Simeon pʋʋr la yɛla
19
1 Bʋgʋlʋm-bʋgʋlʋm linɛ pɛ'ɛs ayi' la da lu nɛ Simeon dim la zug, ka li anɛ tuŋ-tuŋ. Ba pʋʋr da bɛ nɛ Juda sʋ'ʋlim la pʋʋgin. 2 Li da kpanb nɛ:Beerseba (bɛɛ Seeba) nɛ Molada 3 nɛ Hazar Sual nɛ Bala nɛ Ezem 4 nɛ Elitolad nɛ Betuel nɛ Horma 5 nɛ Ziklag nɛ Bet Maakabof nɛ Hazar Susa 6 nɛ Bet Lebaof nɛ Siaruhen. Tempʋʋd pii nɛ atan' nɛ ba tembibis. 7 Linɛ pɛ'ɛs anɛ Ayin nɛ Rimmon nɛ Eter nɛ Asean. Tempʋʋd anaasi nɛ ba tembibis, 8 nɛ tembibis banɛ gilig tempʋbama wʋsa hali ti paae Baalaf Beer (Rama linɛ bɛ Negef la). Nɛ'ɛŋa da an Simeon dim la pʋʋr, ka li anɛ tuŋ-tuŋ. 9 Simeon dim la da di'e ba faar nɛ Juda dim pʋʋr la pʋʋgin bɔzugɔ Juda pʋʋr la da zu'oe gaad lin nar ye ba di'e si'em. Alazug Simeon dim la da di'e ba faar la nɛ Juda sʋ'ʋlim la pʋʋgin.
Zebulun pʋʋr la yɛla
10 Bʋgʋlʋm-bʋgʋlʋm linɛ paas atan' la da lu nɛ Zebulun dim zug, ka li anɛ tuŋ-tuŋ. Ba faar la da mɔri ala paae Saaried, 11 lɛbid ya-tuona ti paae Mariala, keŋi si'is Dabbɛsef ka tiɛn keŋ li'el Jokneam bɔn'ɔfalig la. 12 Ka lɛb ya-nya'aŋ baba naam Saaried lɛbisid ya-nya'aŋ winnigi tansid zin'isi'a la keŋ paae Kisilof Tabo mɔr ala keŋ paae Dabɛraf ti paae Jafia, 13 ka li kpɛn ken hali lɛbid ya-nya'aŋ Gaf Hifa nɛ Ef-Kaazin, li dɔlli yinɛ Rimmon gɔnligi kpa' Niya; 14 ani ka titɔndig la gɔnligi yi tuonnɛ ken Hannaton n keŋ naae Ifita-El bɔn'ɔgin la. 15 Banɛ paas anɛ Kattaf nɛ Nahalal nɛ Simiron nɛ Idala nɛ Betilehem. Ba da anɛ tempʋʋd pii nɛ ayi' nɛ ba teŋkpɛmis. 16 Tempʋbama nɛ ba tembibis la da anɛ Zebulun dim faar, ka li anɛ tuŋ-tuŋ.
Isaka pʋʋr la yɛla
17 Bʋgʋlʋm-bʋgʋlʋm linɛ da paas anaasi la da lu nɛ Isaka dim la zug, ka li anɛ tuŋ-tuŋ. 18 Ba sʋ'ʋlim la da kpanb nɛ Jezireel nɛ Kesullof nɛ Seunim 19 nɛ Hafaram nɛ Sion nɛ Anaharaf 20 nɛ Rabif nɛ Kisiyon nɛ Ebɛs 21 nɛ Remef nɛ Een-Ganim nɛ En-Hada nɛ Bet-Pazes, 22 hali ti paae Tabo nɛ Siahazuma nɛ Bet Semes keŋ naae Joodan kɔldaug nɔɔrin. Li da anɛ tempʋʋd pii nɛ ayuobʋ nɛ ba tembibis. 23 Tempʋbama nɛ ba tembibis la da anɛ Isaka dim faar ka li anɛ tuŋ-tuŋ.
Aser pʋʋr la yɛla
24 Bʋgʋlʋm-bʋgʋlʋm linɛ da paas anu la da lu nɛ Aser dim la zug, ka li anɛ tuŋ-tuŋ. 25 Ba sʋ'ʋlim la da kpanb nɛ: Helikaf nɛ Halii nɛ Beten nɛ Akisiaf 26 nɛ Alamelek nɛ Amad nɛ Misial; dinɛ lɛbid ya-tuona baba la. Titɔndig la da keŋ tʋn nɛ Kaamel nɛ Siihor Libnaf; 27 Li da fɛndigi lɛb ya-nya'aŋ baba lɛbid Bet Dagon n paae Zebulun nɛ Ifita-El bɔn'ɔgin la, ka lɛb datiuŋ keŋ paae Bet Emek nɛ Neiel n gaadi dɔl Kabul lɛbid dagɔbʋg; 28 ka keŋ dɔl Abidon nɛ Rehob nɛ Hamon nɛ Kana hali ti paae Sidon linɛ an teŋ tita'ar la. 29 Ani ka titɔndig la da gɔnligi lɛb nya'aŋi kpa'ad Rama paae Taya teŋ kanɛ kpi'em hali la, lɛn lɛb Hoosa baba dɔl Atɛuk zin'ikanɛ bɛ Akizib sʋ'ʋlim la, 30 nɛ Uma nɛ Afek nɛ Rehob. Li da anɛ tempʋʋd pisi nɛ ayi' nɛ ba tembibis. 31 Tempʋbama nɛ ba tembibis la da anɛ Aser dim faar ka li anɛ tuŋ-tuŋ.
Naftali pʋʋr la yɛla
32 Bʋgʋlʋm-bʋgʋlʋm linɛ da paas ayuobʋ la da lu nɛ Naftali dim la zug, ka li anɛ tuŋ-tuŋ. 33 Ba titɔndig la da pin'il nɛ Helef nɛ titita'ar linɛ bɛ Zaananim la, dɔl Adami Nekeb nɛ Jabineel n paae Lakkum ka naae Joodan kɔldaugin la; 34 ka titɔndig la da lɛn naam ya-tuona dɔl Aznof Tabo dɔlli yi Hukkok. Ba sʋ'ʋlim la tʋn nɛ Zebulun teŋi lɛbis ya-datiuŋ, nɛ Aser teŋi lɛbis ya-tuona nɛ Joodan kɔldaug la lɛbis ya-nya'aŋ. 35 Ba tembanɛ kpi'em hali la da anɛ Ziddim nɛ Zier nɛ Hammaf nɛ Rakaf nɛ Kinɛref 36 nɛ Adama nɛ Rama nɛ Hazo 37 nɛ Kedes nɛ Edire nɛ Ɛɛn Hazo 38 nɛ Yiron nɛ Migdal El nɛ Horiem nɛ Bet Anaf nɛ Bet Semes. Tempʋʋd pii nɛ awai nɛ ba tembibisi da bɛɛ ani. 39 Tempʋbama nɛ ba tembibis la da anɛ Naftali dim faar ka li anɛ tuŋ-tuŋ.
Dan pʋʋr la yɛla
40 Bʋgʋlʋm-bʋgʋlʋm linɛ da paas ayɔpɔi la da lu nɛ Dan dim la zug, ka li anɛ tuŋ-tuŋ. 41 Ba faar la sʋ'ʋlim da kpanb nɛ: Zora nɛ Esitaol nɛ Yir-Semes 42 nɛ Sealibim nɛ Aijalon nɛ Ifila 43 nɛ Elon nɛ Timna nɛ Ekron 44 nɛ Elitek nɛ Gibɛton nɛ Baalaf 45 nɛ Jehud nɛ Benɛ-Berak nɛ Gaf Rimmon 46 nɛ Jarikon kɔldaugin nɛ Rakon nɛ sʋ'ʋlim kanɛ kpa'ad Joppa baba la 47 (amaa li da tɔi tis Dan nidib la nɛ ban na di'e ba sʋ'ʋlim nwa, alazug ba da keŋ zab nɛ Lesem teŋi nyaŋi ba ka kʋʋ ba nidib la ka zin'in anina. Ba da zin'in ani ka nɔki ba yaab yʋ'ʋri pʋd teŋ la ye Dan). 48 Tempʋbama nɛ ba tembibis la da anɛ Dan dim faar ka li anɛ tuŋ-tuŋ.
Josua pʋʋr la
49 Ban da pʋdig teŋ la naae wʋʋ lin nar si'em la, Israel dim la da gbin'e paalʋ ba sʋʋgin la tis Josua onɛ an Nun biig la ka li aan o faar, 50 nwɛnɛ Zugsɔb la da tis nɔɔr si'em la. Ba da tis o tempʋkanɛ ka o da ye o bɔɔd la. Ba da tis o Timnaf Sera linɛ bɛ Efiram linɛ an kʋkʋna teŋ la. Ka o da mɛ' teŋ la zin'in anina.
51 Ka Eleazar onɛ an maanmaan la, nɛ Nun biig Josua nɛ Israel buudi la dɔɔd kpɛɛmnam da maal bʋgʋlʋm-bʋgʋlʋm pʋdig sʋ'ʋlim la tis taaba. Ba da niŋi ala nɛ Zugsɔb la tuon, La'asʋg Fuug Sʋgʋr linɛ da bɛ Siilo teŋin la za'anɔɔrin. Ala ka ba da maali pʋdig teŋ la naae.