Dap nɛ pu'ab taab bɔɔb linɛ kis
18
1 Ka Zugsɔb la lɛn yɛl Moses ye o 2 yɛlim Israel dim la ye: Man Zugsɔb la aan ya Wina'am. 3 Mid ka ya tʋm wʋʋ yanamɛ daa bɛ Egipt teŋin ka ba tʋm si'em la. Mid ka ya mɛ tʋm wʋʋ teŋ kanɛ buon Keenan ka m ye m mɔri ya keŋ la. Kʋdim da tʋmi ban tʋm si'em la baa bi'elaa. 4 Di anɛ tilas ye ya siaki m wada la ka tʋmi m nɔzi'ela la. Manɛ aan ya Zugsɔb Wina'am la. 5 Manɛ aan ya Zugsɔb la, dinzug, dɔllini m nɔzi'ela nɛ m wada la. Onɛ wʋsa siaki tʋm din yɛl si'el la na nyɛ nyɔvʋri li dɔllim pʋʋgin.6 Mid ka ya sɔ' digin nɛ o du'ad. Manɛ an Zugsɔb la. 7 Mid ka fʋ nɛ'ɛsi fʋ saam ka digin nɛ fʋ ma, ka fʋ ya'a niŋ ala fʋ na diis o nyan. Li pʋ nar ye fʋ digin nɛ fʋ maa. 8 Mid ka fʋ mɛ digin nɛ fʋ saam pu'a sɔ', bɔzugɔ fʋ ya'a niŋ ala fʋ na diisi fʋ saam nyan. 9 Mid ka fʋ digin nɛ fʋ taʋn, o ya'a anɛ fʋ saam biig bɛɛ fʋ ma biiga, ba ya'a du'a o nɛ yin bɛɛ zin'isi'a wʋsa. 10 Da digin nɛ fʋ biribiŋ pu'ayua bɛɛ fʋ pu'ayua biiga, ka li na an zufa'asim tisif. 11 Mid ka fʋ digin nɛ fʋ ma nintaa bipuŋ onɛ ka fʋ saam du'a, bɔzugɔ o anɛ fʋ taʋn. 12 Da digin nɛ fʋ saam taʋn, bɔzugɔ o anɛ fʋ pugidib ka on nɛ fʋ saam an ziim yinne. 13 Da digin nɛ fʋ ma bier bɛɛ o pitʋ, bɔzugɔ ban nɛ fʋ ma la anɛ du'am. 14 Mid ka fʋ digin nɛ fʋ saam kpɛɛm pu'a bɛɛ fʋ saambil pu'a. Fʋ ya'a niŋ ala li na diisi ba nyan, bɔzugɔ ba anɛ fʋ du'adib. 15 Mid ka fʋ digin nɛ fʋ bipu'a, bɔzugɔ o anɛ fʋ biig pu'a. 16 Mid ka fʋ digin nɛ fʋ bier bɛɛ fʋ pitʋ pu'a, ka fʋ ya'a niŋ ala fʋ na diisi fʋ bier bɛɛ fʋ pitʋ la nyan. 17 Mid ka fʋ digin nɛ pu'a ka mɛ lɛn digin nɛ o pu'ayua. Mɛ da digin nɛ o biribiŋ bɛɛ o bipuŋ pu'ayua, bɔzugɔ ba du'am pʋ laligɛ. Li anɛ bʋn linɛ bi'e hali. 18 Mid ka fʋ nɔki fʋ pu'a bier bɛɛ o pitʋ ka o liebi o nintaa ka fʋ mɔr o dig ka fʋ pu'a nam vʋe.
19 Mid ka fʋ digin nɛ pu'a kanɛ nan nyɛ nu'ug saŋa kanɛ ka o ka' nyain la. 20 Mid ka fʋ digin nɛ fʋ tiraan pu'a bɔzugɔ, li na kɛ ka fʋn nɛ pu'a la wʋsa lieb dian'ad dim. 21 Mid ka fʋ zaŋi fʋ biigi tis ye ba nyu'oe o maal maannɛ tis win kanɛ ka ba buon ye Molek la, ka fʋ na san'am Wina'am yʋ'ʋr. Manɛ an Zugsɔb la. 22 Mid ka fʋ digin nɛ fʋ dau tiraan wʋʋ ban dig nɛ pu'ab si'em la, ka li anɛ tʋʋmfɛn'ɛsʋg. 23 Mid ka dau digin nɛ bʋnkɔnbʋgʋ dian'a o mɛŋ. Pu'a mɛ da zaŋ o mɛŋi tis bʋnkɔnbʋg ka o bɔɔ o, bɔzugɔ li anɛ tuugir ka pʋ tu'al baa bi'ela.
24 Mid ka ya san'ami ya mɛŋ nɛ tʋʋm bama, bɔzugɔ buudbanɛ ka m ye m kadi ba yis ka tisi ya teŋ la tʋmnɛ tʋʋm bama san'ami ba mɛŋ. 25 Ala nɔɔ ka ba daa niŋi san'am teŋ la hali ka m tɛɛgi ba tʋbir ka kadi ba yis teŋin la. 26 Amaa asɛɛ ka ya dɔlli m nɔzi'ela nɛ m wada la wʋsa. Mid ka yanam banɛ an Israel dim bɛɛ saam banɛ la'am bɛ nɛ ya la maal bʋn banɛ kis nwa. 27 Bɔzugɔ, nimbanɛ da bɛ teŋin la da tʋm tʋʋm bama wʋsa ka li kɛ ka teŋ la lieb dian'ad. 28 Ya ya'a zan'as ka kɛ ka teŋ la dian'a, li na tʋbisi ya yis wʋʋ banɛ da dɛŋin bɛɛ ani la. 29 Ka onɛ wʋsa tʋm tʋʋmfɛn'ɛsbama nwa, ban yisim ninkan sɔba o nidib kallin. 30 Dinzugɔ, dɔlli mam bɔɔd si'em la ka da dɔlli nimbanɛ da dɛŋin bɛɛ ani tʋm tʋʋmfɛn'ɛs-sieba ka yanam nyaan kenna la. Da dian'a ya mɛŋ nɛ tʋʋm banɛ. Manɛ aan ya Zugsɔb Wina'am la.