Josua 23

Josua kɛɛsʋg pian'ad

1 Zugsɔb la da tis Israel dim vʋ'ʋsʋm ba dataas banɛ giligi ba la nya'aŋ la, li da yuug ya hali ka Josua yʋ'ʋn da kʋdig pamm. 2 Alazug ka o da la'as Israel dim wʋsa, ba kpɛɛmnam nɛ bʋnkʋt nɛ tuongatib nɛ sariakatib nɛ kpi'emnamɛ yɛli ba ye, “Mam yʋ'ʋn kʋdig nɛ hali. 3 Yanam mɛŋ nyɛ Zugsɔb onɛ aan ya Wina'am la kpɛn' ya zug ka maal tembanɛ giligi ya la si'em ya yɛla; li da anɛ Zugsɔb onɛ aan ya Wina'am la zabi tisi ya. 4 Tɛnri mam pʋdig zin'is la tisi ya dɔɔd wʋsa ye li aan ya faar si'em; teŋgbauŋ banɛ kpɛlim la nɛ tembanɛ ka m pʋn zabi nyaŋ ka li yi Joodan kɔldaugin hali ti paae Atɛuk Tita'ar la lɛbisid ya-tuona baba la. 5 Zugsɔb onɛ aan ya Wina'am la mɛŋi na kadi ba yis, ka bas suori tisi ya ka ya sʋ'ʋg teŋ la wʋʋ on da kaanbi zi'eli ya si'em la. 6 Kpɛ'ɛŋimini ya mɛŋ, ka gu'usi ka siaki linɛ wʋsa sɔb Moses zi'ela gbauŋʋn la, ka da fɛndigi lɛbi datiuŋ bɛɛ dagɔbʋga. 7 Da nɔki ya mɛŋi la'asi nɛ nimbanɛ na kpɛlim bɛ nɛ ya tembanɛ ka ya la'am bɛ la. Da buonnɛ ba bada la yʋda bɔɔd sʋŋirɛ, bɛɛ pɔɔd nɛ ba yʋ'ʋrɛ. Da dɔlli nɛ ba bɛɛ igini ba tuonnɛ. 8 Amaa li anɛ ya gban'e Zugsɔb onɛ aan ya Wina'am la kiŋ-kiŋ nwɛnɛ yanamɛ da mɔr o si'em ti paae zina la. 9 Zugsɔb la gaad tuonnɛ kad buudtitada nɛ teŋ kpi'ema nidib. Hali ti paae zina sɔ' nan zi' nyaŋi zab nɛ ya. 10 Ya nid yinne na nyaŋi kadi ba tusir bɔzugɔ Zugsɔb onɛ aan ya Wina'am la zabidi tisidi ya wʋʋ on da zi'el nɔɔr si'em la.

11 “Alazug gu'usimi sʋ'ʋŋa ka nɔŋi Zugsɔb onɛ aan ya Wina'am la. 12 Da yuki nɔki ya mɛŋi la'as nɛ tɛɛns banɛ kpɛlim la nidiba, bɛɛ dii ba pu'asada bɛɛ kuli ba dasamma. 13 Ya ya'a niŋ ala, yanam on baŋim ye Zugsɔb onɛ aan ya Wina'am la kʋ lɛn gaad tuonnɛ kad tɛɛns la dim ka tisi ya suorɛ. Ba lɛɛ na lieb bɛndis bɛndi ya ka lieb sisanbisi fiebi ya nya'aŋ, nɛ gɔn'ɔsi kunsidi ya nini hali ka ya ti bɔdig teŋ sʋŋ kaŋa linɛ ka Zugsɔb onɛ aan ya Wina'am la tisi ya la.

14 “Tɔ, nannanna m kum saŋa paaeya. Ya mi' nɛ ya sʋʋnr nɛ ya siig wʋsa ye Zugsɔb la kaanb bareka sieba tisi ya la baa yinne pʋ lu teŋa. Li wʋsa niŋnɛ wʋʋ on kaanb si'em la. 15 Amaa baŋimi sʋŋa ye Zugsɔb onɛ aan ya Wina'am la niŋi ya zug albareka nwɛnɛ on da kaanb si'em la, ala mɛn ka o na kɛ ka yɛlbɛ'ɛd kanɛ ka o yɛl ye li na paae ya la sid na kena san'ami ya wʋsa teŋ sʋŋ kanɛ ka o tisi ya nwa ni. 16 Ya ya'a san'ami ya Zugsɔb Wina'am nɔnaar linɛ ka o zi'eli tisi ya la, ka keŋ maal winsieba iginidi ba tuon, Zugsɔb la sʋnpɛɛn na la'aŋi ya wʋʋ bugum nɛ, ka ya na bɔdig tɔ'ɔtɔ teŋ sʋŋ kanɛ ka o tisi ya la zug.”