22
1 Ka fʋ ya'a nyɛ fʋ kpi'a naaf bɛɛ o pɛ'og ka o bɔdigid, fʋn da yisi fʋ nifɔ, amaa gban'am o mɔri keŋ tis o sɔb. 2 Fʋ kpi'a la ya'a pʋ kpi'e nɛ fʋn bɛ si'el la, bɛɛ fʋ ya'a zi' o sɔba, fʋn mɔr o kuli fʋ yin, ti paae saŋa kanɛ ka o sɔb ti iee paae na, ka fʋ nɔki tis o. 3 Niŋim ala mɛn nɛ fʋn na nyɛ fʋ kpi'a bʋŋ bɛɛ o fuug bɛɛ o si'el ya'a bɔdig ka fʋ nyɛ li. Fʋn da niŋ ka li nwɛnɛ fʋ pʋ nyɛɛ.4 Fʋ ya'a nyɛ fʋ kpi'a bʋŋ bɛɛ naaf ka o lii dig suorin, fʋn da gaad ka bas o, amaa sʋŋim duoe o zi'el.
5 Pu'a da yɛ dap fuud bɛɛ dau yɛ pu'ab fuudɛ, bɔzugɔ, ya Zugsɔb Wina'am la kisʋg anɛ onɛ niŋ ala.
6 Fʋ ya'a keŋ nyɛ niiŋ tɛog ka li bɛ tiig zug bɛɛ teŋin suor kpikpɛŋ, ka niiŋ la um biis bɛɛ gɛla, fʋn da gban'e niiŋ la la'am nɛ o biis la; 7 fʋ na nyaŋi nɔk o biis la ka basi ba ma la. Ala ka si'el wʋsa na keŋ sʋ'ʋŋa tisif ka fʋ nyɔvʋr na wa'am.
8 Fʋ ya'a mɛ' yir, fʋn maalim gʋʋdiŋi gilig yir la zug ka sɔ' kʋ lii anina kpi ka taal bɛ yin la.
9 Da la'as bʋmbʋʋda buudi ayi' bʋdi fʋ vain tiis pɔɔginɛ; fʋ ya'a niŋ ala, li ka'anɛ bʋmbʋʋda banɛ ka fʋ bʋd la ma'anɛ, amaa vain tiis pɔɔg wala la wʋsa lieb nɛ dian'ad. 10 Da la'as naaf nɛ buŋi kuaa. 11 Da yɛ fukanɛ ka ba ʋg gum nɛ bʋnkɔnbid kɔnbidi gɛndig taaba la.
12 Maalim tusa fʋ fuug la nɔya anaasi la ni.
Dau na san'ami o pu'a yʋ'ʋr yɛla
13 Dau ya'a di pu'a ka o ya'amlɛog ti yi pu'a la ka o pʋ lɛm bɔɔd o, 14 ka san'ami o yʋ'ʋri tis o yʋ'ʋbɛ'ɛd ye, “Man di pu'a kaŋa ka digin nɛ o la, si'el-si'el pʋ pa'al ye o zi' dau.” 15 Alazug, bipuŋ la saam nɛ o ma na kɛn kpɛɛmnam la tuon na teŋ la yaŋirin ka mɔr linɛ an kasɛti pa'al ye o bipuŋ la zi' dau. 16 Bipuŋ la saam na yɛl kpɛɛmnam la ye, “M nɔki m bipuŋi tis dau kaŋa, amaa ka o pʋ bɔɔd o. 17 Nannanna o san'am o yʋ'ʋr ka yɛl ye, ‘Mam dii fʋ pu'ayua la ka o pʋn baŋ dau sa.’ Amaa mam mɔr kasɛt linɛ pa'al ye, o zi' dau.” Ani ka bipuŋ la saam nɛ o ma na nɔk fukanɛ an kasɛti pa'al ye o zi' dau la yadig kpɛɛmnam la tuon. 18 Ka kpɛɛmnam la na bʋ' dau la. 19 Ba na kɛ ka o yɔ anzurifa ligidi kɔbiga tis bipuŋ la saam, bɔzugɔ, o san'am Israel pu'asadir onɛ ka' taal yʋ'ʋr. Asɛɛ o di pu'a la. Suor kae ka o na bas pu'a la o nyɔvʋr bɛn wʋsa. 20 Amaa ya'a nwɛnɛ dau la pian'ad anɛ sida, ka si'el kae pa'al ye bipuŋ la zi' dau, 21 ba na mɔr o keŋ o saam la yinne zi'el o za'anɔɔrin la ka teŋ la dap lɔb o nɛ kuga kʋ. O tʋm linɛ an nyan Israel sʋ'ʋlimin, on maal o mɛŋ pu'agɔɔndir ka nan bɛɛ o saam yin la zug. Asɛɛ ya yis bɛ'ɛd la ya sʋʋgin.
22 Dau ya'a digin nɛ o tiraan pu'a ka ba kuki ba, asɛɛ dau la nɛ pu'a la wʋsa kpi. Asɛɛ ya yis bɛ'ɛd la Israel dimin. 23 Dau ya'a nyɛ pu'asadir kanɛ an sɔ' pu'a-ɛliŋ ka nan zi' dau ka nɔk o digin nɛ o ka li bɛ tempʋʋgin, 24 asɛɛ ya mɔri babayi' la wʋsa keŋ teŋ la yaŋirini lɔbi ba nɛ kuga kʋ, bɔzugɔ, bipuŋ la bɛ tempʋʋgin ka pʋ kaas ka ba faaɛn o, ka dau la mɛ san'am sɔ' pu'a la zug. Asɛɛ ka ya yis bɛ'ɛd la ya sʋʋgin. 25 Amaa li ya'a anɛ mɔɔgin ka dau bibig pu'a kanɛ an sɔ' pu'a-ɛliŋ, dau kanɛ tʋm nɛ'ɛŋa la ma'aa na kpi. 26 Amaa pu'asadir la mɛn, da niŋ o si'ela ka o pʋ tʋm taali. O pʋ tʋm tʋʋmbɛ'ɛd linɛ nar ye o kpii. Yɛl kaŋa nwɛnɛ sɔ' na zab nɛ o kpi'a kʋʋ o. 27 Li anɛ dau la bibig pu'asadir la, la'am nɛ pu'a-ɛliŋ la kaas la sɔ' kae yamminɛ na faaɛn o. 28 Dau ya'a sia'al pu'asadir ka ba nam pʋ tis o sida ka bibig o ka ba kʋk o, 29 asɛɛ o yɔ pu'asadir la saam anzurifa ligidi pisnu ka di pu'a la on san'am o la zug, suor kae ka o na bas pu'a laa, o nyɔvʋr bɛn wʋsa.
30 Li pʋ nar ye sɔ' dii o saam pu'a, li pʋ nar ye o nɛ'ɛsi o saama.