Pʋpielim tʋʋma la yɛla
19
1 Ka Zugsɔb la yɛl Moses ye, 2 “Yɛlim Israel nidib la wʋsa ye, ‘Aaɛn kasi, bɔzugɔ, mam Zugsɔb onɛ aan ya Wina'am la anɛ kasi. 3 Ka sɔ' mɛkama na tis o ma nɛ o saam na'asi ka dɔllisi m Vʋ'ʋsʋm Daar la sʋ'ʋŋa. Manɛ aan ya Zugsɔb Wina'am la. 4 Mid ka ya bas mam ka dɔlli bada, bɛɛ nɔk kʋnti maal bʋnsi'a tisi ya mɛŋa. Manɛ aan ya Zugsɔb Wina'am la.’ ”5 Ya ya'a ye ya maal taaba la'asʋg maannɛ tis Zugsɔb la, yanam maali li lin nar si'em ka o di'e ya maan la. 6 Ya na dii li daakanɛ ka ya maal maan la, nɛ bɛkanɛ nied la, amaa linɛ kpɛlim la, ya na nyu'oe li bugum dabis atan' daar. 7 Amaa ya ya'a di dikanɛ kpɛlim daba atan' daar la, li ka' nyainnɛ ka Zugsɔb la kʋ di'e maan la. 8 Onɛ mɛkama dii li na nyɛ yɛltɔɔd, bɔzugɔ, o san'am bʋnsʋŋ linɛ an kasi tis Zugsɔb la. Asɛɛ ka ba yis ninkan sɔba o nidib kallin.
9 Ya ya'a ɛɛnti bunni ya pɔɔd zʋʋd, yanam da bunni paad titɔndigin bɛɛ buni naae ka lɛn wi'isɛ. 10 Mid ka ya pɔn' ya vain tiis pɔɔd wala tak bɛɛ pi'is banɛ li teŋin la, amaa ya na kɛɛ li ka nɔŋ dim nɛ saam mɛ paam. Manɛ aan ya Zugsɔb Wina'am la.
11 Da zuu, bɛɛ tʋm ziri tʋʋma, bɛɛ pan'asidi taaba. 12 Da mɔri m yʋ'ʋri pɔɔd ziri pɔɔr ka li kɛ ka ya san'ami ya Wina'am yʋ'ʋrɛ. Manɛ an Zugsɔb la.
13 Da zammi fʋ tiraan bɛɛ faaɛn o. Sɔ' ya'a tʋm tisif, fʋn da kɛ ka o yɔɔd kpɛlimi fʋ san'anɛ nie bɛogɔ. 14 Da pɔ nɔɔri tis tʋbkpida bɛɛ nɔk linɛ ka nid na tu'ugi digil zu'om suorinɛ. Amaa fʋ na tisi fʋ Wina'am na'asi; manɛ an Zugsɔb la.
15 Mid ka ya kad saria nɛ zam ka tis nɔŋdaan bʋʋd on an tadim la zug bɛɛ zɔ kpi'em nif ka tis o bʋʋdɛ. Amaa kadimi fʋ tiraan saria din nar si'em. 16 Da ginnɛ ma'ad ziri tisidi fʋ taaba, bɛɛ di ziri kasɛt ka ba kʋʋ fʋ tiraan zaalim-zaalim. Manɛ aan ya Zugsɔb la.
17 Da kisi fʋ ba'abiigi fʋ sʋnfʋnɛ; fʋ tiraan ya'a tʋm linɛ pʋ nara fʋn yɛl o nyain ka ala ka fʋn nɛ on kʋ la'am kpɛn' taalinɛ. 18 Sɔ' ya'a maalif bɛ'ɛd fʋn da lɛbis o bɛ'ɛd bɛɛ gɛn'ɛd nɛ o sɔba. Amaa fʋ na nɔŋi fʋ tiraan wʋʋ fʋn nɔŋi fʋ mɛŋ si'em la. Manɛ an Zugsɔb la. 19 Dɔlli nɛ m nɔzi'ela nwa. Da kɛ ka bʋnkɔnbid banɛ ka' buudi yinne dʋ taabaa. Da bʋd bʋmbʋʋda buudi ayi' pɔɔg yinne nii. Da yɛ fukanɛ ka ba nɔk gum buudi ayi' ʋgɛ.
20 Sɔ' ya'a digin nɛ pu'a kanɛ an yammʋg ka ba zaŋ o tis dau ye o liebi o pu'a, ka o nam pʋ yɔɔ o sam bɛɛ digin nɛ o, asɛɛ ka ba tɛɛg dau la nɛ pu'a la tʋbir. Li pʋ sʋ'ʋm ye ba kʋʋ ba, bɔzugɔ pu'a la nan pʋ sʋ'oe o mɛŋa. 21 Amaa di nar ye dau la mɔr pɛraug na maal taal maannɛ tis Zugsɔb la, La'asʋg Fuug Sʋgʋr za'anɔɔrin la. 22 Ka maanmaan la na nɔk taal maan pɛraug la maal Zugsɔb la tuon, o tʋʋmbɛ'ɛd linɛ ka o maal la yɛla, ka sɔs suguru tis o ka Zugsɔb na kɛɛ o taali bas.
23 Ya ya'a kpɛn' teŋin la bʋd tiwanna buudi wʋsa ka ba pin'il walib, ya na kisi ba wala la yʋma atan' ka kʋ dii lii. 24 Ka yʋʋm kanɛ paasid anaasi la, ba wala wʋsa na an kasi, ka an bareka pʋ'ʋsim piini tis Zugsɔb la. 25 Amaa yʋma anu la ni, ya na di wala la. Ala ka ba na wal wala pamm. Manɛ aan ya Zugsɔb Wina'am la.
26 Ya da ɔnb ni'im linɛ mɔr ziim. Mɛ da tʋmmi sɔnpʋt tʋʋma bɛɛ bʋgʋd ba'akɔnnɛ. 27 Ya da gin'e ya zug, bɛɛ ya tieŋa. 28 Ya da kisi ya mɛŋ niŋgbina nid onɛ kpi zugɔ, bɛɛ kisi ya niŋgbina gʋl si'elnama. Manɛ an Zugsɔb la.
29 Mid ka fʋ kɛ ka fʋ pu'ayua tʋm pu'agɔɔndir tʋʋma ka san'ami o yʋ'ʋr, ka teŋ la lieb pu'agɔɔnda teŋ, ka pɛ'ɛl nɛ tʋʋmbɛ'ɛdɛ. 30 Dɔllisiminɛ m Vʋ'ʋsʋm Dabisa la ka na'asidi m pʋ'ʋsim zin'ig la. Manɛ an Zugsɔb la.
31 Ya da fɛndigi ken ba'abʋgʋdib nɛ tima dim san'anɛ. Ya ya'a niŋ ala, ya na ganlimi ya mɛŋ. Manɛ aan ya Zugsɔb Wina'am la.
32 Tisimi ya kpɛɛmnam nɛ bʋnkʋt na'asi, ka zɔti ya Wina'am la. Manɛ an Zugsɔb la.
33 Teŋ zʋŋ nid ya'a bɛ nɛ yaa ya teŋin la, yanam da tʋm o linɛ an bɛ'ɛdɛ. 34 Teŋ zʋŋ nid ya'a bɛɛ ya san'an yanam maalim o wʋʋ teŋin biig nɛ. Ka nɔŋ o wʋʋ yanamɛ nɔŋi ya mɛŋ si'em; ka yanam mɛ da anɛ saam Egipt teŋin. Manɛ aan ya Zugsɔb Wina'am la.
35 Ya ya'a kpiisid yanam da mɔr makir lauk kanɛ pʋ paae makid wa'alim, bɛɛ tɛbisim bɛɛ linɛ zu'oe. 36 Li sʋm ye ya mɔr taslaas nɛ kuribanam nɛ la'abanɛ wʋsa ka ya na mɔri ma'ad la'ad la makid wʋʋ din nar si'em. Manɛ aan ya Zugsɔb Wina'am onɛ mɔri ya yis Egipt teŋin na la.
37 Ya na dɔlli m nɔzi'ela nɛ m wada la wʋsa, ka tʋmi li wʋsa. Manɛ aan ya Zugsɔb la.