Bunib piini
26
1 Ya ya'a ti kpɛn' teŋ kanɛ ka ya Zugsɔb Wina'am ye o tisi ya la, ka zin'in ka sʋ'ʋgi li ka li lɛbigi ya faar, 2 gbin'emi zʋʋd linɛ ka ya bʋn yiiga wʋsa teŋ kanɛ ka ya Zugsɔb Wina'am tisidi ya la niŋ pɛogʋnɛ mɔri keŋ zin'ikanɛ ka ya Zugsɔb Wina'am na gaŋ ka o yʋ'ʋr bɛɛ anina la. 3 Yɛlim maanmaan kanɛ sʋ'oe malima tʋʋma saŋkan la ye, “M zi'en zina yɛti fʋ Zugsɔb Wina'am la ye, m yʋ'ʋn paae teŋ kanɛ ka Zugsɔb da pɔ zi'eli ti yaanam ye o na tisi ti la.” 4 Maanmaan la na di'e pɛog la fʋ nu'usinɛ zi'eli fʋ Zugsɔb Wina'am bimbim la tuon. 5 Ka fʋ mɛŋ na yɛl Zugsɔb fʋ Wina'am la tuon nyain ye, “M yaab da anɛ Aram nid onɛ gɔɔndi giligid, ka da nɔk o yidim bi'ela mɔri ba keŋ Egipt teŋin zin'in anina, ka ba da lieb buudtita'are mɔr paŋ ka zu'oe. 6 Amaa Egipt dim la da pʋ maali ti sʋ'ʋm, ka namisi ti hali, ka kɛ ka ti tʋm tʋʋm kpi'ema. 7 Ka ti kaasi tis Zugsɔb onɛ aan ti yaanam Wina'am la, ka Zugsɔb la wʋmi ti kaasig nɛ ti yaalʋg nɛ tinamɛ tʋm tʋʋm kpi'ema ka ba mugusidi ti si'em la. 8 Ala ka Zugsɔb la da tiɛn o nu'ug kpi'euŋ nɛ nu'ug kanɛ mɔr paŋ hali mɔri ti yis Egipt na, ka tʋm tʋʋmnyalima nɛ linɛ mɔr dabiem. 9 O mɔri ti paae kpɛla na ka zaŋ teŋ kaŋa tisi ti, teŋ kanɛ pʋbid bin'isim nɛ siind. 10 Lin ka m mɔr zʋʋd linɛ ka m bʋn yiiga teŋ kanɛ ka fʋ tisim la ni kena.” Zi'elim pɛog la Zugsɔb la tuon ka igini o tuon. 11 Ka fʋn nɛ Levi dim nɛ saam banɛ bɛ nɛf la na maal sumalisim yɛlsʋma banɛ ka Zugsɔb fʋ Wina'am maali tis fʋn nɛ fʋ yidim la.12 Yʋma atan' wʋsa nɔkimi fʋ zʋʋd la ayinne pʋdigir piiga pʋʋgin tis Levi dim nɛ kpiibis nɛ pʋkɔnya, ala ka nidib na diti tigid ka diib kʋ pɔ'ɔg sɔ' ya tempʋʋdin nɛ. 13 Yɛlim Zugsɔb fʋ Wina'am la ye, “M pʋn yis pʋdigir linɛ an kasi la wʋsa yinne tis Levi dim nɛ saam nɛ kpiibis nɛ pʋkɔnya la, wʋʋ fʋn zi'el si'em la. M pʋ yii fʋ nɔzi'ela yiŋ bɛɛ m tami lii. 14 M pʋ di linɛ an kasi la baa bi'elaa m kukuma la saŋa, bɛɛ m gbin'e li saŋa kanɛ ka m da ka' nyain la, ka mɛ pʋ gbin'e li maal maannɛ tis kpi'imnama. M siaki m Zugsɔb Wina'am la nɔɔr, ka tʋm linɛ wʋsa ka fʋ ye m tʋm la. 15 Naanimi fʋ bɛllim zin'ikanɛ an kasi la gɔs na ka niŋi fʋ nidib Israel dim zug bareka nɛ teŋ kanɛ ka fʋ tisi ti wʋʋ fʋn da pɔ nɔɔri zi'eli ti yaanam si'em ye fʋ na tisi ba teŋ kanɛ pʋbid bin'isim nɛ siind la.”
Dɔl Zugsɔb la nɔɔr
16 Zugsɔb onɛ aan ya Wina'am la tis nɔɔr ye ya dɔl o nɔzi'elʋg nɛ wada banɛ ka o tisidi ya zina nwa la; gu'usimi ka dɔlisi li nɛ ya sʋnf wʋsa nɛ ya siig wʋsa. 17 Zina nwa ya nie nyain pa'al ye, Zugsɔb la aan ya Wina'am, ka ya na dɔlli o suoya la nɛ o nɔzi'ela nɛ o wada la wʋsa, ka siak o nɔɔr. 18 Zina nwa Zugsɔb la nie pa'al nyain ye ya sid anɛ o nyɔɔrin kɔnbʋg wʋʋ on zi'el si'em la, ka ya na dɔlli o nɔzi'elʋg la wʋsa. 19 O zi'el nɔɔr ye o na dʋ'ʋsi ya ka kɛ ka ya mɔr na'asi gaad buudbanɛ ka o maal la wʋsa, ka ya na an nimbanɛ an kasi tis Zugsɔb Wina'am wʋʋ on yɛl si'em zi'el la.