Josua 21

Levi dim tɛɛns la

1 Levi dim la kpɛɛmnam da kɛn Eleazar onɛ an maanmaan la nɛ Josua onɛ an Nun biig la nɛ Israel dɔɔd banɛ kpɛlim la kpɛɛmnam san'an na. 2 Ba da kɛn Siilo linɛ bɛ Keenan teŋin la na yɛli ba ye, “Zugsɔb la da tis Moses nɔɔr ye ya tisi ti tempʋʋd ka ti zin' ani, nɛ sian'anr linɛ ka ti na kemmi ti niigi.” 3 Alazug, nwɛnɛ Zugsɔb la yɛl Moses si'em la, Israel dim la da tis Levi dim la tɛɛns nɛ sian'anr, linɛ an ba mɛŋ faar la pʋʋgin. 4 Yiiga bʋgʋlʋm-bʋgʋlʋm la da gaŋnɛ Kohat dim la ka li anɛ tuŋ-tuŋ: Levi dim banɛ da an Aaron onɛ an maanmaan la yaas da paam tɛɛns pii nɛ atan' Juda dim sʋ'ʋlimin la, nɛ Simeon dim, nɛ Benjamin dim din la ni. 5 Kohat yaas banɛ kpɛlim la da di'e tɛɛns piiga yit Efiram sʋ'ʋlimin, nɛ Dan dim nɛ Manase dɔɔg pʋsʋk dim la san'an. 6 Gerson yaas la mɛ da di'e tɛɛns pii nɛ atan' yi Isaka dim sʋ'ʋlimin la, nɛ Aser dim, nɛ Naftali dim, nɛ Manase dim la pʋsʋk banɛ bɛ Basan teŋin la. 7 Merari yaas la mɛ da di'e tɛɛns pii nɛ ayi', yit Reuben dim sʋ'ʋlimin, nɛ Gad dim, nɛ Zebulun dimin la.

8 Alazug Israel dim da tis Levi dim la tembama nɛ sian'anr, nwɛnɛ Zugsɔb la da tis Moses nɔɔr si'em la.

9 Lin yi Juda dim nɛ Simeon dim la sʋ'ʋlimin ba da gaŋ tembama nɛ ba yʋda: 10 (Tembama ka ba da nɔki tis Aaron yaas, banɛ da an Kohat, onɛ da an Levi biig la tuŋ dim, bɔzugɔ gaŋir la da linɛ ban zugin yiiga) 11 Ba da tisi ba Kiriaf Ariba (linɛ an Hebron), nɛ paalʋ kanɛ giligi li la wʋsa dinɛ bɛ Juda kʋkʋna teŋ la (Ariba da anɛ Anak saam); 12 amaa pɔɔd nɛ tembibis banɛ gilig tempʋʋg la, ba da nɔki tis nɛ Kaleb onɛ an Jefune biig la ka li aan o din. 13 Ba da tis Aaron onɛ da an maanmaan yaas la Hebron (teŋ kanɛ an suak zin'igi tis onɛ kʋ nid), nɛ Libna 14 nɛ Jatir nɛ Estemoa 15 nɛ Holon nɛ Debir 16 nɛ Ayin nɛ Jueta nɛ Bet Semes la'am nɛ ban kemmi ba kɔnbid zin'isi'a la; tɛɛns awai bɛ Juda nɛ Simeon dim sʋ'ʋlimin. 17 Lin yi Benjamin dim sʋ'ʋlimin la mɛn, ba da tisi ba Gibeon nɛ Geba 18 nɛ Anatof nɛ Alimon la'am nɛ ba kɔnbid kemmʋg zin'ig, li da la'as nɛ tɛɛns anaasi. 19 Tɛɛns banɛ da an Aaron yaas din, banɛ an maanmaannib la wʋsa, da anɛ pii nɛ atan', la'am nɛ ba kɔnbid kemmʋg zin'ig.

20 Kohat dim banɛ kpɛlim an Levi dim la, ba da pʋdig Efiram dim la dinɛ tisi ba: 21 Efiram kʋkʋna teŋ la ba da tisi ba Sekɛm (dinɛ an suak teŋ tis onɛ wʋsa kʋ nid) nɛ Giza 22 nɛ Kibzam nɛ Bet-Horon, la'am nɛ ba kɔnbid kemmʋg zin'ig, li da la'as nɛ tɛɛns anaasi. 23 Lin yi Dan dim sʋ'ʋlimin la mɛn, ba da di'e Elitek nɛ Gibɛton 24 nɛ Aijalon nɛ Gaf Rimmon la'am nɛ ba kɔnbid kemmʋg zin'ig, li da la'as nɛ tɛɛns anaasi; 25 ka Manase dɔɔg pʋsʋk la sʋ'ʋlimin ba da di'e Taanak nɛ Gaf Rimmon la'am nɛ ba kɔnbid kemmʋg zin'ig, li da la'as nɛ tɛɛns ayi' 26 Tembama wʋsa nɛ ba kɔnbid kemmʋg zin'is la, ba da nɔki tis nɛ Kohat tuŋ dim la.

27 Levi dim banɛ an Gerson tuŋ dim la da di'e Manase dɔɔg pʋsʋk la san'an, Golan linɛ bɛ Basan la (dinɛ an suak teŋ tis onɛ wʋsa kʋ nid), nɛ Beestara, la'am nɛ ba kɔnbid kemmʋg zin'ig, li da la'as nɛ tɛɛns ayi'; 28 lin yi Isaka dim sʋ'ʋlimin la Kisiyon nɛ Dabɛraf 29 nɛ Jarimuf nɛ Een-Ganim la'am nɛ ba kɔnbid kemmʋg zin'ig, li da la'as nɛ tɛɛns anaasi. 30 Lin naam Aser sʋ'ʋlimin la, Misial nɛ Abidon 31 nɛ Helikaf nɛ Rehob la'am nɛ ba kɔnbid kemmʋg zin'ig, li da la'as nɛ tɛɛns anaasi. 32 Naftali dim sʋ'ʋlimin la, ba da gaŋnɛ Kedes linɛ bɛ Galile (teŋ kanɛ an suak teŋ tis onɛ wʋsa kʋ nid) nɛ Hammof Dor nɛ Kaatan la'am nɛ ba kɔnbid kemmʋg zin'ig, li da la'as nɛ tɛɛns atan' 33 Gerson tuŋ dim la tɛɛns wʋsa da anɛ pii nɛ atan' la'am nɛ ba kɔnbid kemmʋg zin'is.

34 Merari tuŋ la (Levi dim banɛ kpɛlim la) ba da gbin'e nɛ Zebulun dim sʋ'ʋlimin la tisi ba, ka li anɛ Jokneam nɛ Kaata 35 nɛ Dimna nɛ Nahalal la'am nɛ ba kɔnbid kemmʋg zin'ig. Li da la'as nɛ tɛɛns anaasi. 36 Lin naam Reuben dim sʋ'ʋlimin la, ba da gaŋnɛ Bezer nɛ Jahaz 37 nɛ Kedemof nɛ Mefaaf la'am nɛ ba kɔnbid kemmʋg zin'ig. Li da la'as nɛ tɛɛns anaasi. 38 Gad sʋ'ʋlimin la mɛn, ba da gaŋnɛ Ramot linɛ bɛ Gilead (teŋ kanɛ an suak teŋi tis onɛ wʋsa kʋ nid) nɛ Mahanam 39 nɛ Hesbon nɛ Jaza la'am nɛ ba kɔnbid kemmʋg zin'ig. Li wʋsa da la'as nɛ tɛɛns anaasi. 40 Tɛɛns banɛ ka ba da tis Merari dɔɔd banɛ da kpɛlim an Levi dim la da anɛ pii nɛ ayi'.

41 Levi dim tɛɛns banɛ da bɛ ba sʋ'ʋlimin ka Israel dim sʋ'oe la da anɛ pisnaasi nɛ anii, la'am nɛ kɔnbid kemmʋg zin'is la. 42 Tembama wʋsa yinne-yinne da mɔr kɔnbid kemmʋg zin'igi giligi ba, li da anɛ ala nɛ tembama la wʋsa.

Teŋ la di'er wʋsa da naae si'em

43 Alazug Zugsɔb la da tis Israel dim paalʋ kanɛ ka o da pɔɔ zi'el ye o na tisi ba yaanam la wʋsa, ka ba sʋ'ʋgi li ka zin'inɛ ani. 44 Zugsɔb la da tisi ba vʋ'ʋsʋm, zin'ig wʋsa wʋʋ on da pɔ si'em zi'eli ba yaanam la. Ba dataas la baa yinne da pʋ nyaŋi zab nɛ ba, Zugsɔb la da nɔki ba dataas wʋsa niŋi ba nu'usin la zug. 45 Zugsɔb la da kaanb si'em tis Israel dim la baa yinne da pʋ gʋ'ʋŋɛ; li wʋsa da maal ya.