib kallin. 11 Bʋnvʋr vʋm bɛ nɛ o ziim la ni, lin ka m zaŋi li tisi ya ye ya maal maan daka la ni sɔs suguru tisi ya mɛŋ la. Bɔzugɔ, li anɛ ziim linɛ an vʋm la ka ya na nɔki sɔs suguru tis ninsaal vʋm yɛla. 12 Alazug ka m da yɛl Israel dim ye, “Yanam Israel dim bɛɛ saan kanɛ bɛɛ ya sʋʋgin da di ziim. 13 Israel nid sɔ' ya'a keŋ ieeb, ka kʋ bʋnkɔnbʋg bɛɛ bʋn-ian'adir linɛ ka ya na ɔnb, on kpa'ami li ziim la pin' teŋin. 14 Bɔzugɔ bʋnvʋr wʋsa vʋm bɛ nɛ o ziimin. Lin ka m yɛl Israel dim la ye ba da di ziim, ka bʋnvʋr wʋsa vʋm bɛ nɛ o ziimin la. Onɛ wʋsa dii li, ba na yis o sɔb o nidib kallin. 15 Ninkanɛ wʋsa ɔnb bʋnkɔnbʋg kanɛ kpi, bɛɛ kɔnbkanɛ ka wɛɛgʋn bʋnkɔnbʋg kʋ, o sɔb ya'a anɛ ya mɛŋ nid bɛɛ saan, on piem o fuud la ka sʋ, ka an onɛ ka' nyainnɛ ti paae zaam ka yʋ'ʋn na an nyain. 16 Amaa o ya'a pʋ pie o fuud la ka sʋʋ o niŋgbina laa, o na mɔr taal.”