Josua 17

Manase

1 Manase da an Josef bikpɛɛm, ka nɛ'ɛŋa da an o yaas la pʋʋr: Makir da an Manase bikpɛɛm. O da anɛ Gilead dim yaab. O yaas da di'e Gilead nɛ Basan tɛɛns la bɔzugɔ, Makir dim la da anɛ soogia kpi'ema. 2 Pʋʋr kaŋa mɛ da anɛ Manase nimbanɛ kpɛlim la wʋsa din, ka ba an Abieza nɛ Helek nɛ Asiriel nɛ Sekɛm nɛ Hifa nɛ Siamida dɔɔd dim. Manase da anɛ Josef biig, ka bama mɛ da an Manase yaas la, ka ba da pʋdigi teŋ la tuŋ-tuŋ.

3 Ka Zelofehad, onɛ da an Hifa biig ka o yaanam an Gilead nɛ Makir nɛ Manase la, da pʋ mɔr biribisɛ, amaa ka mɔr nɛ bipumis ma'aa. Ba yʋda da anɛ Mahla nɛ Noa nɛ Hogila nɛ Milika nɛ Tiza. 4 Ba da keŋi Eleazar onɛ an maanmaan kpɛɛm la san'an, nɛ Nun biig Josua nɛ kpɛɛmnam la ni, yɛli ba ye, “Zugsɔb la da tis Moses nɔɔr ye o tisi ti pʋʋr ti ba'abiis la sʋʋgin.” Alazug Josua da tisi ba pʋʋr nɛ ba ba'abitaaba la mɛn, wʋʋ Zugsɔb la da tis nɔɔr si'em la.

5 Manase pʋʋr la da anɛ paalʋ ka ba mak zin'is piiga, ka Gilead nɛ Basan din linɛ bɛ Joodan kɔldaug la nya'aŋ la pʋ paasɛ, 6 bɔzugɔ Manase dɔɔg la bipumis nɛ biribis wʋsa da la'am di'e ba pʋʋr. Gilead teŋ la anɛ Manase yaas banɛ kpɛlim la din.

7 Manase sʋ'ʋlim la da pin'il nɛ Aser ti paae Mikmeta linɛ bɛ Sekɛm tempʋʋg nya'aŋ la. Titɔndig la yʋ'ʋn da keŋ paae ya-dagɔbʋg naanɛ ani keŋ kpanb nimbanɛ bɛ En Tapua teŋin la. 8 (Manase da paam paalʋ Tapua teŋ kpikpɛŋ, amaa Tapua tempʋʋg mɛŋ linɛ da bɛ Manase titɔndigin la da anɛ Efiram dim la bʋn.) 9 Titɔndig la da kpa'ad ya-dagɔbʋg keŋ paae Kana ku'osuor la. Tempʋʋg sieba da bɛ Efiram sʋ'ʋlim, amaa ka kpi'e nɛ Manase tempʋʋd la. Ka Manase titɔndig la da bɛ nɛ ku'osuor la datiuŋ keŋ tʋn Atɛuk la. 10 Paalʋ kanɛ bɛ ya-dagɔbʋg la anɛ Efiram din, ka ya-datiuŋ la an Manase din. Manase sʋ'ʋlim la da keŋ paae nɛ Atɛuk la, ka tɔnd nɛ Aser sʋ'ʋlim la lɛbisid dagɔbʋg, ka tʋn Isaka sʋ'ʋlim la lɛbisid ya-nya'aŋ.

11 Isaka nɛ Aser sʋ'ʋlim la sʋʋgin Manase mɛ da sʋ'oe Betsean nɛ Ibilam nɛ Dor (linɛ an Nafof-Dor la) nɛ Endo nɛ Taanak nɛ Megido la'am nɛ banɛ zin'ini giligi ba la. 12 La'am nɛ wala Manase dim la da pʋ nyaŋi kad nimbanɛ bɛ tempʋʋsin la yis ka sʋ'ʋgi baa, bɔzugɔ Keenan dim la da gban'e ye asɛɛ ka ba zin'in sʋ'ʋlim kan la ni. 13 Amaa Israel dim la da nɔbig hali ka mɔr kpi'euŋ la, ba da muk Keenan dim la ka ba tʋm tʋʋm kpi'ema tisidi ba, amaa ka pʋ kadi ba yis teŋ la pʋʋgin nyainnɛ.

14 Josef nidib la da yɛl Josua ye, “Bɔɔ kɛ ka fʋ gaŋ zin'ig yinne ma'aa gbin'e paalʋ tisi ti ye li aan ti pʋʋrɛ? Ti nidib zu'oya ka Zugsɔb la mɛ niŋi ti zug bareka hali.” 15 Ka Josua lɛbis ye, “Ya ya'a zu'oe ka Efiram teŋ kʋkʋna baba la pɔɔdi tisi ya, yanam on kem kpɛn' Perizi dim nɛ Refa dim mɔɔgin la kie vɔn'ɔdi paas.” 16 Josef nidib la da lɛbis ye, “Kʋkʋna teŋ la kʋ siaki ti, ka Keenan dim banɛ bɛ bɔn'ɔdin la wʋsa mɛ mɔr kʋnt zaba tɛrekonam. Ba sieba banɛ bɛ Betsean nɛ li teŋkpɛmis nɛ banɛ bɛ Jezireel bɔn'ɔgin la wʋsa mɛ mɔr tɛrekonam la.” 17 Amaa Josua da yɛl Josef yidim banɛ an Efiram nɛ Manase dim la ye, “Ya zu'oya ka mɔr kpi'euŋ; alazug, ya kʋ di'e pʋdigir yinne ma'aanɛ. 18 Ayei, kʋkʋna teŋ la na aan ya din, la'am nɛ linɛ an mɔɔg la, asɛɛ ka ya kie vɔn'ɔdi paas ka li wʋsa aan ya pʋʋr. La'am nɛ Keenan dim la mɔr kʋnt zaba tɛrekonam ka kpi'em la, ya na nyaŋi kadi ba yis.”