Josua 16

Efiram nɛ Manase dim la paami ba tɛɛns

1 Josef dim pʋʋr la da pin'il nɛ Joodan kɔldaugin linɛ bɛ Jeriko teŋ la kpikpɛŋ, lɛbisid Jeriko kɔldaug la nya'aŋ, ka naanɛ ani dɔlis sian'anr la dʋ Betel tempʋʋg linɛ bɛ kʋkʋna teŋin la. 2 Li da naanɛ Betel (zin'ikanɛ ka ba da dɛŋi buon Luz la) gaadi keŋ gaŋ Arik dim titɔndig linɛ bɛ Atarof 3 ka zuligi sig ya-tuona paae Jafilet dim titɔndig ti paae Teŋir Bet-Horon sʋ'ʋlimin la gaadi keŋ Giza tempʋʋgin naae Atɛukʋn la. 4 Ala ka Manase nɛ Efiram dim banɛ an Josef yaas la da di'e ba pʋʋr.

Efiram

5 Nɛ'ɛŋa da an Efiram dim pʋʋr, li da anɛ tuŋ-tuŋ:

Ba sʋ'ʋlim la titɔndig linɛ bɛ ya-nya'aŋ la da naanɛ Atarof Addar paae Zugin Bet-Horon 6 keŋ paae Atɛuk la. Ka yi Mikimataf ya-datiuŋʋ gɔnligi yi ya-nya'aŋi paae Taanaf Siilo gaadi ani paae Yanoa. 7 Li da lɛn naanɛ Yanoa ti paae Atarof nɛ Naara keŋ tʋn Jeriko ka keŋ yi Joodan kɔldaugin la. 8 Ka naan Tapua titɔndigin la keŋ dɔl Kana Bɔn'ɔg la ti paae Atɛukʋn la.

Nɛ'ɛŋa da an Efiram dim la pʋʋr, ba da pʋdig nɛ tuŋ-tuŋ. 9 Li mɛ da la'am kpanb tempʋʋd nɛ ba teŋkpɛmis la wʋsa banɛ ka ba da gaŋi digil Efiram dim la yi Manase dim sʋ'ʋlimin la.

10 Ba da pʋ kad Keenan dim banɛ da bɛ Giza la. Hali ti paae zina Keenan dim nan kpɛn la'am zin' nɛ Efiram nidib amaa li anɛ tilasi tisi ba ye ba tʋm tʋʋm kpi'ema tisi ba.