25
1 Nidiba ayi' ya'a zab, li anɛ ba keŋ kɔɔtʋ ni ka sariakatib maal pian'ad la tis onɛ mɔr bʋʋd la ka mɔŋ onɛ ka' bʋʋd la bʋʋd. 2 Li ya'a nar ye ba bʋ' onɛ ka' bʋʋd la, sariakat la na kɛ ka o digin avanba ka ba bʋ' o. Ba na bʋ' o nɛ o tʋʋmbɛ'ɛd la nar ye o di'e kpa'asa si'em bɛn. 3 Suor bɛ ye ba bʋ' o kpa'asa pisnaasi, amaa li da gaad ala bɔzugɔ, li ya'a gaad ala ya diisi ya ba'abiig la nɛ nyannɛ ya sʋʋgin.4 Mid ka ya pid na'araad banɛ kuod la nɛ yʋgʋd.
5-6 Ba'abiis ya'a la'am bɛ ka yinne kpi ka pʋ mɔr biribiŋa, o pʋkɔɔnr la da yii kul sɔ' yiŋa, asɛɛ ka o kul yin la ka o sid pitʋ na di o ka biribiŋ kanɛ ka o du'a yiiga la na sig nɛ onɛ kpi la ka o yʋ'ʋr da bɔdig Israel buudi la nii; sid piti nar ye o tʋm si'em la. 7 Amaa onɛ kpi la ba'abiig la ya'a pʋ bɔɔd pʋkɔɔnr la, pu'a la na keŋ teŋ la kpɛɛmnam san'an yɛli ba ye, “M sid la ba'abiig zan'as ye o kʋ diimi du'a biigi tis o ba'abiig la ka li kɛ ka o yʋ'ʋr da bɔdig Israel teŋinɛ.” 8 Teŋ la kpɛɛmnam la na buol o pian' tis o, ka o ya'a nam zan'as ka ye, “Mam kʋ di pʋkɔɔnr la.” 9 Pʋkɔɔnr la na duoe kpɛɛmnam la tuonnɛ pidig onɛ zan'as ye o kʋ dii o la ta'adir ka tʋbis nintɔɔndi niŋ o nindaan ka yɛl o ye, “Ban niŋid onɛ zan'as ye o kʋ mɛɛ o ba'abiig yir si'em la.” 10 Israel teŋin sɔ' wʋsa na baŋ ye dau kanɛ ka ba pidigi o ta'adir la tuŋʋ nwa ka li an yʋ'ʋbɛ'ɛd.
11 Dapa ayi' ya'a zabid ka yinne pu'a kena ye o sʋŋ o sid ka gban'e o sidi zabid nɛ sɔ' la daulim, 12 yanam fi'igim o nu'ug, ka da zɔɔ nɛ o nimbaanliga.
13 Da mɔri dinɛ makid la'ad tɛbisim la zin'is ayi' ya kɔlʋgin ka yinne tɛbis ka yinne fa'as, ka ya mɔri zammid nidiba. 14 Da mɔri dinɛ makid kuosim la zin'is ayi' ya yaanɛ, ka yinne zu'oe ka yinne pɔɔda. 15 Asɛɛ bʋmbanɛ ka ya mɔri makid la'ad tɛbisim la an wʋʋ din nar si'em; ka ala ka ya na yuug teŋ kanɛ ka Zugsɔb onɛ aan ya Wina'am tisi ya la. 16 Banɛ mɔr labanɛ pʋ paae ma'asid la'ad la anɛ zam dim ka ba pʋʋg pʋ paada. Zugsɔb Wina'am kis nimbamanam. 17 Tɛn'ɛsimi Amalek dim la da maali ya si'em suorin yanamɛ da yi Egipt na la. 18 Yanamɛ da gɛn ka tadig la, ba da pʋ zɔ Wina'am amaa ka zab nɛ ya, kʋ banɛ tadig ka kpɛlim nya'aŋi kɛnɛ gɛrid la. 19 Ya Zugsɔb Wina'am la ya'a ti tisi ya vʋ'ʋsʋm ya dataas banɛ giligi ya la wʋsa sʋʋgin, teŋ kanɛ ka ya kpɛn'ɛd ye ya sʋ'ʋg ka li aan ya faar la ni, baŋimi ye ya na kʋ Amalek dim la wʋsa ka sɔ' kʋ lɛn tiɛn ba yɛl dunia nwa nii. Da tamiya.