Tʋʋmbɛ'ɛd namisʋg yɛla
20
1 Ka Zugsɔb la yɛl Moses ye o 2 yɛlim Israel dim la, ye ninkanɛ wʋsa an Israel nid, bɛɛ teŋ zʋŋ nid onɛ bɛ Israel teŋin ya'a nɔk o biigi kaanbi tis Molek Win la, ban kʋʋm o sɔba. Nimbanɛ bɛ teŋin la na lɔb o nɛ kugaa kʋ. 3 Mam mɛ na bid o kʋdʋg, ka yis o Israel nidib kallin, bɔzugɔ, o zaŋ o biribis sieba kaanbi tis Molek linɛ na dian'a m Fuug Sʋgʋrin la, ka san'ami m yʋ'ʋr kanɛ an kasi la. 4 Ka teŋ la nidib ya'a nyɛ ka dau sɔ' nɔk o biigi kaanbi tis Molek ka sin ka pʋ kʋʋ o, 5 mam mɛŋ na zab nɛ dau la nɛ o yidim wʋsa ka yis on nɛ nimbanɛ wʋsa dɔl o kaanbid Molek la ba nidib kallin.6 Ka onɛ pʋ bɛɛ m san'anɛ ka dɔl ba'abʋgʋdib nɛ tima dimi tʋm nwɛnɛ pu'agɔɔndir nɛ, m na fɛndigi m nindaa o san'an, ka na yis o sɔba o nidib kallin. 7 Maalimi ya mɛŋ nyain ka an kasi, bɔzugɔ manɛ aan ya Zugsɔb Wina'am la. 8 Dɔllini m wada nɛ m nɔzi'ela la ka tʋmi ba. Manɛ an Zugsɔb onɛ maannɛ ya ka ya an kasi la. 9 Ka sɔ' ya'a pɔ nɔɔri tis o saam bɛɛ o ma, ban kʋʋm o ka o taal bɛɛ o mɛŋ zug, on pɔ nɔɔri tis o saam bɛɛ o ma la zug.
10 Dau sɔ' ya'a san'am o tiraan pu'a, pu'a la nɛ dau la wʋsa anɛ ba kʋʋ ba. 11 Dau sɔ' ya'a digin nɛ o saam pu'a, o diisi o saam nyan. Asɛɛ ka ba kʋʋ babayi' la, ka ba taal na bɛɛ ba mɛŋ zugin. 12 Ka dau sɔ' ya'a digin nɛ o bipu'a, babayi' la nar ye ba kʋʋ ba, bɔzugɔ li anɛ tuugir ka pʋ tu'al baa bi'elaa. Ba taal na bɛɛ ba mɛŋ zugin. 13 Ka dau sɔ' ya'a digin nɛ o dau tiraan wʋʋ ban digi nɛ pu'ab si'em la, babayi' la wʋsa tʋm dian'ad, li nar ye ba kʋʋ ba, ka ba taal bɛɛ ba mɛŋ zugin. 14 Ka dau sɔ' ya'a di pu'a nɛ o ma, li anɛ pu'asan'auŋ, dau la nɛ pu'ab la nar ye ba nyu'oe ba nɛ bugum, ala na kɛ ka pu'asan'auŋ nwa kʋ lɛm bɛɛ ya sʋʋginɛ. 15 Ka dau sɔ' ya'a digin nɛ bʋnkɔnbʋg, li nar ye ba kʋʋ o, ka mɛ kʋ bʋnkɔnbʋg la. 16 Ka pu'a sɔ' ya'a zaŋ o mɛŋi tis bʋnkɔnbʋg ka o dʋʋ o, ban kʋʋm pu'a la nɛ bʋnkɔnbʋg la wʋsa. Li nar ye ba kʋʋ ba, ka ba taal bɛɛ ba mɛŋ zug.
17 Ka dau sɔ' ya'a dii o taʋn onɛ aan o saam pu'ayua bɛɛ o ma pu'ayua ka digin nɛ o, li anɛ zufa'asim. Asɛɛ ka ba kadi ba yisi ba nidibin. Dau la san'am o taʋn la zug, o taal bɛ nɛ o mɛŋ zugin. 18 Ka dau sɔ' ya'a digin nɛ pu'a kanɛ nyɛ nu'ug, o pa'al nɛ pu'a la nyan ka pu'a la mɛ bas o mɛŋ biel. Yisiminɛ babayi' la ya nidib kallin. 19 Mid ka fʋ digin nɛ fʋ ma bier bɛɛ o pitʋ, bɛɛ fʋ saam taʋn, bɔzugɔ li san'am nɛ du'am. Ya ya'a niŋ ala, taal bɛɛ ya babayi' la zugin. 20 Ka dau sɔ' ya'a digin nɛ o saam kpɛɛm bɛɛ o saambil pu'a, o sɔba diisi o saamnam bɛɛ o manam la nyan. Taal na bɛɛ ba zug; ba na kpi hali ka kʋ du'a biiga. 21 Dau sɔ' ya'a digin nɛ o bier pu'a bɛɛ o pitʋ pu'a, li anɛ dian'ad, o diis o bier bɛɛ o pitʋ la nyan. Ba kʋ du'a biiga.
22 Dinzugɔ, tɛnri ka tʋmmi m nɔzi'ela nɛ m yɛla, ka teŋ kanɛ ka m mɔri ya keŋ ye ya zin'in la da tiin ya basɛ. 23 Mid ka ya dɔlli malima banɛ ka teŋ la dim dɔl ka m ye m kadi ba yisi ya nini ni la. Ba tʋʋm bama nwa zug ka m sʋʋnr duoe nɛ ba hali. 24 Amaa mam mɛŋi yɛli ya ye ya na sʋ'ʋg teŋ la; m mɛŋi ye m zaŋi tisi ya ka li liebi ya faar. Li anɛ teŋ kanɛ ka siind nɛ bin'isim pʋbid.a Manɛ aan ya Zugsɔb Wina'am onɛ wɛligi ya yis nidib wʋsa sʋʋgin la. 25 Dinzugɔ, li bɔɔd ye ya wɛlig bʋnkɔnbid banɛ an nyain nɛ banɛ ka' nyain nɛ. Ka wɛlig bʋn-ianda banɛ an nyain nɛ banɛ ka' nyain nɛ. Da ganlimi ya mɛŋ nɛ bʋnkɔnbid bɛɛ bʋn-ianda bɛɛ bʋnkanɛ vuud teŋgbauŋʋn ka m wɛligi tisi ya ye ba ka' nyain la. 26 Bɛɛi kasi tis mam, ka mam Zugsɔb la anɛ kasi; ka manɛ gaŋi ya ka ya bɛɛ ya kɔn' nɛ buudi wʋsa ye ya an mam din. 27 Dau bɛɛ pu'a onɛ tʋm ba'abʋgʋdib tʋʋma, bɛɛ sɔntʋʋma ban kʋʋm o. Ba lɔmmi ba nɛ kuga kʋ, ka ba taal na bɛɛ ba mɛŋ zugin.