Maan piini na an kasi si'em
22
1 Ka Zugsɔb la da lɛn yɛl Moses ye, 2 “Yɛlim Aaron nɛ o biribis la ye ba tisim maana banɛ an kasi ka Israel biribis la mɔri li na tisid mam Zugsɔb la girima. Linɛ na kɛ ka ba kʋ san'ami m yʋ'ʋr kanɛ an kasi la. Manɛ an Zugsɔb la. 3 Yɛlimi ba ye, ba dɔɔg ninkanɛ wʋsa ka' nyainnɛ ka ti li'el maan banɛ an nyain ka Israel dim zaŋi tis Zugsɔb la, m na yis ninkan sɔba m san'an. Mam anɛ Zugsɔb la. 4 Aaron yaaŋ ya'a mɔr niŋgbina san'auŋ ban'as, bɛɛ mɛt ya'a yiti o niŋgbina ni na, o da di maan piini diib linɛ an nyain la, asɛɛ ka ba maal o ka o lieb nyain. Sɔ' mɛ ya'a si'is bʋn linɛ kpi wʋsa, bɛɛ o daulim ku'om ya'a yit, 5 bɛɛ o ya'a si'is bʋnkanɛ vuudi o pʋʋr teŋ linɛ na kɛ ka o kʋ an nyainnɛ, bɛɛ dau sɔ' onɛ an dian'ad sɔb, ka mɔr dian'ad buudi wʋsa linɛ na dian'a maanmaan la. 6 Onɛ si'is nɛ'ɛnam wʋsa kʋ an nyainnɛ hali ti paae zaamnɔɔr. Ka mɛ da di maana kanɛ an nyain laa, ya'a ka' o ti sʋ ku'om. 7 Amaa zaam ya'a ma'ae, o na an nyain ka li nya'aŋ ka o nyaan di dikanɛ an nyain la, bɔzugɔ, li anɛ o diib. 8 O da ɔnb bʋnkɔnbkpiilʋŋ, bɛɛ bʋnkɔnbʋg kanɛ ka o bʋnkɔnbtiraan kʋʋ, ka li ka' nyainnɛ; mam anɛ Zugsɔb la. 9 Ba siakim tʋm linɛ ka m zi'el la, linɛ na kɛ ka ba kʋ tʋm tʋʋmbɛ'ɛd ka kpii. Manɛ an Zugsɔb onɛ kɛt ka ba an kasi la.10 “Onɛ ka' maanmaan la dɔɔg nid da di dikanɛ an maan la diibɔ, hali li ya'a anɛ maanmaan la saan bɛɛ o tʋmtʋm, on da dii lii. 11 Amaa maanmaan ya'a da' o sankpan'as nɛ ligidi bɛɛ sankpan'as kanɛ ka ba du'a o yin, ba mɔr suor ye ba dii o diib la. 12 Maanmaan la bipuŋ ya'a kul onɛ ka' maanmaan la dɔɔg nid, o da di dikanɛ an piinkanɛ an nyain laa. 13 Ka maanmaan bipuŋ sɔ' ya'a lieb pʋkɔɔnr, bɛɛ o yinɛ ka bas o sid, ka pʋ mɔr biiga, ka lɛbi o saam yin wʋʋ on da nam pʋ kul dau saŋsi'a la, o na tun'e di o saam diib la; amaa onɛ pʋ yi maanmaan dɔɔgin da dii lii. 14 Ka dau sɔ' ya'a di maan piinkanɛ an nyain la ka li anɛ ye o pʋ baŋɛ, o zaŋim linɛ na zemis piinkanɛ an nyain la tis maanmaan la, ka zaŋi li pʋdigir anu ni yinne paas. 15-16 Ba da kɛ ka banɛ ka' suori na di piini dikanɛ an nyain ka Israel dim zaŋi tis Zugsɔb la. Ba ya'a niŋ ala ba na san'ami li ka kpɛn' taalin ka nyɛ namisʋg. Manɛ an Zugsɔb onɛ kɛt ka ba an kasi la.”
Maan bʋnkɔnbidi na an sʋm si'em
17 Ka Zugsɔb la da lɛn yɛl Moses ye, 18 “Yɛlim Aaron nɛ o biribis nɛ Israel dim la wʋsa ye, ‘Onɛ wʋsa an Israel nid, bɛɛ saan onɛ bɛ Israel dim sʋʋgin ka ye o zaŋ o piini tis, ka li ya'a anɛ o pʋ'ʋlʋmnɛ zi'el bɛɛ ya'amlɛog maan ka ba ye ba zaŋi tis Zugsɔb ka li an nyu'or piini, 19 on zaŋim bʋndaug linɛ ka' dɛŋi tis, ka li yi o niigi ni na bɛɛ o pɛ'ɛsin nɛ o bʋʋsin. 20 Da zaŋ bʋn linɛ wʋsa mɔr dɛŋi maal maannɛ, ka li kʋ di'e. 21 Sɔ' ya'a maal nɛ taaba la'asʋg maannɛ tis Zugsɔb la ye o lɛbis on pʋ'ʋlʋm zi'el la, bɛɛ ya'amlɛog piini, li ya'a anɛ bʋnkɔnbʋg buudi wʋsa, li sʋm ka li an sʋ'ʋŋa ka ka' dɛŋŋa; ya'a ka' ala, li kʋ di'e. 22 Da zaŋ linɛ ka o nini zu'om bɛɛ linɛ mɔr dɛŋ bɛɛ gbɛlʋŋ si'a wʋsa bɛɛ linɛ pu'alim bɛɛ mɔr fɛn'ʋg bɛɛ isa maal maannɛ tis Zugsɔb laa. Mid ka ya zaŋ bʋnkɔnbbama taaba niŋ maan daka la zug ye ya maal nyu'or maannɛ tis Zugsɔb la. 23 Ya na tun'e nɔk naaf bɛɛ pɛ'og kanɛ wabilim bɛɛ pʋ nɔbigi paae lin nar si'em maal ya'amlɛog piini maan, amaa ya ya'a nɔk bʋnkɔnbban taaba maal maan kanɛ ka ya pʋ'ʋlʋm zi'elɛɛ, li kʋ di'e. 24 Da zaŋi bʋnkɔnbkanɛ ka ba zan' o bɛɛ li mɔr dɛŋ bɛɛ fɛn'ɛdi maal maannɛ tis Zugsɔb la. Mid ka ya maal lina ya mɛŋ teŋin. 25 Ya mɛ da di'e bʋnkɔnbbama taaba teŋ zʋŋ nid san'anɛ maali maan kanɛ an diib maannɛ tisi ya Wina'am la. Ban mɔr dɛŋ la zug, ba kʋ di'e baa.’ ”
26 Ka Zugsɔb la da lɛm pian' tis Moses ye, 27 “Naaf bɛɛ pɛ'og bɛɛ bʋʋg ya'a du'a, li sʋm ye li bɛ nɛ o ma la daba ayɔpɔi. Ka daba anii la fʋ tun'e zaŋ bʋmbil la maal nyu'or maannɛ tis Zugsɔb la ka o na di'e. 28 Li ya'a anɛ na'anya'aŋ bɛɛ pɛnya'aŋ, da zaŋ o kɔdig nɛ o biig daar yinne. 29 Fʋ ya'a maannɛ piinkanɛ anɛ bareka pʋ'ʋsʋg maan, fʋn maalimi li lin nar si'em ka Wina'am na di'e tisif. 30 Asɛɛ ka ya ɔnbi li daar kan la wʋsa ka si'el da kpɛlim ka bɛog nie; manɛ an Zugsɔb la.