Paalʋ linɛ kpɛlim la pʋdigir yɛla
18
1 Israel nidib la wʋsa da la'as Siilo teŋin maal Fuug Sʋgʋri ti' ka li aan ba la'asʋg zin'ig. Teŋ la yʋ'ʋn da bɛnɛ ba nu'usin 2 amaa Israel dɔɔd ayɔpɔi da nam bɛ ka pʋ di'e ba pʋʋrɛ. 3 Dinzug Josua da yɛl Israel dim la ye, “Ya ye ya gu'us saŋa wala ka nyaan sʋ'ʋg teŋ kanɛ ka Zugsɔb onɛ aan ya yaanam Wina'am tisi ya la? 4 Gaŋimi nidiba atan' tan' dɔɔg wʋsa ni. Ka m na tʋmi ba ka ba kaae teŋ la gɔs ka sɔbi li yɛla pa'al sɔ' wʋsa pʋʋri na an si'em. 5 Ya na pʋdig paalʋ la zin'is ayɔpɔi. Juda dim na kpɛm bɛɛ ba sʋ'ʋlimin la lɛbisid ya-dagɔbʋg baba, ka Josef yidim la mɛ na bɛɛ ba sʋ'ʋlimin la lɛbisid ya-datiuŋ. 6 Ya ya'a ti sɔbi pa'al paalʋ la ka pʋdig zin'is ayɔpɔi la naae, yanam on mɔr gbauŋ la kɛɛn m san'an na ka m maal bʋgʋlʋm-bʋgʋlʋm tisi ya ti Zugsɔb Wina'am la tuon. 7 Levi dim la on lɛɛ kʋ la'as nɛ ya di'e pʋʋr ka li aan ba dinnɛ, bɔzugɔ, ban tʋm Zugsɔb maanmaannib tʋʋm la, linɛ aan ba pʋʋr. Gad nɛ Reuben nɛ Manase dɔɔg dim la pʋn di'e ba pʋʋr Joodan kɔldaug nya'aŋ baba la sa, Moses onɛ an Zugsɔb tʋmtʋm la da tisi ba.” 8 Nidib la da ye ba yii keŋ mak teŋ la, Josua da pa'ali ba ye, “Kem kaae giligi teŋ la ka sɔb lin an si'em, ka lɛbi nɛ m san'an na ka m maal bʋgʋlʋm-bʋgʋlʋm tisi ya Siilo teŋin kpɛla, Zugsɔb la tuon.” 9 Nidib la sid da yii keŋ kaae teŋ la. Ba da sɔb lin an si'em niŋ gbauŋʋn. Tempʋʋg wʋsa yinne-yinne ka ba da pʋdig zin'is ayɔpɔi, ka lɛb Josua san'an zin'ikanɛ ka ba la'as, Siilo teŋin la. 10 Josua yʋ'ʋn da maal bʋgʋlʋm-bʋgʋlʋm tisi ba Siilo teŋin, Zugsɔb la tuon, ka ani ka o pʋdig teŋ la tis Israel dim la ka li dɔl nɛ dɔɔg la an bɛn-bɛn si'em.Benjamin pʋʋr la yɛla
11 Bʋgʋlʋm-bʋgʋlʋm la da gaŋnɛ Benjamin dɔɔg la, ka li anɛ tuŋ-tuŋ. Ba pʋʋr la sʋ'ʋlim la da bɛnɛ Juda nɛ Josef dim la teŋsʋk. 12 Ba titɔndig linɛ bɛ ya-datiuŋ la da pin'il nɛ Joodan kɔldaugin la dɔlli yi ya-datiuŋʋ paae Jeriko zuligirin la gaad tuonnɛ dɔl kʋkʋna teŋ la yii ani paae Bet-Aven sian'arin la; 13 ka li yii ani kidig Luz dagɔbʋg zuligirin la (linɛ an Betel la) ka keŋ sigi paae Atarof Addar zuor la datiuŋ dinɛ bɛ Teŋir Bet-Horon la sisɛrim. 14 Ka naan kʋkʋn kanɛ kpa' Bet-Horon ya-dagɔbʋg titɔndigin la gɔnligi lɛb ya-dagɔbʋgʋ dɔl teŋ la tuonnɛ yi Kiriaf Baal (li anɛ Kiriaf Jiarim ka an Juda dim tempʋʋg). Li da lɛb nɛ ya-tuona.
15 Li ya-dagɔbʋg baba la da pin'il Kiriaf Jiarim teŋ la kpikpɛŋ ya-tuona baba, ka titɔndig la keŋ yi Nefitoa kɔlisin la; 16 ka li yʋ'ʋn dɔlis ala sig kʋkʋn la teŋiri kpa'ad Ben Hinnom bɔn'ɔfalig linɛ bɛ Refam bɔn'ɔg ya-datiuŋ la. Ka naan anina dɔlli yi Hinnom bɔn'ɔfaligin la dɛn'ɛn Jebus dim tempʋʋg la sisɛrim ti paae Een-Rogel. 17 Ani ka li da gɔnligi lɛb datiuŋʋ keŋ Een-Semes gaadi keŋ Gilgal, teŋ kanɛ kpa'ad Adumim Suor la, sigid Bohan Kugirin la. Bohan da anɛ Reuben biig; 18 ani ka li da dɔl Bet Araba ya-datiuŋʋ gaadi zuligi sig Araba bɔn'ɔgin, 19 ka tɔ'ɔŋ ala paae Bet-Hogla keŋ yi Yaarim Tɛuk la hali ti paae Joodan kɔldaug la nɔɔrin. Ba ya-datiuŋ la titɔndigi la.
20 Joodan kɔldaug la da an ya-nya'aŋ la titɔndig.
Titɔndis bama da pa'an Benjamin dim la pʋʋri an si'em bɛn-bɛn nɛ gilig wʋsa.
21 Benjamin dɔɔg la da sʋ'oe tempʋsieba nwa tuŋ-tuŋ: Jeriko nɛ Bet-Hogla nɛ Emek-Keziz 22 nɛ Bet Araba nɛ Zemaram nɛ Betel 23 nɛ Avim nɛ Para nɛ Ofra 24 nɛ Kefar Ammon nɛ Ofini nɛ Geba. Tempʋʋd pii nɛ ayi' nɛ ba tembibis. 25 Linɛ pɛ'ɛs anɛ Gibeon nɛ Rama nɛ Beerot 26 nɛ Misipa nɛ Kiefira nɛ Mooza 27 nɛ Rekem nɛ Iripɛɛl nɛ Tarala 28 nɛ Zela nɛ Hailef linɛ an Jebus dim tempʋʋg (linɛ an Jerusalem) la, nɛ Gibea nɛ Kiriaf. Ka ba wʋsa la'as tempʋʋd pii nɛ anaasi nɛ ba tembibis.
Nɛ'ɛŋa da an Benjamin dɔɔg la pʋʋr linɛ an ba tuŋ-tuŋ la din.