Levi dim 27

Kaanbʋg nɛ siakir yɔɔb yɛla

1 Zugsɔb la da lɛm pian' tis Moses ye, 2 Yɛlim Israel dim la ye sɔ' ya'a kaanb linɛ an nimmua kaanbʋgʋ zi'el, ka li anɛ ye o na nɔk ninsaali pɛsigi tis Zugsɔb la, ka o nɔk ligidi linɛ na zem wʋʋ ninsaal nɛ, 3 li ya'a anɛ dau onɛ yʋma an pisi paae yʋma pisyuobʋ, o ligidi na anɛ anzurifa ligidi pisnu nwɛnɛ Fuug Sʋgʋr ligidi an si'em la; 4 bɛɛ o ya'a anɛ pu'a, o ligidi na anɛ anzurifa pistan'. 5 Ka o yʋma ya'a yinɛ yʋma anu hali ti paae yʋma pisi ba na gɛlig lin nar ye ba da' o si'em, o ya'a an dau o ligidi na anɛ anzurifa pisi, ka pu'a mɛ ligidi na anɛ anzurifa piiga. 6 Amaa o ya'a yinɛ nwadig yinne hali ti paae yʋma anu ba na gɛlig ban na da' o si'em, o ya'a an dau o ligidi na anɛ anzurifa anu, ka pu'a mɛ ligidi na anɛ anzurifa atan'. 7 O mɛ ya'a anɛ yʋma pisyuobʋ nɛ pa'ali, ba na gɛlig ban na da' o si'em, o ya'a an dau o ligidi na anɛ anzurifa pii nɛ anu, ka pu'a mɛ ligidi na anɛ anzurifa piiga. 8 Amaa o paŋ ya'a pʋ paae ban gɛlig ligidi la si'em la, ba na zaŋ o niŋ maanmaan la nu'ugin ka maanmaan la gɛlig lin nar ye ba da' o si'em, ka li dɔlnɛ on kaanbi zi'el la paŋi an si'em la.

9 O ya'a kaanbnɛ bʋnkɔnbʋgʋ zi'el ye ba maal maannɛ tis Zugsɔb la, bʋnkɔnbkan la na lieb Zugsɔb la din ka an kasi. 10 O mid ka o lɛbis bɛɛ tiaki li, ka nɔk bʋnkɔnbsʋŋʋ tiak bʋnkɔnbbɛ'og, bɛɛ nɔk bʋnkɔnbbɛ'ogʋ tiak bʋnkɔnbsʋŋ; o ya'a nɔk bʋnkɔnbʋgʋ tiak bʋnkɔnbsi'a, babayi' la wʋsa na lieb Zugsɔb la din ka an kasi. 11 Ka linɛ ka o kaanbi zi'el la ya'a anɛ bʋnkɔnbkanɛ ka' nyainnɛ ka kʋ nyaŋi maal maannɛ tis Zugsɔb la, alaa o na mɔri li keŋ tis maanmaan la 12 onɛ na gɔs ye li an sʋm bɛɛ bɛ'ɛdɛ, ka on nwaae ligidi la zi'el si'em la, ala nɔɔ ka li na aaɛn. 13 Amaa o ya'a bɔɔd ye o tiaki yɔ ligidi ka kpɛn mɔri li, alaa o na yɔ ligidi pʋdigir anu paasi li zug.

14 Sɔ' ya'a kaanbnɛ o yiri zi'eli tis Zugsɔb la ka li an kasi, maanmaan la na gɔs lin an sʋm bɛɛ bɛ'ɛd si'em ka nwaae li ligidi zi'el. Ka maanmaan la na zi'el si'em la, ala ka li na aɛn. 15 Ka la'am nɛ wala, onɛ mɛ kaanb la ya'a bɔɔd ye o tiaki yɔ ligidi o yir la zug ka kpɛn mɔri li, alaa o na yɔ ligidi pʋdigir anu paasi li zug, ka li na aan o din.

16 Sɔ' ya'a zaŋ pɔkanɛ aan o yidim faari tis Zugsɔb la ka li an kasi, li ligidi sʋm ye li zemis nɛ bʋmbʋʋda kanɛ na bʋd pɔɔg la. Li ya'a na bʋd ki bielim bɔto atan', li sʋ'ʋm ye di ligidi an anzurifa ligidi pisnu. 17 O ya'a kaanbnɛ o pɔɔgʋ zi'el, ka li an yʋʋm pisnu malʋŋ di'ema yʋʋmmi zaŋi ken, ligidi la na kpɛn anɛ ala nɔɔ. 18 Amaa o ya'a kaanbnɛ zi'el malʋŋ di'ema yʋʋm la nya'aŋ, maanmaan la na gɛlig lin zem si'em tis o, ka li dɔlnɛ yʋma banɛ kpɛlim ti paae malʋŋ di'ema yʋʋm la ya'as, ka ba na sie li ligidi la ala. 19 Nid ya'a kaanbi o pɔɔgʋ zi'el ka lɛm bɔɔd ye o di'e li ya'as, o na yɔ pɔɔg la ligidi pʋdigir anu paasi li zug, ka li na aan o din. 20 Amaa o ya'a pʋ yɔ ka di'e pɔɔg la bɛɛ o kuosi linɛ tis dau sɔ', o kʋ lɛn tun'e yɔ ka di'e pɔɔg la. 21 Ka li ya'a ti paae malʋŋ di'ema yʋʋm ya'as, pɔɔg la na an kasi, nwɛnɛ pɔkanɛ ka ba pɛsigi li tis Zugsɔb la. Li na lieb maanmaan la din, ka o sʋ'oe li saŋa wʋsa.

22 Ka sɔ' ya'a zaŋ pɔkanɛ ka o da' kaanbi tis Zugsɔb la, ka li ka' o mɛŋ pɔɔg bɛɛ o yidim pɔɔgɔ, 23 alaa maanmaan la na gɛligi li ligidi an si'em, hali ti paae malʋŋ di'ema la yʋʋm, ka o na yɔ ligidi la daakan la ka li na an kasi tis Zugsɔb la. 24 Ka li ya'a ti paae yʋʋm pisnu malʋŋ di'ema yʋʋm la, ba na lɛbis pɔɔg la tis onɛ ka o da' li o san'an la. 25 Ya ligidi gɛligir mɛkama wʋsa na dɔl Fuug Sʋgʋr ligidi, ka ka' daar wʋsa ligidii, ka li anzurifa la'af yinne anɛ li la'abibis pisi.

26 Sɔ' da kaanb bʋnkɔnbkanɛ du'a yiiga zi'elɛ bɔzugɔ, li pʋn anɛ Zugsɔb la din. Li ya'a an na'araug bɛɛ pɛraugɔ, Zugsɔb la pʋn sʋ'oe li. 27 Amaa li ya'a an bʋnkɔnbkanɛ ka' nyainnɛ, o na nɔk ligidi tiaki yɔ, ka li dɔlnɛ ban na gɛlig o ligidi si'em, ka yɔ ligidi la pʋdigir anu paasi li zug; ka o ya'a kʋ tis ligidi tiaki yɔɔ, alaa ba na kuosi li wʋʋ li ligidi zem si'em.

28  Amaa linɛ mɛkama ka ninsaal gaŋ o mɔrim pʋʋgin ka li bɛɛ li kɔn' ye o pɛsigi tis Zugsɔb la, ka li an ninsaal bɛɛ bʋnkɔnbʋg bɛɛ pɔɔg linɛ an o mɛŋ bʋn, ba ka' suor ye ba kuos bɛɛ di'e ligidi tiaki lii. Li liebnɛ Zugsɔb la din ka an kasi.

29 Ninkanɛ wʋsa ka ba gaŋ o pɛsigi tis Zugsɔb la, ba kʋ nyaŋi lɛn nɔk ligidi yɔɔ o zug ka di'e o basɛ, asɛɛ ba kʋʋ o.

30  Ki bɛɛ bʋmbʋta wʋsa linɛ ka ya bʋd teŋ la zug, li ya'a anɛ zʋʋd linɛ yit teŋin na bɛɛ wala linɛ yi tiig zug na, li pʋdigir piiga wʋsa yinne anɛ Zugsɔb la din ka li an kasi tis Zugsɔb la. 31 Sɔ' ya'a bɔɔd ye o nɔk ligidi tiak o pʋdigir piiga nwa, o na yɔɔ di ligidi la pʋdigir anu paasi li zug. 32 Ka bʋnkɔnbid wʋsa pʋdigir piiga pʋʋgin, ya na kɛ ka ba tuunl taaba yit yinne-yinne ka ya kaali ba, linɛ paasid piiga la wʋsa na lieb Zugsɔb la din ka an kasi. 33 O da gaans bʋnsʋma bʋmbɛ'ɛdnamin la, bɛɛ tiakɛ. O ya'a tiak bʋnkɔnbsi'a, babayi' la wʋsa na liebnɛ kasi tis Zugsɔb la.

34 Bama an nɔzi'ela banɛ ka Zugsɔb la da tis Moses ye o tis Israel dim, Sinai Zuor zug la.