<<    <     Zi'elʋg     27     >    >> 
Wina'am zi'ela banɛ sɔb kuga zug la yɛla
27
1 Moses nɛ Israel kpɛɛmnam la da yɛl nidib la ye, “Dɔlli zi'ela banɛ ka m tisidi ya zina la wʋsa. 2 Ya ya'a ti lɔ'ɔŋ Joodan kɔldaug la kpɛn' teŋ kanɛ ka ya Zugsɔb Wina'am ye o tisi ya la, yanam nɔkim kugtitada ba'a zi'el sappi ka taae li nɛ bʋmbɔn. 3 Ya ya'a ti lɔ'ɔŋi naae kpɛn'ɛd teŋ kanɛ ka ya Zugsɔb Wina'am ye o tisi ya la, teŋ kanɛ pʋbid bin'isim nɛ siind la, nwɛnɛ ya Zugsɔb onɛ an ya yaanam Wina'am la da zi'eli ya si'em la, asɛɛ ka ya sɔb wada bama kuga la ni. 4 Ka ya ya'a ti lɔ'ɔŋ Joodan kɔldaug la, yanam ba'am kugbama Ebal zuorin la nwɛnɛ man zi'el nɔɔr si'em tisi ya zina la, ka bʋligi li nɛ bʋmbɔn. 5 Mɛɛmi bimbim anina tisi ya Zugsɔb Wina'am la. Nɔkimi kuga mɛ' bimbim la, da nɔki kʋnt la'adi mɛɛ li. 6 Mɛɛmi ya Zugsɔb Wina'am bimbim la nɛ kuga banɛ ka ba pʋ kpi'e baa, ka maal nyu'or maan bimbim la zugʋ tisi ya Zugsɔb Wina'am la. 7 Maalimi taaba la'asʋg maana dit ka maannɛ sumalisim Zugsɔb la tuon. 8 Ka ya na sɔb wadbama wʋsa tabil kugbanɛ ka ya ba'a ba la ni.”
9 Ka Moses nɛ maanmaannib banɛ an Levi dim la yɛl Israel dim wʋsa ye, “Yanam Israel dima, aaɛn baanlimm ka kɛlis! Ya yʋ'ʋn liebi ya Zugsɔb Wina'am la nidib. 10 Siakimi ya Zugsɔb Wina'am la nɔɔr ka dɔl o zi'ela nɛ gban'ar banɛ ka m tisidi ya zina la.”
11 Daakan la ka Moses lɛn zi'el nɔɔrɛ tis nidib la ye, 12 “Ya ya'a ti lɔ'ɔŋ Joodan, buudbama na ti zi'en Gerizim zuorin la ka sɔs albareka niŋ nidib la. Banɛ an: Simeon nɛ Levi nɛ Juda nɛ Isaka nɛ Josef nɛ Benjamin. 13 Buudbanɛ mɛ na zi'en Ebal zuorin la kaanb kaanbbɛ'ɛdi tis la anɛ: Reuben nɛ Gad nɛ Aser nɛ Zebulun nɛ Dan nɛ Naftali.” 14 Levi dim la na pian'adi tisid Israel nidib la nɛ kʋkɔtita'ari yɛt ye, 15 “Wina'am nɔpɔɔr bɛ onɛ wʋsa nɔk kuga bɛɛ daad bɛɛ kʋnti maali li ka li an ba'ar ka su'adi maannɛ li, Zugsɔb la kis bada maalʋg.”
Ka nidib la wʋsa na la'asi siak ye, “Ami!”
16 “Nɔpɔɔr bɛ onɛ pʋ na'asidi o ba' nɛ o ma zugin.”
Ka nidib la wʋsa na siak ye, “Ami!”
17 “Nɔpɔɔr bɛ onɛ tɔlis o kpi'a pɔɔg titɔndig kugir.”
Ka nidib la wʋsa na siak ye, “Ami!”
18 “Nɔpɔɔr bɛ onɛ wʋsa vɛ'ɛd zʋnzɔŋ ka pʋ dɔl suorɛ ka mɔr o kpɛn'ɛs mɔɔgin.”
Ka nidib la wʋsa na siak ye, “Ami!”
19 “Nɔpɔɔr bɛ nɛ onɛ ka saan bɛɛ kpiibig bɛɛ pʋkɔɔnr mɔr bʋʋd ka o mɔŋ o.”
Ka nidib la wʋsa na siak ye, “Ami!”
20 “Nɔpɔɔr bɛ nɛ onɛ digin nɛ o saam pu'a, on san'am o saam girima ka nɛ'ɛsi o la zug.”
Ka nidib la wʋsa na siak ye, “Ami!”
21 “Nɔpɔɔr bɛ nɛ onɛ digin nɛ bʋnkɔnbʋg.”
Ka nidib la wʋsa na siak ye, “Ami!”
22 “Nɔpɔɔr bɛ nɛ onɛ digin nɛ o taʋn, onɛ an o saam biig bɛɛ o ma biig.”
Ka nidib la wʋsa na siak ye, “Ami!”
23 “Nɔpɔɔr bɛ nɛ onɛ digin nɛ o diempu'a.”
Ka nidib la wʋsa na siak ye, “Ami!”
24 “Nɔpɔɔr bɛ nɛ onɛ su'a kʋʋ o tiraan.”
Ka nidib la wʋsa na siak ye, “Ami!”
25 “Nɔpɔɔr bɛ nɛ onɛ ka ba da' o ka o kʋ sɔ' zaalim-zaalim.”
Ka nidib la wʋsa na siak ye, “Ami!”
26 “Nɔpɔɔr bɛ onɛ pʋ dɔl wadbama wʋsa ka tʋmmi lii.”
Ka nidib la wʋsa na siak ye, “Ami!”