Zaba ken wada
20
1 Moses da yɛli ba ye, “Ya ya'a keŋ zabid nɛ ya dataas ka nyɛ ka ba mɔr widi nɛ zaba tɛrekonam nɛ soogianam ka ba zu'oe gati ya, yanam da zɔt dabiem, bɔzugɔ, ya Zugsɔb Wina'am onɛ mɔri ya yi Egipt na la na bɛ nɛ ya. 2 Ya ya'a ti bɔɔd ye ya keŋ zab, maanmaan la na yii ya tuon na pian' tisi ya. 3 O na yɛl ye, ‘Yanam Israel dima, kɛlisimi! Zina ka ya wa'ae ye ya zab nɛ ya dataas la. Da kɛ ka ya ya'am iank bɛɛ dabiem mɔri ya. Da kiridi ka dabiem kpɛn' ya. 4 Li anɛ Zugsɔb onɛ aan ya Wina'am la na dɔlli ya keŋ zab nɛ ya dataas la ka ya na nyaŋi ba.’ 5 Kpɛɛmnam la mɛ na yɛl soogianam la ye, ‘Sɔ' mɛ' yipaal ka nam pʋ yɔ'ɔgi lii? O sɔb lɛm kul, ka o na ti keŋ kpi zaba la ni ka sɔ' sa lɛdigi yɔ'ɔgi li. 6 Sɔ' mɛ sɛ vain tiis pɔɔg ka nam pʋ dii li nyɔɔdɛɛ? On sɔb lɛm kul, ka o na ti keŋ kpi zaba la ni ka sɔ' sa lɛdigi dii li nyɔɔd. 7 Ba tis sɔ' pu'a ka o nam pʋ dii? On sɔb lɛm kul, ka o na ti keŋ kpi zaba la ni ka sɔ' sa lɛdigi di o pu'a la.’ 8 Kpɛɛmnam la na lɛm bu'os ye, ‘Sɔ' zɔt dabiem bɛɛ o ya'am ian'adaa? O lɛm kul ka da ti taas o ba'abitaaba laa.’ 9 Kpɛɛmnam la ya'a ti pian' naae, ba na gaansi ba tuongatibi tisi ba. 10 Ya ya'a ti keŋ paae tempʋʋg si'a ye ya zab, yanam tisimi ba sumbʋgʋsʋm gɔs ye ba na nɔki ba mɛŋi tisi yaa. 11 Ba ya'a siak ka yɔ'ɔgi ba za'anɔya tisi ya, nimbanɛ bɛɛ anina la wʋsa anɛ ban na tʋm tisi ya. 12 Ba ya'a zan'as sumbʋgʋsʋm ka di'e ya nɛ zaba, yanam giligim tempʋʋg kan la. 13 Zugsɔb onɛ aan ya Wina'am la ya'a nɔk teŋ la niŋi ya nu'usin, yanam kʋʋm dap banɛ bɛɛ ani la wʋsa. 14 Ya'a kpɛlim pu'ab nɛ biis nɛ bʋnkɔnbid nɛ linɛ bɛ tempʋʋgin la wʋsa, yanam mɔri kul ka li anɛ ya zab nɛ faaɛn. Nɔkimi linɛ ka ya Zugsɔb Wina'am kɛ ka ya faaɛn ya dataasin la maal yanamɛ bɔɔd si'em. 15 Yanamɛ na maal tɛɛns banɛ lal nɛ ya si'em la ka ka' tɛɛns banɛ kpi'e nɛ ya sʋ'ʋlim la. 16 Amaa tɛɛns banɛ ka ya Zugsɔb Wina'am nɔki tisi ya ka li aan ya faar la, da basi bʋnvʋr linɛ vʋ'ʋsid baa yinnee. 17 San'ami Hitti dim nɛ Amor dim wʋsa nɛ Keenan dim nɛ Perizi dim nɛ Hivi dim nɛ Jebus dim la wʋsa nyain, nwɛnɛ Zugsɔb onɛ aan ya Wina'am la yɛli ya si'em la. 18 Ya'a ka' ala, ba na pa'ali ya yɛlkisa banɛ ka ba niŋid ka pʋ'ʋsidi ba wina la ka ya na tʋm tʋʋmbɛ'ɛdi pɔ'ɔgi ya Zugsɔb Wina'am. 19 Ya ya'a paae tempʋsi'a ye ya zabi faaɛn sʋ'ʋgi li ka giligi li ka li yuug, yanam da nɔk zɛnnire nwaae li tiisi lugɛ, bɔzugɔ ya na dii ba wala. Tiis la ka'anɛ nidib ka ya ye ya giligi ba zabɛ! 20 La'am nɛ wala ya na tun'e nwa tibanɛ ka ya mi' ye ba pʋ wan la ka nɔki maal la'abanɛ na sʋŋi ya ti paae saŋa kanɛ ka ya zabi nyaŋ tempʋʋg la.”