Banɛ pʋ paas kallin la yɛla
23
1 Dau onɛ wʋsa ka ba zan' bɛɛ nwaae o daulim yis kʋ kpɛn' Zugsɔb nidib la sʋʋginɛ. 2 Onɛ an tampiinr bɛɛ ka' saam, nɛ o yaas wʋsa kʋ kpɛn' Zugsɔb nidib la sʋʋginɛ, hali din yi zʋmaaŋ yinne ti paae zʋmaaŋ piiga la zin'igin. 3 Ammon bɛɛ Moab nidib la bɛɛ ba yaas kʋ kpɛn' Zugsɔb la nidib sʋʋginɛ, hali din yi zʋmaaŋ yinne ti paae zʋmaaŋ piiga la, 4 ban da pʋ tʋ'ʋsi ya nɛ diib nɛ ku'om yanamɛ da yi Egipt teŋin kenna la zug, ka ba da da' Balaam onɛ an Beor biig ka yi Petor teŋin ka bɛ Aram Naharam sʋ'ʋlimin dinɛ bɛ Mesopotamia la ka o kaanb kaanbbɛ'ɛdɛ tisi ya. 5 La'am nɛ wala ya Zugsɔb Wina'am la pʋ kɛlis Balaam kaanb bɛ'ɛd la, amaa ka lɛɛ tiaki li ka li lieb albareka tisi ya bɔzugɔ ya Zugsɔb Wina'am la nɔŋi ya. 6 Da bɔɔd ye ya maal nɔɔr yinne nɛ ba, ya nyɔvʋr bɛn wʋsaa. 7 Da ziem Edom dima, ka ba anɛ ya ba'abiis. Da ziem Egipt dim la, bɔzugɔ ya da anɛ saamme ba teŋin. 8 Ba biis la yaas banɛ paas atan' la na nyaŋi kpɛn' Zugsɔb la nidib sʋʋgin.Dian'adi na bɛ yɛla
9 Ya ya'a ti la'as ye ya zab nɛ ya dataas, da li'eli dinɛ an dian'adɛ. 10 Ya dap la yinne ya'a mɔr dian'ad ka li anɛ o zaansim nɛ yʋ'ʋŋ ka o daulim ku'om yina, asɛɛ ka o yi la'asʋg la yiŋi bɛɛ anina, 11 amaa zaam ya'a ti bɔɔd ma'ar la, o na sʋ ku'om, ka winnig ya'a ti kpɛn' o na nyaŋi lɛb la'asʋg la zin'igin na. 12 Bɔɔmi zin'igi ya la'asʋg la yiŋ, ka sɔ' ya'a bɔɔd ye o nyɛ' bin on keŋ anina nyɛ'. 13 Kɛl ka kʋsiig bɛɛ ya la'adin la, ka ya na mɔri li tuud bʋmbɔk, ka fʋ ya'a ti naae, fʋn lɛbisim pin' bin la. 14 Ya Zugsɔb Wina'am la kaadi ya nɛ ya la'asʋg la zin'igin guri ya, ka na kɛ ka ya nyaŋi ya dataas la. Asɛɛ ka ya la'asʋg zin'ig la an kasi, ka o kʋ nyɛ dian'adi ya sʋʋgin ka fɛndig ka basi ya.
Wada banɛ bɛ
15 Teŋ si'a yammʋg ya'a zɔɔ kena su'a ya san'an, yanam da nɔk o tis o zugdaan la. 16 Kɛlli ka o bɛɛ ya san'an, kɛlli ka o gaŋ on bɔɔd zin'isi'a nɛ on bɔɔd tempʋsi'a wʋsa, ka da mugusin oo. 17 Israel nidib la ni dau bɛɛ pu'a mɛ da bɛ teŋgban dɔɔgini digi nɛ nidiba. 18 Da mɔri pu'agɔɔnda nɛ dapgɔɔnda la yʋ'ʋn paam la'asieba la kpɛn' Zugsɔb onɛ aan ya Wina'am la san'an yɔ pʋ'ʋlʋm zi'el sammɛ, bɔzugɔ Zugsɔb la kisi li. 19 Da pɛ'ɛŋi fʋ ba'abiig si'el ka paas nyɔɔdɛ, li ya'a anɛ ligidi bɛɛ diib bɛɛ linɛ wʋsa ka o pɛ'ɛŋ ka li nar ye o paas nyɔɔd. 20 Ya na nyaŋi di'e nyɔɔd onɛ an saan san'an, amaa ka' ya ba'abiig onɛ an Israel nida, ala ka ya Zugsɔb Wina'am la na niŋi ya bareka ya nu'ug tʋʋma wʋsa ni teŋ kanɛ ka ya kpɛn'ɛd ye ya sʋ'ʋg la pʋʋgin. 21 Fʋ ya'a yɛl nɔɔri zi'eli tis Zugsɔb la, fʋn da bʋgis nɛ li yɔɔbɔ, ka Zugsɔb fʋ Wina'am la na bu'osif ka fʋ na kpɛn' tʋʋmbɛ'ɛdin. 22 Amaa fʋ ya'a pɔ nɔɔri zi'el, fʋ pʋ tʋm tʋʋmbɛ'ɛdɛ. 23 Fʋ nɔɔr ya'a yɛl si'el, asɛɛ ka fʋ kpɛ'ɛŋi tʋmi li bɔzugɔ, fʋ mɛŋ ya'am ka fʋ yɛl nɔɔri tis Zugsɔb fʋ Wina'am la. 24 Fʋ ya'a kpɛn' fʋ tiraan vain tiis pɔɔgin nyɛ si'el wʋsa fʋn dim, amaa da vaae niŋi fʋ pɛogʋnɛ mɔri keŋɛ. 25 Fʋ ya'a kpɛn' fʋ tiraan kawɛnna pɔɔgin fʋ na nyaŋi ɔnb kawɛnna linɛ bɛ pʋʋgin la, amaa da nɔk kʋsiigi keŋ ki'eda.