<<    <     Josua     24     >    >> 
Ba lɛn tɛndig Nɔnaar Sekɛm teŋin
24
1 Josua da la'as Israel buudi dim la wʋsa Sekɛm teŋin. O da buol tuongatib nɛ kpɛɛmnam nɛ sariakatib nɛ kpi'emnam ka ba kɛn Wina'am tuon na. 2 Josua da yɛl nidib la wʋsa ye, “Zugsɔb Onɛ an Israel Wina'am la yɛl si'eli nwa: ‘Kʋdimin sa, ya yaanam, la'am nɛ Tera onɛ da an Abraham nɛ Nahor saam la, da zin'inɛ kɔldaug kanɛ buon Efiritis la nya'aŋ ka pʋ'ʋsid winsieba. 3 Amaa m da yisi ya yaab Abraham teŋ kanɛ bɛ kɔldaug la nya'aŋi mɔr o kpɛn' Keenan teŋinɛ dɔl o giligi li wʋsa ka kɛ ka o paam yaas bɛdegʋ. M da kɛ ka o du'a Isaak, 4 ka Isaak mɛ du'a Jakob nɛ Esau. M da nɔk Edom teŋi tis Esau, zin'ikanɛ ka zuoya bɛ la, amaa Jakob nɛ o biis da keŋnɛ Egipt teŋin.
5 “ ‘Li nya'aŋ ka m da tʋm Moses nɛ Aaron ka kɛ ka Egipt dim la nyɛ tɔɔg bɛdegʋ man da maal si'el ani la zug, ka yʋ'ʋn da yisi ba na. 6 Man da yisi ya yaanam Egipt teŋin la, ba da paae Atɛuk Zɛn'ugʋn na ka Egipt dim la kadi ba bugir nɛ zaba tɛrekonam nɛ banɛ ban'ad widi zabid la paae ani. 7 Amaa ba da kaasi buol Zugsɔb la bɔɔd sʋŋir, ka o kɛ ka lik kɛn ban nɛ Egipt dim la teŋsʋk na. O da kɛ ka Atɛuk la ku'om la dii ba. Ka ya nyɛ nɛ ya mɛŋ nini man tʋm Egipt dim la tʋʋm si'a. Ka ya gilig sian'arin la yuug pamm.
8 “ ‘M da mɔri ya keŋ paae Amor dim banɛ bɛ Joodan nya'aŋ la. Ba da zab nɛ ya ka m kɛ ka ya nyaŋi ba. Man Wina'am da san'ami ba ka tisi ya suor ka ya sʋ'ʋgi ba teŋ la. 9 Lin nya'aŋ ka Balak onɛ an Zippor biig ka da lɛn an Moab dim na'ab la da ti'eb ye o zab nɛ Israel dim. O da tʋm buol Balaam onɛ an Beor biig la ye o kena pɔ nɔɔri niŋi ba. 10  Amaa m da pʋ siaki tis Balaam, ka o lɛɛ da niŋi ya bareka; ka m faaɛn ya yii Balak nu'usin.
11 “ ‘Ya da lɔ'ɔŋ Joodan kɔldaug la keŋ paae Jeriko teŋin. Jeriko teŋ nidib da zab nɛ ya nwɛnɛ Amor dim nɛ Perizi dim nɛ Keenan dim nɛ Hitti dim nɛ Girgas dim nɛ Hivi dim nɛ Jebus dim la da niŋ si'em la, amaa m da kɛ ka ya nyaŋi ba. 12  M da kɛ ka tangbɛɛnlnam sigi ba sʋʋgin na kadi ba ka ba zɔ ka ya nyaan paae. Ka mɛ niŋ ala nɛ Ammon dim na'anam ayi' la. Li da ka'anɛ ya mɛŋ zaba sʋ'ʋg bɛɛ tiraug ka ya da nyaŋi ba. 13 Manɛ tisi ya teŋ linɛ ka ya pʋ namisi li yɛllɛ nɛ tempʋʋd banɛ ka ya pʋ mɛɛ, ka ya bɛɛ ani ka dit vain nɛ olif pɔɔd la nyɔɔd ka lɛɛ pʋ sɛɛ ba.’
14 “Nannanna tisimi Zugsɔb la girima ka dɔlli nɛ o nɛ sida. Basimi bada banɛ ka ya yaanam da dɔl kɔldaug la nya'aŋ nɛ Egipt teŋin la ka dɔl Zugsɔb la. 15 Amaa ya ya'a tɛn'ɛs ye Zugsɔb la dɔllim ka' sʋ'ʋm tisi ya, yanam on gaŋim zina onɛ ka ya na dɔl. Ya ya'a na gaŋnɛ ya yaanamɛ da dɔl ba'asieba kɔldaug nya'aŋ la bɛɛ Amor dim, banɛ ka ya bɛɛ ba teŋin la wina, yanam gaŋimi. Amaa ya'a kpɛlimnɛ man nɛ m yidim, tinam na dɔl Zugsɔb la.”
16 Nidib la da lɛbis ye, “Win da kɛ ka ti bas Zugsɔb la dɔllim ka dɔl winsieba! 17 Li da anɛ Zugsɔb onɛ aan ti Wina'am la mɛŋi yisi ti Egipt teŋin, zin'ikanɛ ka ti da an yammis la, ka maal tʋʋmnyalima ka ti nini nyɛ. O da guri ti, ti suor la ken pʋʋgin, la'am nɛ tinamɛ da dɔl teŋ sieba gaad la, ka yisi ti nidib la wʋsa nu'usin. 18 Zugsɔb la kad tɛɛns la dim, la'am nɛ Amor dim banɛ da bɛ teŋin la. Tinam mɛ na dɔl Zugsɔb la, bɔzugɔ o anɛ ti Wina'am.” 19 Amaa Josua da yɛl nidib la ye, “Ayei, ya kʋ nyaŋi dɔl Zugsɔb la. O anɛ Wina'am onɛ an kasi; o anɛ Wina'am onɛ mɔr fufum. O kʋ tami ya ki'isʋg nɛ ya tʋʋmbɛ'ɛd la yɛllɛ. 20 Ya ya'a zan'as Zugsɔb la ka dɔl buudzʋna bada, o na fɛndig ka kɛ ka san'auŋ paae ya ka ya kpi'ilim, la'am nɛ on dɛŋi an sʋ'ʋm tisi ya la.”
21 Amaa nidib la da yɛl Josua ye, “Ayei! Tinam na dɔl Zugsɔb la!” 22 Ka Josua yɛl nidib la ye, “Yanam mɛŋ di kasɛti tisi ya mɛŋ ye ya gaŋnɛ ye ya na dɔl Zugsɔb la.” Ka ba lɛbis ye, “Ɛɛn, tinam mɛŋi aan ti kasɛtib!”
23 Josua da yɛli ba ye, “Nannanna yʋ'ʋn lɔmmi buudzʋna bada linɛ bɛɛ ya san'an la bas, ka pɛligi ya sʋnya tis Zugsɔb, Israel Wina'am la!” 24 Ka nidib la yɛl Josua ye, “Tinam na dɔl Zugsɔb onɛ aan ti Wina'am la ka siak o nɔɔr.”
25 Daakan la Josua da maal nɔnaari tis nidib la, ka gban'e gban'ar nɛ ba, ka tisi ba zi'ela, Sekɛm teŋin la. 26 Josua da sɔbi li niŋ Wina'am wada gbauŋ la pʋʋgin, ka lɛn nɔk kugtita'ari ba'a li zi'el sappi titita'ar gbinnin, kpi'el Zugsɔb mɛŋ zin'ikanɛ an kasi la ni. 27 O da yɛl nidib la ye, “Gɔsimi! Kugkaŋa ye li anɛ kasɛti guri ya. Li wʋm Zugsɔb la pian'abanɛ ka o yɛli ti la wʋsa. Li na zi'enɛ di kasɛt, ya ya'a ka' sida dim Wina'am san'anɛ.”
Ban mum sieba teŋin la
28 Josua da kɛ ka sɔ' wʋsa lɛbi o faari bɛ zin'isi'a.
29 Nɛ'ɛnam nya'aŋ la, Josua onɛ an Nun biig ka lɛn an Zugsɔb tʋmtʋm la da anɛ yʋma kɔbiga nɛ piiga ka nyaan kpi. 30 Ka ba mum o zin'ikanɛ ka o sʋ'oe ka li bɛ Timnaf Sera linɛ bɛ Efiram dinɛ an kʋkʋna teŋ la, lɛbisid Gaas zuor la ya-datiuŋ.
31 Israel da dɔl Zugsɔb la sʋ'ʋŋa Josua vʋm saŋa la wʋsa, nɛ kpɛɛmnam banɛ da bɛ ka Josua nan kae ka mi' bʋn linɛ wʋsa ka Zugsɔb la tʋm tis Israel dim la.
32 Josef kɔnba linɛ ka Israel dim da zii mɔri yi Egipt teŋin na la mɛn, ba da mɔri li keŋ Sekɛm teŋinɛ mum zin'ikanɛ ka Jakob da nɔk anzurifa ligidi kɔbiga da' Hamor, onɛ saamme an Sekɛm la biis la san'an. Teŋ kaŋa da lieb Josef yaas la faar.
33 Ka Eleazar onɛ an Aaron biig la mɛ kpi ka ba mum o Gibea teŋin, zin'ikanɛ bɛ Efiram linɛ an kʋkʋna teŋ, ka ba da gaŋi li tis o biig Finehas la.