Pu'adiir nɛ sid kulig wada
24
1 Ka dau ya'a di pu'a ka ti nyɛ ka o mɔr itʋŋ si'a ka li ka' sʋ'ʋm, on tisim o kasɛta gbauŋ linɛ pa'an ye o lɛbis pu'a la nɛ. 2 O ya'a ti yi yin la naae, suor bɛ ka o na lɛn kul sid ya'as. 3 On kul sɔ' la ya'a pʋ lɛm bɔɔd oo, ka sɔb gbauŋʋ tis o dinɛ pa'al ye o bas o nɛ ka yis o yin la, bɛɛ o sid la ya'a kpinɛ, 4 o sid kʋdig la pʋ mɔr suor ka o lɛn di pu'a la ya'asɛ, li anɛ yɛlkisʋg: ya da kɛ ka tʋʋmbɛ'ɛd bɛ teŋ kanɛ ka Zugsɔb onɛ aan ya Wina'am tisi ya la nii.Zi'ela banɛ paas
5 Dau ya'a di pu'a ka li pʋ yuugɛ, da kɛ ka o keŋ zaba ni bɛɛ ya tis o tʋʋm si'a pɛ'ɛs o mɛŋ tʋʋma la. Asɛɛ ka o bɛ yin yʋʋm mum, ka kɛ ka o pu'a la mɔr sumalisim.
6 Sɔ' ya'a pɛ'ɛŋ si'eli fʋ san'an, da nɔk o nɛɛr bɛɛ o niŋkaŋ ye o ya'a ti yɔ on di'e, bɔzugɔ yir la dim mɔri dinɛ maannɛ ba diibi dit ka vʋe.
7 Sɔ' ya'a gban'e o ba'abiig Israel nidi maal o yammʋg bɛɛ kuos o, asɛɛ ka o sɔb kpi. Asɛɛ ka ya yis bɛ'ɛd dinɛ bɛɛ ya sʋʋgin la.
8 Niŋgbiŋ ban'as wʋʋ kʋkɔm ya'a li na, yanam gu'usim ka niŋ wʋʋ Levi dim banɛ an maanmaannib la yɛli ya si'em la. Asɛɛ ka ya dɔlis wʋʋ man yɛli ba si'em la. 9 Tɛn'ɛsimi ya Zugsɔb Wina'am la da niŋ Miriam si'em suorin yanamɛ da yi Egipt n kenna la.
10 Fʋ ya'a pɛ'ɛŋ sɔ' si'el, da kpɛn' o zakin ye fʋ di'e on ye o nɔk si'eli tis ka fʋ digil ka o ya'a ti yɔ on di'e la. 11 Zi'enim yiŋ ka o nɔk on pian' zi'el ye o tisif si'el la mɔri yina tisif. 12 O sɔb ya'a an nɔŋdaan fʋn da kɛ ka li gbɛɛn fʋ yinne. 13 Zaam ya'a ti ma'ae fʋn lɛbisimi o fuugʋ tis o ka o pil o mɛŋi gbis. Ala ka o na pʋ'ʋsif ka li na pa'al ye fʋ anɛ pʋpielim sɔb Zugsɔb fʋ Wina'am la san'an. 14 Da nyɛ onɛ an tadim ka an nɔŋdaan la bɔɔd ye o tʋm zaalim tisi fɔ, baa o ya'a anɛ fʋ ba'abiig Israel nid bɛɛ saanne bɛɛ ya tempʋʋd la yinne nii. 15 Yɔɔm o dabisir wʋsa ka winnig nyaan li, on an nɔŋdaan ka ti'enɛ lin yɛla ma'aa la, ya'a ka' ala o na kaasi tis Zugsɔb la fʋ yɛla, ka fʋ na kpɛn' tʋʋmbɛ'ɛdin.
16 Saamnam kʋ kpii ba biis yɛlaa ka biis mɛ kʋ kpii ba saamnam yɛlaa, sɔ' wʋsa na kpinɛ o mɛŋ tʋʋmbɛ'ɛd yɛla. 17 Da mɔŋ saam bɛɛ banɛ an kpiibis bʋʋdɛ, mɛ da faaɛn pʋkɔɔnr fuug on dii fʋ sam la zugɔ. 18 Tɛn'ɛsim ye ya da anɛ yammis Egipt teŋin ka ya Zugsɔb Wina'am faaɛn ya yis anina, dinɛ kɛ ka m yɛli ya ye ya tʋmmi ala la.
19 Ya ya'a ti bʋn ka ya ki, yanam da lɛbi wi'isi li ya'asɛ; basim tis saam nɛ kpiibis nɛ pʋkɔnya, ala ka ya Zugsɔb Wina'am la na niŋi ya nu'ug tʋʋma wʋsa bareka. 20 Ya ya'a kpa'asi ya olif kpaam tiis la la'as wala la, yanam da lɛn lɛbi pɔn' wila la ni takɛ, basimi dinɛ kpɛlim la tis saam nɛ kpiibis nɛ pʋkɔnya. 21 Ya ya'a pɔn' ya vain tiis la wala pɔɔgin la, yanam da lɛn lɛbi pɔn' tak ya'asɛ. Basim tis saam nɛ kpiibis nɛ pʋkɔnya. 22 Tɛn'ɛsimi ye ya da anɛ saam Egipt teŋin, dinɛ kɛ ka m yɛli ya ye ya tʋmmi anwa la.