Mɔrim gu'ub yɛla
22
1 Ka Wina'am da lɛn yɛl Moses ye, “Dau ya'a zu nɛ naaf bɛɛ pɛ'ogʋ kuos bɛɛ kʋ asɛɛ ka o yɔ niigi anu naaf yinne la zug, ka mɛ yɔ pɛ'ɛs anaasi pɛ'og yinne la zug.2 “Na'ayiig ya'a kɔɔ kpɛn' fʋ yin na ye o zu, ka fʋ nyɛɛ o ka nwɛ' o kʋ, na'ayiig la ziim pʋ bɛ fʋn onɛ kʋʋ o la zuginɛ; 3 amaa li ya'a anɛ nintaŋ ka o kɔɔ kpɛn' fʋ yin la na ka fʋ kʋʋ o, fʋ tʋm taal.
“Li anɛ tilas ye na'ayiig la yɔɔ lɛbis on zu si'el la zug, amaa o ya'a pʋ mɔr si'el la, asɛɛ ka ba kuos o n yɔ on zu si'el la zug.
4 “Amaa bʋnkɔnb kanɛ ka o zu la ya'a nan bɛɛ o san'an; li ya'a anɛ naaf bɛɛ bʋŋ bɛɛ pɛ'og, asɛɛ ka o yɔɔ lɛbis nɔɔra ayi'.
5 “Ka dau ya'a nɔk o bʋnkɔnbidi keŋ sɔ' pɔɔgin bɛɛ o vain tiis pɔɔgin ka ba ɔnb, asɛɛ ka o nɔk o mɛŋ pɔɔgʋ yɔɔ o sɔb. 6 Sɔ' ya'a nyu'oe bugum ka li faaɛn la'aŋ mɔɔgi di hali ti la'am di nɛ zʋʋd linɛ ka ba bunɛ digil, nɛ linɛ nan zi'e, hali nɛ pɔɔg la wʋsa, asɛɛ ka onɛ nyu'oe bugum la nɔk o mɛŋ zʋʋdi yɔ. 7 Ka dau ya'a nɔk ligidi bɛɛ la'adi tis o tiraan ye o di'em su'a, ka na'ayiig kɔɔ kpɛn' zu ka ba gban'e na'ayiig la, asɛɛ ka o yɔ nɔɔra ayi'. 8 Amaa ba ya'a pʋ nyɛ na'ayiig la, asɛɛ ka ba mɔr yir la daana keŋ sariakatib san'an ka ba vɛɛnsi gɔs ye onɛ zu la'ad la bɛɛ ka' onɛ? 9 Nidib ayi' ya'a zabid nɛ taaba bʋŋ bɛɛ naaf bɛɛ pɛ'ɛs bɛɛ fuug linɛ bɔdig ka ba keŋ nyɛ ka li bɛ sɔ' san'an ka yinne ye li anɛ on bʋn, ka ayinne mɛ ye li anɛ on bʋn, asɛɛ ba mɔri ba wʋsa keŋ sariakatib san'an ka ba vɛɛnsi gɔs ka onɛ ka' bʋʋd la na yɔ nɔɔra ayi' tis onɛ mɔr bʋʋd la. 10 Dau ya'a nɔk bʋŋ bɛɛ naaf bɛɛ pɛ'og bɛɛ bʋnkɔnbsi'a wʋsa tis o kpi'a ye o gɔsi tis o, ka bʋnkɔnbʋg la kpi bɛɛ pu'alim bɛɛ sɔ' nɔk ka ba pʋ nyɛɛ, 11 lin na niŋ si'em ka yɛl la maal anɛ ba kɛ ka bʋnkɔnbʋg la bɛ sɔ' san'an la pɔ Zugsɔb la tuon ye on pʋ nɔk o nu'ugʋ si'isi o kpi'a la laukɔ. Ka onɛ sʋ'oe bʋnkɔnbʋg la sʋm ye o siak ka da kɛ ka o kpi'e la yɔ si'ela. 12 Amaa li ya'a anɛ onɛ gɔti ba la zu, asɛɛ ka o yɔɔ lɛbisi o kpi'a la. 13 Ka li ya'a lɛn anɛ wɛog bʋnyua gban'e bʋnkɔnbʋg la ɔnb, asɛɛ ka o mɔr on ɔnb ka nya'al si'el la na ka ba nyɛ, ka o kʋ yɔɔ lɛbisɛ. 14 Ka sɔ' ya'a pɛ'ɛŋ bʋnkɔnbʋgʋ o kpi'a san'an ka o pu'alim bɛɛ kpi ka o kpi'a la ka' anina yamma ka nyɛɛ, asɛɛ ka o yɔɔ lɛbis. 15 Amaa onɛ sʋ'oe bʋnkɔnbʋg la ya'a bɛɛ anina ka nyɛ, o kʋ yɔɔ. O ya'a hanɛ bʋnkɔnbʋg la, lin nwɛnɛ sam kan yɔnɛ la.”
Pu'asadir san'auŋ yɛla
16 “Ka dau ya'a digin nɛ pu'asadir kanɛ nan zi' dau, ka ba mɛ nam pʋ tis pu'asadir la pu'a-ɛliŋ-yirɛ, asɛɛ ka dau la yɔ pu'asadir la yɔɔd ka o liebi o pu'a. 17 Ka pu'asadir la saam ya'a zan'as kpan-kpan ye o bipuŋ la kʋ kul oo, asɛɛ ka o yɔ pu'asadir la yɔɔd, on san'am o ka o nam zi' dau la zug.”
Zi'ela linɛ paas
18 “Pu'a kanɛ an teŋgban-kpɛn'ɛd ban kʋʋm o. 19 Kʋʋmi ninkanɛ wʋsa bɔ bɛɛ digin nɛ bʋnkɔnbʋg. 20 Ka onɛ wʋsa maal malʋŋʋ tis ba'ar bɛɛ win ka ya'a ka'anɛ Zugsɔb ma'aanɛ, yanam san'am ninkan sɔb.
21 “Da namisidi saamma ka yanam mɛ da anɛ saam Egipt teŋin. 22 Da mugusidi pʋkɔnya bɛɛ kpiibisɛ. 23 Ya ya'a maali ba linɛ ka' sʋm ka ba kaasi tisim, mam na wʋmi ba fabʋlʋg, 24 ka m sʋʋnr na duoe ka m kɛ ka ya kpi tanpin ka ya pu'ab mɛ lieb pʋkɔnya ka ya biis lieb kpiibis.
25 “Ya ya'a pɛ'ɛŋ ligidi tisim nidib la yinne onɛ an nɔŋdaan ka bɛɛ ya san'an, yanam on da niŋ wʋʋ ligidpɛ'ɛmisa dim banɛ pɛ'ɛsid nyɔɔd la. 26 Ka fʋ ya'a di'e fʋ kpi'a fugɔbʋgʋ o pɛ'ɛm yɛla, fʋn lɛbisim tis o ka winnig nyaan lu, 27 bɔzugɔ lin ka o mɔri pinnɛ o mɛŋ. Ya'a ka alaa, o ye o nɔk bɔɔ pil o mɛŋ yʋ'ʋŋ kanɛ? Ka o ya'a kaas ka fabili tisim, mam na wʋm, bɔzugɔ m anɛ nimbaanlzɔt.”
28 Mid ka ya san'am Wina'am yʋ'ʋr bɛɛ pɔ nɔɔri niŋ tuongat onɛ guri ya nidib la. 29 “Asɛɛ ka ya yisi ya pɔɔd zʋʋd la mɔr na, nɛ tiwala bʋnnuuda nɛ kpaam linɛ nar ye ya tisim ka li anɛ malʋŋ la; da kɛ ka li kpɛn digi ya bʋya la ni nɛ ya yaan nɛ.
“Li anɛ tilas ye ya nɔki ya biribiŋ kpɛɛmnam wʋsa tisim. 30 Maalimi nɛ ala nɛ ya niigi nɛ kɔnbid. Ba na bɛ nɛ ba manamɛ paae daba ayɔpɔi, amaa daba anii daar la ka ya mɔri ba na tisim.
31 “Ya na anɛ nimbanɛ an kasi tisim, dinzugɔ, da ɔnbi ni'im linɛ ka wɛog bʋn tɔɔnsi tɔɔnsɛ. Lɔm tisi baas.”