Vʋ'ʋsʋm yʋʋm la yɛla
25
1 Zugsɔb la da yɛl Moses Sinai Zuor la zug ye, 2 “Yɛlim Israel dim la ye, ‘Ya ya'a ti kpɛn' teŋ kanɛ ka m bɔɔd ye m tisi ya la, nwɛnɛ yanamɛ mɔr Vʋ'ʋsʋm Dabisir si'em la, li anɛ tilas ye teŋ la mɛ mɔr vʋ'ʋsʋm saŋa tis Zugsɔb la. 3 Yʋma ayuobʋ ka ya na bʋdi ya pɔɔd la, ka pɛsidi ya vain pɔɔd la maal ka pɔn'ɔdi la'asidi li wala la. 4 Amaa yʋʋm kanɛ paasid ayɔpɔi la na anɛ vʋ'ʋsʋm yʋʋme tis teŋ la. Li anɛ vʋ'ʋsʋm saŋa tis Zugsɔb la. Da bʋdi ya pɔɔd la bɛɛ ya maali pɛsi ya tiwanna yʋʋm kan la. 5 Yanamɛ pʋ kuod la, kiyɛɛd ya'a yi, yanam da buni li suu ya bʋya nii, ka yanamɛ pʋ pɛsid tiwanna la, walyɛɛd ya'a bɛ yanam mɛ da pɔn' ba kuosɛ. Pɔɔd la sʋm ka ba vʋ'ʋs yʋʋm yinne. 6 La'am nɛ wala, vʋ'ʋsʋm yʋʋm la, bʋn linɛ wʋsa bɛ teŋin la yii li mɛŋ na anɛ diibi tis yanam nɛ ya yidim, nɛ ya sankpan'as dap nɛ pu'ab, ya tʋmtʋmnib, nɛ saam banɛ bɛ nɛ ya la. 7 La'am nɛ ya yin bʋnkɔnbid la nɛ sian'arin bʋnkɔnbid banɛ bɛ teŋin la. Zʋʋd wʋsa linɛ yi teŋin la na anɛ diibi tisi ya.’ ”Malʋŋ di'ema yʋʋm
8 “Kaalimi vʋ'ʋsʋm yʋma la ayɔpɔi-pɔi zin'isa ayɔpɔi, ka vʋ'ʋsʋm yʋma ayɔpɔi zin'isa ayɔpɔi la na la'asi an yʋma pisnaasi nɛ awai. 9 Nwadkanɛ paas ayɔpɔi la dabpiiga daar ka ya na pieb na'atana ya teŋin la zin'ig wʋsa. Dabiskanɛ an Suguru Sɔsʋg Malʋŋ la daar, piebimi na'atana zin'ig wʋsa teŋ la zug. 10 Maalimi yʋʋm kanɛ paas pisnu la ka li an kasi tis Zugsɔb la, ka mɔɔli tis teŋ la nidib wʋsa yɔlisim yʋʋm la yɛla. Li anɛ malʋŋ di'ema tisi ya, ka sɔ' wʋsa na lɛbi o mɛŋ paalʋ ni nɛ o yidimin nɛ o tuŋ dimin. 11 Yʋʋm pisnu saŋa la na anɛ malʋŋ linɛ ka ya na maal di'ema. Yanamɛ pʋ kuod la, kiyɛɛd ya'a bɛ, yanam da buni lii suu ya bʋya nii, ka yanamɛ pʋ pɛs tiwanna la, walyɛɛd ya'a bɛ, yanam mɛ da pɔn' li kuosɛ. 12 Li anɛ malʋŋ di'ema ka an kasi tisi ya. Dimi bʋn linɛ wʋsa yii li mɛŋ pɔɔdin la.
13 “Yʋʋm kanɛ an malʋŋ di'ema la, sɔ' wʋsa na lɛbi kua paalʋ kanɛ ka o sʋ'oe la. 14 Fʋ ya'a kuos paalʋ tisi fʋ teŋ nid bɛɛ fʋ da'anɛ si'eli o san'an, yanam da filim taaba. 15 Fʋ na da' li yii fʋ teŋ nid la san'an ka li dɔl wʋʋ yʋma banɛ kpɛlim malʋŋ di'ema nya'aŋ la, ka onɛ mɛ kuos ka li dɔl wʋʋ yʋma banɛ kpɛlim ka ya na bʋn zʋʋd la. 16 Yʋma la ya'a zu'oe li sʋm ka ligidi la mɛ zu'oe, amaa yʋma la ya'a pɔɔd ligidi la mɛ na sie, bɔzugɔ on kuosid si'eli tisidif la anɛ fʋn na bʋd yʋma si'em bɛn. 17 Da nɔki dinzugʋ filim taabaa, amaa zɔmini ya Wina'am la. Manɛ aan ya Zugsɔb Wina'am la.
18 “Dɔllini m gban'ar la, gu'usimi ka dɔlli m wada la tʋm ala, ka ya na bɛ nɛ laafi teŋin la. 19 Ala ka teŋ la zʋʋd na maal sʋ'ʋŋa, ka ya dii tig ka bɛ teŋ la zug ka dabiem kae.” 20 Daasi'erɛɛ ya na bu'os ye, “Ti ya'a pʋ bʋd bɛɛ bun zʋʋd yʋʋm kanɛ paas ayɔpɔi la, ti na di bɔ?” 21 M na niŋi ya bareka yʋʋm kanɛ paasi ayuobʋ la ni, ka ya pɔɔd la zʋʋd na maal ka li sia'al yʋma atan' diib. 22 Ya ya'a ti bʋd yʋʋm anii la saŋa; ya na kpɛn dit dikʋdʋg la. Hali ya na dii ala paae bunib saŋa, yʋma awai la ni.
23 “ ‘Mid ka ya kuosi paalʋ tis sɔ' ka o sʋ'oe li saŋa wʋsa bɔzugɔ, manɛ sʋ'oe teŋ la, amaa ka yanam lɛɛ bɛɛ m san'an wʋʋ saam ka guri li. 24 Teŋgbauŋ kanɛ ka ya sʋ'oe la bɛn wʋsa, ya'a nwɛnɛ sɔ' kuosi o pɔɔg, yanam maal suor ka o na tun'e yɔ ka di'e pɔɔg la.
25 “ ‘Ya nid yinne ya'a ti lieb nɔŋdaan ka kuosidi o faar, onɛ kpin nɛ o la na yɔ ka di'e li. 26 Ka onɛ kuosi o pɔɔg la ya'a pʋ mɔr sɔ' ka o kpin nɛ o ka na yɔɔ tis o, ka o mɛŋ ya'a ti paam ligidi ka yɔɔ li, 27 asɛɛ o gɛligi li ligidi gɔs on da' saŋsi'a, ka yɔ sam kanɛ kpɛlim la tis onɛ da' pɔɔg la, o ya'a niŋ ala o na nyaŋi lɛbi di'e li sʋ'oe ya'as. 28 Amaa o ya'a kʋ nyaŋi nyɛ ligidi yɔɔ, on kuos si'el la na kpɛn bɛ onɛ da' la nu'usin ti paae yʋʋm kanɛ an yʋʋm pisnu malʋŋ di'ema la. Ba na lɛbisi tis o nɛ malʋŋ di'ema la saŋa, saŋkan ka o yʋ'ʋn na lɛbi sʋ'oe o bʋn.
29 “ ‘Sɔ' ya'a kuosi o yir tempʋkanɛ ka ba mɛ zaŋguomi gilig la pʋʋgin, o mɔr suori na lɛn di'e li yʋʋm yinne saŋa. Saŋkan ya'a nam pʋ gaadɛ o na nyaŋi di'e li. 30 Amaa o ya'a pʋ di'e li ka yʋʋm yinne la ya'a gaad, yir kanɛ bɛ tempʋʋgin la yʋ'ʋn na kpɛn anɛ onɛ da' la bʋn, ka o sʋ'oe li saŋa wʋsa, on nɛ o yaas, ka kʋ lɛn lɛbisi li tis onɛ da kuosi li yʋʋm pisnu malʋŋ di'ema saŋa la ya'asɛ. 31 Amaa ya' banɛ bɛ teŋkpɛmbanɛ ka ba pʋ mɛ zaŋguoma gilig la, ya na niŋi ba wʋʋ pɔɔd nɛ. Yir la sɔb na tun'e yɔɔ lɛbis ka di'e li yʋʋm kanɛ ka ba lɛbisid la'adi tisid la.
32 “ ‘La'am nɛ nɛ' wʋsa, Levi dim la mɔr suori na lɛn di'e ba ya' banɛ bɛɛ ba Levi dim tempʋʋg si'a ni saŋsi'a wʋsa. 33 Li pa'al ye Levi dim la mɔr suor ka ba na lɛn di'e ba ya' sʋ'oe ya'as, ba ya'a kuos yir ka li bɛɛ ba tempʋʋg si'a ni wʋsa ka ba pʋ nyaŋi da' lɛbisɛ, yʋʋm pisnu malʋŋ di'ema la saŋa ya'a paae li anɛ ba lɛbisi tisi ba, bɔzugɔ, ya' banɛ bɛ Levi dim tempʋʋdin la anɛ ba faar Israel dim la sʋʋgin. 34 Amaa paalʋ banɛ ka ba kem kɔnbid ka li kpi'enɛ ba tempʋʋd la, ba sɔ' kʋ kuosɛ bɔzugɔ, li anɛ ba din saŋa wʋsa.
35 “ ‘Nid yinne ya'a bɛɛ ya sʋʋgin ka nɔŋ kpɛn' o ka o pʋ tun'e gɔsidi o mɛŋa, yanam sʋŋim o wʋʋ saanne na bɛɛ ya teŋin bɛɛ sɔ' na kena ye o bɛ nɛ ya saŋa bi'ela ka ya na sʋŋ o si'em la. Ala ka o na nyaŋi kpɛn bɛ nɛ ya. 36 Da bɔɔd ye ya pa'al nyɔɔd on di'e si'el wʋsa ya san'an zugɔ, amaa zɔmini ya Wina'am la ka kɛ ka ya teŋ nid nyaŋi bɛɛ ya sʋʋgin. 37 Da pɛ'ɛŋ ligidi tis o ka pa'al nyɔɔdi li zugɔ, bɛɛ, kuos diibi tis o ka pa'al nyɔɔdi li zugɔ. 38 Manɛ aan ya Zugsɔb onɛ mɔri ya yi Egipt teŋin na ye m tisi ya Keenan teŋ la, ka aan ya Wina'am.
39 “ ‘Ya nid yinne ya'a ti lieb nɔŋdaan ka kuosi o mɛŋi tisi ya nid yinne, on da kɛ ka o tʋm wʋʋ o anɛ yammʋga. 40 Niŋim o wʋʋ fʋn na nɔk sɔ' ye o tʋm sʋ'ʋŋif, bɛɛ sɔ' na kena ye o bɛ nɛ ya dabisa bi'ela, o na tʋmmi tisidif hali ti paae yʋʋm pisnu kanɛ an malʋŋ di'ema la. 41 Saŋkan la fʋ na bas on nɛ o biribis la ka ba lɛbi ba dɔɔg dimi bɛ zin'isi'a, nɛ o yaanam sʋ'ʋlimin. 42 Bɔzugɔ, Israel dim la anɛ man yammis banɛ ka m mɔri ba yi Egipt na, li pʋ sʋm ka ba kuosi ba wʋʋ ba anɛ sankpan'ansnama. 43 Zɔmi ya Wina'am la ka da maali ba bɛ'ɛdɛ.
44 “ ‘Ya sankpan'as dap nɛ pu'ab na yinɛ buudbanɛ giligi ya la, ba san'an ka ya na da' ya yammis. 45 Ya mɛ na nyaŋi da' banɛ nam bɛ nɛ ya la, nɛ ba nimbanɛ ka ba du'a ba ya teŋin la, ka na sʋ'oe ba. 46 Ya mɛ na nyaŋi pian' zi'el ka ya biribis ti sʋ'oe ba ka li aan ba faar, ka ba na an ba sankpan'asnam ba nyɔvʋr bɛn wʋsa, amaa da mɔri ya taaba banɛ an Israel dim la mugusida.
47 “ ‘Saan bɛɛ onɛ kena ye o zin'inɛ ya san'an bi'ela ka lieb bʋmmɔr, ka ya nid yinne lieb nɔŋdaan ka kuosi o mɛŋi tis saan la bɛɛ saan la dɔɔg buudi nid, 48 suor bɛ ka ba na ti yɔ ka di'e o, la'am nɛ on kuosi o mɛŋi tis la, o sizua bɛɛ o dɔɔg la nid na nyaŋi yɔ ka di'e o. 49 O saam kpɛɛm bɛɛ o saambil bɛɛ o ba'abiig sɔ' na nyaŋi yɔ ka di'e o, bɛɛ onɛ kpinnɛ ba tuŋ la, bɛɛ o mɛŋ ya'a paam ligidi, o na nyaŋi yɔ ka di'e o mɛŋ. 50 Onɛ kuosi o mɛŋ la nɛ onɛ da' o la na zin'inɛ gɛlig on kuosi o mɛŋ saŋsi'a tis o la paae yʋʋm pisnu kanɛ an malʋŋ di'ema la. Ban na yɔ si'em ka di'e o la na anɛ wʋʋ sɔ' na tʋm ka li nar ye ba yɔɔ o si'em, ka ba na gɛlig nɛ yʋma la bɛn. 51 Yʋma la ya'a kpɛlim zu'oe, asɛɛ ka o yɔ ka li zu'oe ka nyaan di'e o mɛŋ. 52 Yʋʋm pisnu malʋŋ di'ema la ya'a kpɛlim pʋ zu'oe, asɛɛ ka o gɛligi li yɔ ka di'e o mɛŋ nwɛnɛ lin nar si'em. 53 Asɛɛ ka ya niŋ o wʋʋ onɛ ka ba nɔkid o yʋʋm wʋsa ka o tʋm nɛ, asɛɛ ya gɔs ka onɛ da' o la da mɔr o mugusida.