1 Yohanes i

Yohanes ni surat pertama

Ngribatin Luryain

Yohanes ye Yesus Ni manglartar sa, ma i ye Yakobus wainy. I ma narengi ni surat pertama ye. Ma i narengi nbal ni surat kedua ma ni surat ketiga. I narengi nbal Ibar Ngamone nof Yohanes, ma safe-safe monuk ma keta rbotin na lere ma nma ne na kitap Wahyu. Noak ma i narengi surat pertama ye, i namin kote Efesus. Na surat ye dalam e to nfalak feti narengi surat ye ber mpear nempa fafa i narengi surat ye ber soranyar ma ralele Yesus na propinsi Asia kecil ma lere ye tomwatar rtar feti Turki.

Yohanes narengi surat ye ma nafkoran soranyar ma ka rmorip e dalmir lese ror Amninrar Ratu ma Anaky Yesus ninr Ray Silai. I nsurat sir ma kete rlarat anftutw lepuskwar ma nwayat ma to ralele Ratu ma Yesus ninr Ray Silai. Noak a ne tomwatar ketnir raftutu anftutw lepuskwar ber soranyar a ne. Tomwatar a ne luryain e reluk soranyar a na Efesus, nempa to ralele botuan Yesus mpa rti a rtate soranyar, ma rbangal Yesus ninr Ray Silai. (2:19). Sir rlepusuk soranyar ma ralele Yesus ror nir anftutw lepuskwar a ne (2:26).

Tomwatar a ne rfalak feti Yesus to nma saryamprene ye neluk tomwate. Nempa Yohanes nbangal sir ma nfalak, ise ma naftutu anftutwar farane, iane feti nbangal Yesus. Ma nir anftutwar a ne to nof Ratu Smwangtany nempa nof smwangat yatkar nir ulun smwangtany (4:2-3, 6). Yohanes nfalak a nbal feti koko sir a rsalan desar Yesus ma rfofur I lo (1:1-4). Ma noak ma neluk tomwate na saryamprene, I darany a ntarbui na katutun sangwalu la ntebus tomwatar nir salar (5:6).

Ma tomwatar ketnir ma raftutu anftutw lepuskwar a ne rfalak a nbal feti boloka tomwatar rose sale keta smwangtir to rmat, mpa bise motak ma rose sale. Ne Yohanes nbangal sir ma nfalak, tomwatar ma rfalak feti dalmir lese ror Ratu nempa dedesar ma rose sale, iane rlepusuk ma to rlarat Ratu Ni anftutw botunar (1:6). Sir ka rmorip e rbalak Yesus ninr Ray Silai ma to Ni sal (2:5-6; 3:3). Ma tomwatar ketnir ma raftutu anftutw lepuskwar a ne rfalak a nbal feti Yesus ne to Ratu I, ma tomwat biase motak. Nempa Yohanes nfalak, tomwatar ma rfalak feti Yesus ye to neluk Ray Silai ma Ratu nfil I, sir a ne rlepusuk. Noak ma saryamprene to namin a fuky e, Yesus ye namin lo ma nor Amninrar Ratu (1:1).

Surat ye isiny

1:1-4 Yohanes ni ngribatin luryain

1:5; 2:29 Yohanes nsurat soranyar ma ka rmorip e rlarat Yesus ninr Ray Silai fali to Ni sal

3:1; 4:21 Soranyar ka rmorip e rakamis sir fali ninr Ray Silai dedesar ma nkamis sir

5:1-21 Tomwatar bise ma rmorip dedesar ror Ratu fali sir ralele I.