MYA MA TBACA RATU NI NGRIBATNIR
Noak ma tbaca Ratu Ni ngribatnir ye felnir yadin, nempa safe ma rarengi na bab ye lan ketnir ma nfatutu kit feti felan farpe ma tbaca.
KA TBACA RATU NI NGRIBATNIR FARYE
1. Farlan tdangin Ratu e ka tbaca na ayatar ye: Roma 11:33-36; Filipi 2:5-11; 1 Timotius 3:16; 6:15-16; Wahyu 4:11; 5:9-11, 12; 15:3b-4; 21:6b-8.
2. Farlan tpeang ma tbie tof suse dalam e ka tbaca na (Indeks bertopik).
3. Farlan tpeang ma tbaca Ratu Ni Ngribatnir monuk na ngarak dalam, ni ngafele e taktem waninrar a tbaca, ma kete koko kit a tbaca, nema ntafal ma tsenang ma tbaca Ratu Ni Ngribatnir Contoh tbaca tor sawninrar, tbaca tor ninr dasdalmir, tbaca tor ninr soranyar, tbaca tor tomwatar ma biase rafburat sir ma rsampayang, tbaca tor tomwatar ma taktem kantor lese, tbaca tor tomwatar na rukun nre stasi lese ror kit, tbaca tor tomwatar na pnue dalam, empuny nbaca ber nusiny, ma kanak nbaca ber enany amany, ma walyetar a nbal.
4. Tbaca ayatar ye tlarat kalender Liturgi (Tal tof gereja ni kalender nre tlarat renungan harian nof Lembaga Pembinaan Jemaat).
FARLAN TBACA RATU NI NGRIBATNIR E TOSE FARYE
1. Ka tetak let ngamonar sa na mpane lerar ne.
2. Tanriak ain tatutkwar.
3. Tsyampayang ma tak Ratu Smwangtany ma nkarya na dalmir.
4. Ka kete tbaca motak Ratu Ni ngribatnir a ne, nempa ka tfarnyobak na dalminrar.
5. Ka tanriak ayatar ma ka tose tlarat na ninr momorip.
6. Farlan tbaca monuk e ka tsampayang.
TPEANG MA TAFAI RATU NI NGRIBATNIR E TOSE FARYE
1. Ka tbaca ayatar mpane fen ngamone. Ma ayat ma tbaca ne nfalak safe ber kit? Ma kete tbaca tlarat ninr mpempeang motak.
2. Ayat ma tbaca ne isiny farpe?
3. Tanriak ayat walyetar la tpasal ayatar ma tbaca ne.
4. Nof ayatar ne ka tose safe na ninr momorip?
TOSE TLARAT
Noak ma tbaca Ratu Ni Ngribatnir, ka tfalak na dalminrar feti,
1. Contoh safe ma bise ma klwarat?
2. Faret safar ma kose klwarat?
3. Sal safe ma ka kete kose?
4. Keta ktwate ningw salar farpe?
5. Safe ma Ratu nyoding ma bise ma komat?
6. Ka kose safe nema bise ma klwangun Ratu Ni yoyoding?
7. Anftutwar ketnir ma bise kswalan fen ngamone e?
8. Bise ma kwaul kal kabain beberyar sa na Ratu e?
9. Bise ma kwaul kal kabain beberyar sa na Yesus ninr Ray Silai e?
10. Bise ma kwaul kal Ratu Smwangtany ma nkarya na dalangw e?
11. Bise ma kwaul kal kabain beberyar sa na Smwangat Yatkar nir uluny e?
12. Bise ma kwaul kal kabain beberyar sa na tomwatar kit e?
13. Bise ma kwaul kal kabain beberyar sa na ningw momorip kor tomwatar e?
14. Bise ma kwaul kal kabain beberyar sa na ningw momorip kor Ratu e?
15. Bise ma ningw andaun beberyar sa na ningw sale ma kose na ningw momorip e?
16. Bise ma ningw andaun beberyar sa na safe-safe ma Ratu nal ber yakw ma kujake na saryamprene ye?
17. Ratu Ni wewelmpampane ma nfatutu ber tomwatar a ne farpe?
18. Ningw momorip ma ningw wewelmpampane farpe? Ningw tnyangkwar, kumlonr, nre klwepusuk a kbwali yakw?
19. Ka kose farpe ma ningw wewelmpampane ma ningw momorip feleles farlan Ratu Ni adat?
20. Ka kose farpe nema kete kose sale farane lo?
a. Ka kete kfwalak lan ma tomwatar rose nempa koko yakw kose nbal.
b. Ka kose klwarat farane na ningw momorip. Farlan to kose farane, keta to bise ma kose kal sasaf.
c. Kfwil safe ma bise kose, ma kete kfwil safe ma to bise kose. Contoh safe ma bise kose “Lerar monuk e kmpweang ma kbwaca Ratu Ni Ngribatnir doany menitar lim. Safe ma to bise kose Na minggu dalam e kmpweang ma kbwaca Ratu Ni ngribatnir a ne ma kunremi ayatar mpane.”
d. Ktwak tbwaringw fen lese nre du, ma rsalan feti safe ma kose ne nmpan naloran nre tate. Kfwil tomwatar ma ralele Ratu nema to rasaur safe ma yakw kose ne.
ANDAUN NGAMONAR YE MA KA TOSE TLARAT
2 KA TBACA FARYE
1. Tbaca fen ngamone desar.
2. Tbaca dedesar.
3. Tbaca nayak-nayak motak, ma kete tasnyalik.
4. Tbaca ayat ma tfil lo ma kete tbaca lamain.
5. Tbaca fen ngamone
6. Tbaca ma tfarnyobak na dalminrar.
7. Tbaca ma tafai isiny. (Nema tafai feti nfalak safe.)
8. Tbaca fen ngamone ma tafal ma tkaul tal.
9. Tbaca monuk safe ma namin teks dalam a ne.
10. Tbaca (perikop) ni kateman, nre paragraf ni kateman, ma kete tbaca lan ngribatin fen lese nre ayat fen lese.
2 NOAK MA TBACA E KA TANRIAK
1. Safe ma rfalak a ne.
2. Ngribatin ma rfalak dedesar.
3. Ngriar ma feleles nor ngri walyetar.
4. Ngriar ma feleles, ma to feleles. (Contoh makrokap ma ngaodir.)
5. Kabain ngamonar, mlyarat safe ma nkyoman na mir momorip.
6. Ka tareke ma tkaul tal tnyanuk pupular.
7. Tal kesimpulan tof ayatar ma tbaca ne.
8. Kete tamlufe ma tbaca catatan kaki, ma tsalan ayatar ma rapasal sir.