Josua 22

Israel dim banɛ bɛ Joodan Kɔldaug ya-nya'aŋ la lɛbi kul

1 Josua da la'as Reuben dim la na nɛ Gad dim la nɛ Manase dim pʋsʋk la, 2 yɛli ba ye, “Ya tʋm Moses onɛ an Zugsɔb tʋmtʋm la tis nɔsi'a la wʋsa, ka mɛ siak man nɔɔr nɛ man yɛli ya si'el la wʋsa. 3 Hali lin yuugi ti paae zina la, ya pʋ basi ya ba'abiis la, amaa ya tʋm tʋʋm kanɛ ka ya Zugsɔb Wina'am tisi ya ye ya tʋm la. 4 Nannanna ya Zugsɔb Wina'am la yʋ'ʋn tisi ya ba'abiis la vʋ'ʋsʋm wʋʋ on da zi'el nɔɔr si'em la. Lɛmmini ya yaan, teŋ kanɛ ka Moses onɛ an Zugsɔb tʋmtʋm la da tisi ya, Joodan kɔldaug gbɛkaŋa la. 5 Amaa, gu'usimi sʋ'ʋŋa ka siaki zi'ela banɛ ka Moses onɛ an Zugsɔb tʋmtʋm da tisi ya la, ye ya nɔŋi ya Zugsɔb Wina'am, ka dɔl o suoya la ka siak o zi'ela la wʋsa, ka gban'e o nu'us ayi', ka tʋmmi tisid o nɛ ya sʋnf wʋsa nɛ ya siig wʋsa.” 6 Ka Josua niŋi ba zug bareka ka basi ba ye ba kem, ka ba wʋsa da kuli ba yaan. 7 (Moses da tis Manase dɔɔg la pʋsʋk paalʋ Basan teŋin, Josua mɛ da tis pʋsʋk kanɛ kpɛlim la paalʋ Joodan tuon la, kpi'en nɛ ba ba'abiis la). Josua da niŋi ba zug bareka ka kɛ ka ba kul. 8 O da yɛli ba ye, “Lɛmmini ya yaan nɛ arezak tita'ar linɛ an bʋnkɔbid bɛdegʋ nɛ anzurifa nɛ sanlima nɛ kʋntzɛn'ug nɛ kʋnt nɛ fuud bɛdegʋ ka ya faaɛn ya dataasin la. Mɔrini li wʋsa kul ka pʋdigi nɛ ya ba'abiis la.” 9 Alazug Reuben dim nɛ Gad dim nɛ Manase dim la pʋsʋk da bas Israel dim la Siilo tempʋʋgin, Keenan teŋin la, ka lɛbi keŋ Gilead ba mɛŋ teŋin linɛ ka ba da pʋn di'e nwɛnɛ Zugsɔb la da yɛl Moses si'em la.

10 Ban da nam bɛ Keenan teŋin la ka paae Gelilof teŋ dinɛ kpi'e Joodan la, Reuben dim nɛ Gad dim nɛ Manase dim pʋsʋk la, ba da mɛ' pʋ'ʋsim bimbim tita'ar linɛ vɛnl ani, Joodan kɔldaug nɔɔrin. 11 Ka Israel dimi wʋm ye ba mɛ' bimbim Keenan titɔndig linɛ bɛ Gelilof teŋin kpi'e nɛ Joodan ka bɛ Israel dim baba la, 12 Israel dim wʋsa da la'as taaba ye ba keŋ zab nɛ ba.

13 Israel dim la da tʋm Finehas onɛ an maanmaan ka an Eleazar biig la, ye o lɔ'ɔŋi paae Gilead teŋinɛ keŋ Reuben nɛ Gad nɛ Manase dim pʋsʋk la san'an. 14 Tuongatib yinne-yinne da yi dɔɔg piiga la wʋsa ni dɔl Finehas nya'aŋi keŋ. 15 Ba da keŋ paae Reuben nɛ Gad nɛ Manase dim la san'an Gilead teŋin yɛli ba ye, 16 “Zugsɔb nidib la wʋsa sʋnf san'am nɛ ka ba bu'osid taaba ye, ‘Bɔ ka ya tʋm tʋʋmbɛ'ɛd kaŋa linɛ ka Israel Wina'am la kisa? Wala ka ya fɛndig Zugsɔb la san'an ka mɛ' bimbimi tisi ya mɛŋ ka zan'as o nɔɔr nannanna? 17 Tʋʋmbɛ'ɛd kanɛ ka ti da tʋm Peor baba ka Zugsɔb da tɛɛgi ti tʋbir la pʋ siak yanamɛ na zamis ya'am? Din keŋ paae zina ti nam pʋ pie tʋʋmbɛ'ɛd kanɛ, la'am nɛ tinamɛ da namisi li yɛla la. 18 Ya gban'e nɛ ye ya kʋ lɛn dɔl oo? Ya ya'a zan'as ka pʋ dɔl Zugsɔb la zinaa, bɛogɔ o sʋnf na pɛlig nɛ Israel dim wʋsa. 19 Teŋ kanɛ ka ya bɛ la ya'a an bɛ'ɛd, yanam kem Zugsɔb la teŋin na, zin'ikanɛ ka o Fuug Sʋgʋr bɛ la, ka tinam nɛ yanam pʋdigi ti paalʋ la. Amaa da zan'asi Zugsɔb la nɔɔr bɛɛ ya zan'as tinam nɔɔr ka mɛ' bimbimi tisi ya mɛŋ ka li ya'a ka'anɛ Zugsɔb onɛ aan ti Wina'am bimbim la ma'aanɛ. 20 Ya pʋ tɛnraa? Zera yaaŋ Akan onɛ da zan'as Zugsɔb la da tis nɔɔr ye ba san'am teŋ la la'ad wʋsa la, Israel dim wʋsa da namisi li zug. Li ka' on ma'aa da kpi o tʋʋmbɛ'ɛd la zugɔ.’ ”

21 Ani ka Reuben dim, nɛ Gad dim, nɛ Manase dim pʋsʋk la da lɛbisi yɛl Israel tuongatib la ye 22 “Zugsɔb la an Paŋtita'ar Sɔb! Zugsɔb onɛ an Wina'am Paŋtita'ar Sɔb la, onɛ mi'. Kɛl ka Israel dim baŋ ye, nɛ' ya'a anɛ ti zan'as nɛ Zugsɔb la nɔɔr bɛɛ ti tʋbiri zian'asi tis Zugsɔb la, yanam da basi ti zinaa. 23 Ti ya'a mɛnɛ ti mɛŋ bimbim ye ti fɛndig ka bas Zugsɔb la ka yuki maannɛ ti mɛŋ maana li zug, ka li anɛ linɛ nyu'od bugum, bɛɛ zʋʋd maan, bɛɛ taaba la'asʋg maan la buudi wʋsa, Zugsɔb la mɛŋ on tɛɛgimi ti tʋbir. 24 Ayei! Linɛ kɛ ka ti niŋ ala la anɛ ye ti zɔtnɛ ye daasi'erɛɛ ya yaas na ti bu'osi ti yaas ye, ‘Ya mɔr kpinnim bɔ nɛ Zugsɔb onɛ an Israel Wina'am la? 25 Zugsɔb la kɛ ka Joodan an titɔndig tinam nɛ yanam teŋsʋk yanam Reuben nɛ Gad dima, ya ka' pʋʋr Zugsɔb la san'anɛ!’ Alazug ya yaas pa'ati kɛ ka tinam yaas pʋ lɛn zɔt Zugsɔb laa. 26 Linzug ka ti yɛl ye, ti na la'asi mɛ' bimbim, ka li ka'anɛ maan kanɛ nyu'od bugum bɛɛ maan sieba zugɔ, 27 amaa nɛ'ɛŋa na an kasɛta tinam nɛ yanam sʋʋgin nɛ zʋmaaŋ banɛ na ti duoe na la. Linɛ na kɛ ka ti na kpɛm pʋ'ʋsid Zugsɔb la o Fuug Sʋgʋrin la nɛ maana banɛ an nyu'or maana nɛ taaba la'asʋg maana. Ka bɛog sa ya yaas kʋ nyaŋi yɛli ti yaas ye, ‘Ya ka' kpinnim nɛ Zugsɔb laa!’ 28 Ka ti yɛl ye ti gban'e nɛ ye bɛog sa ba ya'a bu'os tinam bɛɛ ti yaas, ti na lɛbisi ba ye, ‘Gɔsima! Ti yaanamɛ da mɛ' bimbim ka li nwɛnɛ Zugsɔb bimbim la nɛ, ka li ka'anɛ maana linɛ nyu'od bɛɛ maan sieba zugɔ, amaa li anɛ kasɛt tinam nɛ yanam sʋʋgin.’ 29 Ayei, Win na yis ka tinam ki'is Zugsɔb la ka yuk ka bas o zina ka mɛ' bimbimi maan maana buudi wʋsa ka li ya'a ka'anɛ Zugsɔb onɛ aan ti Wina'am la bimbim linɛ bɛɛ o sʋgʋrin, o pʋ'ʋsim zin'ig tuon laa.”

30 Finehas onɛ an maanmaan, nɛ tuongatib la, da kɛlis Reuben, nɛ Gad, nɛ Manase dim la da yɛl si'el la ka li niŋi ba malisim. 31 Finehas da yɛli ba ye, “Zina ti baŋ ya ye Zugsɔb la sid bɛ nɛ ti, bɔzugɔ ya pʋ tʋm biriku'an tʋʋmaa, amaa ka faaɛn ti yi Zugsɔb la tʋbtɛkir la pʋʋgin.” 32 Finehas nɛ tuongatib la ban da zin'in nɛ Reuben nɛ Gad dim Gilead teŋin naae la, ba da lɛb Keenan teŋin na ye ba yɛli tis Israel dim la. 33 Ba sʋnf da malis nɛ ban wʋm labasi'a la, ka na'as Wina'am yʋ'ʋr, ka bas ban gban'e ye ba keŋ zab ka san'am Reuben dim nɛ Gad dimi bɛ teŋ si'a la. 34 Reuben nɛ Gad dim da pʋd bimbim la yʋ'ʋr ye, Li anɛ Kasɛta tinam nɛ yanam sʋʋgin ye Zugsɔb la anɛ Wina'am.