Tembanɛ an suak zin'is la
20
1 Zugsɔb la da yɛl Josua ye 2 “Yɛlim Israel dim la ye ba gaŋ tembanɛ na an suak zin'is, nwɛnɛ man da pa'al Moses si'em la. 3 Linɛ na kɛ ka sɔ' ya'a kʋʋ o tiraan ka li ka'anɛ o kʋʋ o nɛ pɔn'ɔsim, o na nyaŋi zɔɔ keŋ teŋ kan la nii su'a ka onɛ ka o kʋ la tuŋ dim da kʋʋ o yɔ sammɛ. 4 O ya'a zɔɔ keŋ tembama yinne ni, o na zi'en teŋ la yaŋirin ka yɛl teŋ la kpɛɛmnam on tʋm si'el, ka ba di'e o kpɛn'ɛsi ba teŋin la ka bɔ zin'igi tis o ka o zin'in nɛ ba. 5 Sɔ' ya'a dɔl o nya'aŋi paae na ye o kʋʋ o yɔ sam, ban da nɔk o tisɛ, bɔzugɔ o pʋ kʋʋ o kpi'a la pɔn'ɔsim-pɔn'ɔsim. 6 O na bɛ teŋin la hali ti paae ban na ti tu'a antu'a la o nidib la tuon. O ya'a di bʋʋd, o na kpɛm bɛ ani ti paae saŋkanɛ ka maanmaan kpɛɛm la na kpi, ka o nyaan lɛbi o mɛŋ teŋin.”7 Alazug ba da gaŋ Kedes linɛ bɛ Galile kʋkʋna teŋ linɛ bɛ Naftali sʋ'ʋlimin la, nɛ Sekɛm linɛ bɛ Efiram kʋkʋna teŋ la nɛ Kiriaf Ariba (linɛ an Hebron) linɛ bɛ Juda kʋkʋna teŋ la 8 lɛbisid Joodan kɔldaug lɔm, Jeriko teŋ nya'aŋ la. Ba da gaŋnɛ Bezer linɛ bɛ sian'arin Reuben dim paalʋ la ni, nɛ Ramot linɛ bɛ Gilead teŋgbauŋʋn ka an Gad dim sʋ'ʋlim la nɛ Golan linɛ bɛ Basan teŋgbauŋʋn ka an Manase dim sʋ'ʋlim la. 9 Israel nid wʋsa bɛɛ saan onɛ bɛ nɛ ba ya'a kʋ sɔ' ka li ka' pɔn'ɔsim, on sɔb na tun'e zɔɔ keŋ tembama ni ka banɛ kat o ye ba kʋʋ o yɔ sam la kʋ kʋʋ o. Li pʋ nar ye ba kʋ sɔ' ka pʋ kad o saria.