Zi'ela banɛ ka maanmaan na dɔl
21
1 Ka Zugsɔb la yɛl Moses ye, “Yɛlim maanmaannib banɛ an Aaron biribis la ye, ba du'ad ya'a kpi ban da si'is kum la ka lieb dian'ad dima. 2 Amaa li ya'a anɛ o nid tan-tan nwɛnɛ o ma, bɛɛ o saam, bɛɛ o biribiŋ bɛɛ o bipuŋ, bɛɛ o bier bɛɛ o pitʋ, 3 bɛɛ o taʋn onɛ ka' sida ka o gɔsid o. On zug, o na tun'e lieb dian'ad sɔb. 4 Amaa o da dian'a o mɛŋi o pu'a kpin sɔ' kum yɛlaa. 5 Li pʋ sʋm ye maanmaannib pʋni ba zut, bɛɛ kɔɔnsi ba tieŋ, bɛɛ kisi ba niŋgbiŋ zin'isieba. 6 Sɛɛ ba an kasi tisi ba Wina'am, ka da san'ami ba Wina'am la yʋ'ʋrɛ. Ban an banɛ zaŋid nyu'or maannɛ tisid Wina'am, nɛ o diib la zug, li bɔɔd ye ba an kasi tis Wina'am. 7 Maanmaannib mid ka ba di pu'a kanɛ nan mi' an pu'agɔɔndir, bɛɛ pu'a kanɛ bas o sid, bɔzugɔ, ba anɛ kasi tisi ba Wina'am la. 8 Gɔsimi ba ka ba an kasi tis Wina'am, bɔzugɔ banɛ zaŋidi ya Wina'am diib la tisid o. Bɔzugɔ, man onɛ aan ya Zugsɔb la anɛ kasi ka mɛ maannɛ ya ka ya an kasi. 9 Ka maanmaan sɔ' pu'ayua ya'a san'ami o mɛŋ, ka lieb pu'agɔɔndir, o san'am nɛ o saam la zug, ba nɔkim o nyu'oe nɛ bugum.10 “Ka maanmaan onɛ an kpɛɛm, ka ba gaŋ o, o ba'abiisin la ka bu'oe malʋŋ kpaam niŋ o zug, ka lɛn gaŋ o ka o na yɛ fuud la, o da bas o zuobid ka li zunnim bɛɛ aans o fuud sʋnsa'aŋ zugɔ. 11 O da si'is kum bɛɛ o san'ami o mɛŋa, hali baa li ya'a anɛ o saam bɛɛ o maa. 12 O da yi ka bas Fuug Sʋgʋr la, bɛɛ san'ami li, bɔzugɔ, ba bu'oe Wina'am malʋŋ kpaam niŋ o zug ka o lieb kasi. Manɛ an Zugsɔb la. 13 O dim pu'a kanɛ nan zi' dau. 14 O da di pʋkɔɔnr, bɛɛ pu'a kanɛ bas o sid bɛɛ onɛ sidi bas o, bɛɛ onɛ an pu'agɔɔndirɛ; amaa o dim pu'asadir onɛ nan zi' dau, ka yii o mɛŋ nidibin na. 15 Ala ka o kʋ diis o biis nyannɛ o nidib sʋʋginɛ; manɛ an Zugsɔb onɛ maal o kasi la.”
16 Ka Zugsɔb la da lɛn yɛl Moses ye, 17 “Yɛlim Aaron ye sɔ' ya'a mɔr dɛŋi fʋ biribis bɛɛ fʋ yaas la sʋʋgin, on da mɔr maan linɛ an diib naa tis o Wina'am. 18 Ninkanɛ wʋsa mɔr dɛŋ da li'el naa. O ya'a anɛ zu'om bɛɛ wabʋg bɛɛ onɛ nindaa mɔr dɛŋ bɛɛ o lɔsi'a san'am, 19 bɛɛ dau onɛ nɔbiri wabilim, bɛɛ o nu'ugʋ gɔŋ, 20 bɛɛ onɛ kɔ' sakpanlʋŋ bɛɛ digir, bɛɛ on nif bɛɛ o niŋgbina mɔr wiim buudi wʋsa, bɛɛ onɛ ka ba zan' o. 21 Aaron onɛ an maanmaan la yaas la sʋʋgin, onɛ mɔr dɛŋ da li'el na maal maan linɛ nyu'od bugum tis Zugsɔb la. On mɔr dɛŋ la zug, li pʋ sʋm ye o li'el na zaŋ diib la tis Wina'am. 22 O na tun'e dii o Wina'am la diib linɛ an kasi wʋsa kasi la nɛ linɛ an kasi la wʋsa. 23 Amaa on mɔr dɛŋ la zug, o da kpɛn' Fuug Sʋgʋrin paae fukanɛ bɛŋ la, bɛɛ li'el maan daka la; ala ka o kʋ san'ami m zin'ibanɛ an sʋ'ʋŋa la. Bɔzugɔ, manɛ an Zugsɔb onɛ maannɛ ba kasi la.” 24 Ala ka Moses da pian' tis Aaron nɛ o biribis nɛ Israel dim wʋsa.