Zugsɔb la nɔɔr siakir yɛla
26
1 Ka Zugsɔb la da lɛn yɛl Moses ye, “Mid ka ya maali bada bɛɛ maal si'eli zi'el bɛɛ zaŋ kugiri sɛ ka gɔs ka li an kasi tisi ya bɛɛ kpia' kugiri zi'el teŋ la zug sappi ka iginidi li tuonnɛ pʋ'ʋsida. Manɛ aan ya Zugsɔb onɛ aan ya Wina'am la. 2 Dɔlli m Vʋ'ʋsʋm Dabisir la sʋ'ʋŋa ka na'asi m Pʋ'ʋsim Zin'ig la; manɛ an Zugsɔb la.”3 “Ya ya'a dɔlli m wada ka gu'us ka siaki m nɔzi'ela la sʋ'ʋŋa, 4 man na kɛ ka saa niid lin nar saŋa si'a ka kɛ ka teŋgbauŋ zʋʋd du'a, ka tiis la na wali ba wala. 5 Ya na bʋ'ʋd ki ti paae tiwala bi'igir saŋa, ka tiwala tʋʋma la na mɔri ya ti paae bʋdib saŋa. Ka ya na di diibi ya ya'amin, ka bɛ teŋin la ka dabiem bɛɛ yɛlsi'a kae. 6 M mɛ na kɛ ka sumbʋgʋsʋm bɛ teŋin la, ka ya ya'a digi, sɔ' kʋ kɛ ka dabiem mɔri ya. M mɛ na lɛn kat mɔɔgin bʋnyuos teŋ la zugʋ yis, ka tanp kʋ li'eli ya teŋin la na. 7 Amaa ya na nyaŋi kadi ya dataas la paae ba kʋ. 8 Ka ya nidiba anu na kadi ba nidib kɔbiga, ka ya nidib kɔbiga na kadi ba nidib tusa piiga, ka ya na nyaŋi ba ka kʋʋ ba. 9 Man na mɔr nyɔɔg nɛ ya, ka kɛ ka ya nɔbig ka paas kal pʋʋgin, ka kɛ ka m nɔnaar na bɛ nɛ ya. 10 Ya na di dikʋdʋg kanɛ ka ya da bʋn yʋʋm la, hali ka ti baae li yis ka lɛdig dipaalig. 11 Ka linɛ lɛm pɛ'ɛs, m na bɛ nɛ ya ka kʋ zan'asi ya kpan-kpan nɛ. 12 M mɛ na la'am ken nɛ ya ka aan ya Wina'am, ka yanam mɛ na aan m nidib. 13 Manɛ an Zugsɔb onɛ aan ya Wina'am la, manɛ da mɔri ya yi Egipt teŋin la na, ye ya kʋ lɛn aan ba yammisɛ, ka kɔ' yɔksin dabanɛ gɛɛli ya niŋgɔnya la ka tisi ya yɔlisim, ka kɛ ka ya ken ka ya zug pʋ lɛn ziida, ka bi'esʋg kae.
14 “Amaa ya ya'a pʋ siaki m nɔɔrɛ, ka dɔlli m nɔzi'ela la wʋsa, 15 ya ya'a ki'isi m wada la, ka zan'asi m zi'ela ka pʋ dɔlisi m nɔzi'ela la wʋsa sʋ'ʋŋaa ka san'ami m nɔnaar la, 16 ya ya'a niŋ ala man ye m tʋmi ya si'em nwa: M na gbirigi mɔr mugustita'ar na namisi ya, ka na mɔr ban'as linɛ ka sɔ' kʋ nyaŋi ti'ebɛ nɛ niŋtʋʋlʋg linɛ na kɛ ka ya zu'om ka kʋ mɔr sumalisim. Linɛ lɛm pɛ'ɛs, ya na bʋdi ya pɔɔd zaalim, bɔzugɔ, ya dataas na faaɛn li ka dii li zʋʋd la wʋsa. 17 M na bidi m kʋdig ka basi ya, ka ya dataas na nyɛ suori nyaŋi ya, ka banɛ kisi ya la na paam paŋi sʋ'oe ya; ka ya na zɔt zaalim hali ka sɔ' pʋ kati yaa. 18 Ka linɛ lɛm pɛ'ɛs ya'asɛ, yɛlbama ya'a gaad ka ya nam pʋ siak m nɔɔrɛ, alaa m na tɛki ya tʋbir nɔɔrim bʋyɔpɔi, ya tʋʋmbɛ'ɛd la yɛla. 19 Ka na lɛn sie ya nyɛɛsim la, ka mɛ na lɛm maal ka saŋgbauŋ la na nwɛnɛ kʋnt nɛ tisi ya, ka ya teŋgbauŋ la mɛ na kpi'em wʋʋ kʋntzɛn'ug nɛ. 20 Ya paŋ na san'am zaalim, bɔzugɔ, ya teŋgbauŋ zʋʋd kʋ maalɛ, ka tiis banɛ bɛ teŋgbauŋʋn la kʋ wali ba walaa.
21 “Ya ya'a nam zan'asidi m nɔɔr ka pʋ di'edi m sa'alʋgɔ, m na kɛ ka ya tɔɔg la paas zin'is ayɔpɔi, wʋʋ ya tʋʋmbɛ'ɛd la nar si'em. 22 M na kɛ ka mɔɔgin bʋnyuos kena zab nɛ ya, ka ba na kʋʋ ya biribis, ka san'ami ya niigi, ka sie ya kal, ka ya suoya dig zaalim.
23 “Yɛlbama nam wʋsa ya'a maali gaad, ka ya pʋ siaki m sa'alʋgɔ, amaa ka kpɛn ken tuon ka ya sʋnf duod nɛ mam, 24 mam mɛŋ sʋnf na duoe nɛ ya, ka m kɛ ka ya namisʋg maligim paas nɔɔr ayɔpɔi ya tʋʋmbɛ'ɛd la zug. 25 M mɛ na lɛn kɛ ka tanp duoe ka ba kʋʋ ya, ka li an sam yɔɔb, m nɔnaar san'auŋ la yɛla. Ka ya ya'a zɔɔ la'as taaba ya tempʋʋdin la, m na kɛ ka tɔɔg sigi ya sʋʋgin na, ka li na kɛ ka ya dataas na nyaŋi ya. 26 M na sie ya diib hali ka pu'ab piiga na tun'e maali ya diib dan'aŋ yinne ni, ka sie li tɛbisim, ka ya dit ka pʋ tigida.
27 “Ka la'am nɛ nɛ'ɛnam wʋsa ya'a niŋ ka ya zan'as ye ya kʋ di'e m nɔɔrɛ, ka kpɛn ken tuon nɛ tʋbzian'asim, 28 m sʋnf na pɛlig nɛ ya ka m mɛ zan'asi ya ka namisi ya nɔɔr ayɔpɔi ya tʋʋmbɛ'ɛd la zug. 29 Ya na ɔnbi ya biribis nɛ ya bipumis, kɔ'ɔm zug. 30 Ka m na san'ami ya teŋgbana nɛ maana zin'ibanɛ bɛ kʋkʋna zut la, ka nwa'ae daka banɛ ka ya nyu'od bʋnnyubisa li zutin la. M na kɛ ka ya kpii pa'ae ya bada banɛ ka' nyɔvʋr la zug, bɔzugɔ man na kisigi ya. 31 M na kɛ ka ya tempʋʋd la lieb dabɔɔd, ka lɛn kɛ ka ya pʋ'ʋsim zin'is lieb nɛɛm. Hali ya ya'a nyu'od maan li nyuug kʋ lɛm malisi ma. 32 M na san'ami ya teŋgbauŋ la wʋsa ka ya dataas banɛ na kpɛn' bɛɛ anina la na lidigi li yɛla. 33 Man na widigi ya tɛɛns la sʋʋgin ka na fuoe m sʋ'ʋgʋ kadi ya. Ya teŋ la na kpɛlim zaalim, ka ya tempʋʋd la nwa'a-nwa'a lieb dabɔɔd.
34 “Ya ya'a nan kpɛlim bɛɛ ya dataas tɛɛnsin la, ala ka ya teŋgbauŋ la na di malisim li vʋ'ʋsʋm dabisa ni, saŋkanɛ wʋsa ka teŋ la na dig zaalim ka ya bɛɛ ya dataas teŋin la; ala ka teŋgbauŋ la na di malisim li vʋ'ʋsʋm dabisa la saŋa. 35 Saŋkanɛ wʋsa ka li dig zaalim la li na vʋ'ʋs vʋ'ʋsʋm kanɛ ka li da pʋ nyɛɛ, yanamɛ da bɛɛ ani la. 36 Ya nimbanɛ wʋsa kpɛlim bɛɛ ya dataas teŋin la, m na kɛ ka dabiem kpɛn' ya hali. Ka ya ya'a wʋm ka pɛbisim da'ad vaand, ya na zɔ wʋʋ ya dataasi dɔlli ya nɛ, ka lut teŋin, hali baa sɔ' pʋ kati ya la. 37 Ya na tu'usidi lit taaba zug wʋʋ zabzabidibi kati ya nɛ, la'am nɛ sɔ' pʋ kati ya la, ka kʋ nyaŋi zi'enɛ zab nɛ ya dataasɛ. 38 Ya na mɛlim teŋ zʋna la pʋʋgin, ya dataas teŋ la na vɔli ya ka ya ba'as yɔri. 39 Yanam banɛ kpɛlim bɛɛ ya dataas tɛɛnsin la na yaali ya tʋʋmbɛ'ɛd zug; ya yaanam tʋʋmbɛ'ɛd zug ba na san'am.
40 “Amaa m nidib la ya'a pɛligi ba pʋʋg ka siak ye ban nɛ ba yaanam tʋm taal, ba sida ka'alim zug, nɛ ban da zan'as mam si'em 41 ka lin zug ka mam mɛ da zan'asi ba ka nɔki ba niŋi ba dataas tɛɛnsin la. Amaa ba ya'a sigisi ba mɛŋ ka tiaki ba sʋnya linɛ digilim la, ka yɔɔ ba tʋʋmbɛ'ɛd sam, 42 m mɛ na tiɛn m nɔnaar nɛ Jakob, nɛ Isaak, nɛ Abraham, ka la'am tiɛn teŋgbauŋ la yɛla. 43 Bɔzugɔ, ba na bas teŋgbauŋ la ka li vʋ'ʋs, saŋkanɛ ka li dig zaalim ka ba kae la. Ba na yɔɔ ba tʋʋmbɛ'ɛd la sam, bɔzugɔ ba nɛ'ɛsi m wada la ka zan'asi m zi'ela. 44 Ka la'am nɛ nɛ'ɛnam wʋsa, ba ya'a bɛɛ ba dataas teŋin, m kʋ zan'asi ba bɛɛ kisigi ba ka san'ami ba nyainnɛ, bɛɛ san'ami m nɔnaar nɛ ba. Bɔzugɔ manɛ an Zugsɔb onɛ aan ba Wina'am la. 45 Amaa ba yɛla ka m na tiɛn m nɔnaar nɛ ba yaanam banɛ ka m da mɔri ba yi Egipt teŋin na la, ye m na aan ba Wina'am ka buudi bɛdegʋ nidib da nyɛ la. Manɛ an Zugsɔb la.”
46 Bama an zi'ela nɛ wada banɛ ka Zugsɔb la da maali digili tis o mɛŋ nɛ Israel dim ka li yit Moses san'an na, Sinai Zuor zugin la.