Zi'elʋg 21

Sɔ' na kpi ka ba zi' onɛ kʋ o suguru sɔsʋg

1 Sɔ' ya'a kpii dig paalʋ, teŋ kanɛ ka Zugsɔb onɛ aan ya Wina'am tisi ya ye ya sʋ'oe la ni, ka sɔ'ɔsɔ zi' onɛ kʋʋ o, 2 ya kpɛɛmnam nɛ sariakatib la na yii keŋ mak on kpi zin'isi'a la lallim nɛ tempʋʋd banɛ kpi'e anina la, 3 ka baŋ tempʋkanɛ kpi'e kum la dig si'el la. Ka teŋ la kpɛɛmnam na nɔk na'asa'a kanɛ nam pʋ kuaa ka nam pʋ kɔr yɔksin daug o niŋgɔɔnrinɛ, 4 mɔr o sig bɔn'ɔg kanɛ ka ba nam pʋ kua bɛɛ bʋdɛ, ka an zin'ikanɛ ka ku'om pʋbid. Bɔn'ɔg kan la ni ka ba na nwɛ' na'asa'a la niŋgɔɔnri kʋ. 5 Maanmaannib la nɛ Levi dim la na gaad tuon bɔzugɔ, ban ka Zugsɔb onɛ aan ya Wina'am la gaŋ ye ba tʋmmi tisid o ka sɔsid albareka tisidi ya on Zugsɔb la yʋ'ʋr zug, ka na maan antu'a nɛ zaba yɛla wʋsa. 6 Lin mɛn kpɛɛmnam la wʋsa banɛ bɛ tempʋkanɛ kpi'e kum la na pie ba nu'us na'asa'a kanɛ ka ba kʋ la zug, 7 ka na pian' nie nyain ye, “Ti nu'us kae nid nwa kum la ni bɛɛ ti nini nyɛɛ o kum. 8 Di'emi ti suguru sɔsʋg maan nwa: Zugsɔba, ti anɛ fʋ nidib Israel dim banɛ ka fʋ faaɛn ti bas la, da nɔki ti taal nɛ ninkanɛ kpi nwa yɛlaa.” Ka li na yɔ ziim kanɛ kpa'ae la yɛla. 9 Ala ka ya na fuoe ya mɛŋ nɛ ninkanɛ kpi la yɛla, yanamɛ sadigim maal linɛ dɔl suor Zugsɔb tuon la.

Pu'a kanɛ an yammʋg diib yɛla

10 Ya ya'a keŋ zab nɛ ya dataas, ka Zugsɔb onɛ aan ya Wina'am la nɔki ba niŋi ya nu'usin ka ya nyaŋi gban'e ba ka ba aan ya yammis, 11 fʋ ya'a nyɛ yammis la ni ka pu'a vɛnliŋ bɛ ani ka fʋ ya'am kpɛn' o, fʋ na nyaŋi nɔk o ka o aan fʋ pu'a. 12 Mɔr o kuli fʋ yin na, ka kɛ ka o pʋni o zug ka sɛɛli o nu'u-ɛɛns nɛ o nɔb-ɛɛns, 13 ka yis fubanɛ ka o yɛ ka fʋ gban'e o la. O ya'a bɛɛ fʋ yin la ka kaasi o ba' nɛ o ma' yɛla nwadig mumi naae, fʋ yʋ'ʋn na keŋ nɔk o ka fʋ liebi o sid ka on mɛ liebi fʋ pu'a. 14 Fʋ ya'am ya'a ti pʋ lɛm bɔɔd o, fʋn basim o ka o keŋ on bɔɔd si'el. Da kuos o bɛɛ fʋ maal o wʋʋ yammʋga, bɔzugɔ, fʋnɛ nɛ'ɛs o.

Biribiŋ kpɛɛm faar

15 Dau ya'a mɔr pu'aba ayi', ka nɔŋ yinne gat yinne, ka babayi' la wʋsa du'a biribis, amaa ka biribiŋ kpɛɛm la an pu'a kanɛ ka o pʋ nɔŋ la biig, 16 o ya'a ti bɔɔd ye o pʋdigi o faari digil o biis, on da nɔk bikpɛŋ faari tis pu'a kanɛ ka o nɔŋ la biig ka li ka'anɛ onɛ sid an o bikpɛŋa, ka bas onɛ ka o pʋ nɔŋ la biig la. 17 Asɛɛ o baŋ ye o pu'a kanɛ ka o pʋ nɔŋ la biig la an kpɛɛm, ka tis o pʋʋr la zin'isa ayi' on mɔr si'el wʋsa. Onɛ an zanbinnɛ pa'an o saam paŋ. Linɛ wʋsa an bikpɛŋ din la anɛ o bʋn.

Wada nɛ biig kanɛ tʋbiri zian'as

18 Dau ya'a mɔr biribiŋ ka o zug kpi'em ka o tʋbir pʋ wʋmma ka pʋ siakid o saam nɛ o ma nɔɔrɛ, ka pʋ kɛlisidi ba sa'alʋgɔ, 19 on nɛ o ma la na mɔr o keŋ kpɛɛmnam la tuon tempʋʋg la yaŋirin. 20 Ka ba na yɛl kpɛɛmnam la ye, “Ti bikaŋa anɛ onɛ zugʋ kpi'em ka o tʋbir pʋ wʋmma. O pʋ siakidi ti nɔɔrɛ, o anɛ danuud ka san'amid ligidi.” 21 O teŋ dim la na lɔb o nɛ kuga kʋ. Asɛɛ ya yis bɛ'ɛd linɛ bɛɛ ya sʋʋgin la, ka Israel nidib wʋsa na wʋm ka zɔ dabiem.

Wada kɔn'ɔb-kɔn'ɔb yɛla

22 Sɔ' ya'a tʋm tʋʋmbɛ'ɛd linɛ nar nɛ kum, ka ba kʋʋ o ya'al tiig zug, 23 yanam da bas o niŋgbiŋ la ka li kpɛlim tiig la zugʋ nie bɛogɔ. Baŋimi ye ya na mum o dabiskan la bɔzugɔ, Wina'am nɔpɔɔr bɛ nɛ onɛ wʋsa kpi ka ba ya'al o tiig zug. Da kɛ ka teŋ kanɛ ka ya Zugsɔb Wina'am tisi ya la mɔr dian'adɛ.