Yesus ninr Ray Silai nyoding feti keta nma nbali saryamprene
3:1-16
1 Wangur ma kwamis a kmi,
yakw kurengi surat fen lain du ber a kmi ye lo.
Na ningw surtar du ye yakw kureke desar ma minremi safe ma kfwalak ber a kmi a ne,
fali yakw kmpweang ma mdyaun lan kabain ngamonar na mir momorip.
2 Yakw kurengi farane nema minremi safe ma luryain e Ratu Ni nabyar a rfalak.
Ma minremi nbal ninr Mangnrur Silai ma ntebus kit a ne Ni faretar.
Ma kam ye ma meluk Ni mangsidkwar ma maftutu Ni faretar ber a kmi.
3 Ka minremi safe ma kfwalak ye fali ngrie ye ma ubany desar ber a kmi ma mifai.
Iane feti noak ma saryamprene ketla namsos,
keta tomwatar ma rmorip a rlarat nir makeus yatkar rma ma rarikan a kmi.
4 Ma sir rfalak,
“Yesus nyoding feti keta nma nbali saryamprene,
safo impe?
Empninrar rmat monuk lo,
ma ntabw nof Ratu nose saryamprene terik lere ye,
safe-safe monuk feleles motak.”
5 Sir rafai lo nempa rose lole ma to rafai feti luryain a ne Ratu nose langit ma saryamprene nof ma nfalak motak.
I nose saryamprene ne nof weye,
ma nose ma saryamprene nbotin nof weye dalam.
6 Ma rose lole ma to rafai feti nof weye ne I nose nbal kjaip silai la natloram saryampren luryain a ne.
7 Ma Ratu najake langit ma saryamprene terik lere ye,
nof lan ma nfalak a nbal.
Ma keta najake safe-safe monuk a ne terik lere ma I nukun sir nor au,
ma nfen monuk tomwatar ma to ralele I.
8 Wangur ma kwamis a kmi ka minremi,
na Ratu sounlury e,
lere lese nre ngarak ribun feleles motak.
9 Tomwatar ketnir rfalak feti Ratu to weni nma saryamprene ma nafdiat safe ma nyoding a ne.
Iane to botuan.
I to nma saryamprene fuky fali I nsabar ma ndaf a kmi.
Iane feti I nal let ber a kmi ma mtyate mir salar fali to nmpeang ma nukun tomwate fen lese nbal.
10 Nempa noak ma ninr Mangnrur Silai nma nbali saryamprene,
keta tomwatar rmetryat fali I farlan mangamnange nma na nronram.
Na lere ne langit keta namsos ma tarpake delak silai.
Ma metryat e au nane nafere safe-safe monuk ma ramin langit ma saryamprene ma ramwer.
11 Kmi mifai feti Ratu nafyatak safe-safe monuk farane,
mpa ka myorip e minglerap ma myose mlyarat Ni mpempeang.
12 Noak ma mdyaf lere ma Ratu nukun saryamprene,
ka myorip farane nema lere ne weni nma.
Na lere ne langit namsos,
ma au nane nafere safe-safe ma ramin langit a ne mpa raklal.
13 Nempa kit e,
dedesar ma tdaf safe ma Ratu nyoding ber kit a ne.
Iane langit ma saryampren beberi.
Ma lan tomwatar ma rmorip a rlarat Ratu Ni mpempeang ma ramin iane.
14 Mpa wangur ma kwamis a kmi,
noak ma mdyaf ma Ratu nukun saryamprene,
ka mireke ma myorip e minglerap ma to mir sal a na Ratu sounlury.
Ma ka myorip e mingamon myor Ratu.
15 Ka minremi feti ninr Mangnrur Silai ye to nukun kit a fuky,
fali I nsabar la ndaf a kmi.
Iane feti nal let ber a kmi ma mtyate mir salar nema nfair a kmi.
Waninrar Paulus ma tkamis i a ne narengi safe-safe monuk ber a kmi a nbal far ma kurengi ye.
I narengi surat ne nlarat andaun ngamone ma Ratu nal ber i.
16 Paulus narengi ngriar ye na ni surtar monuk.
Nempa masumput desar ma tomwatar ma rkaul ral ngriar ketnir ma narengi na ni surtar a ne.
Sir rfule ngribatnir a ne,
ma ngriwalyetar a nbal ma rarengi na Kitap Lelerap dalam.
Iane nwayat ma sir to ramkoran ma ralele Ratu.
Ma keta Ratu nukun sir terik ma dedesar.
Salam penutup
3:17-18
17 Wangur ma kwamis a kmi,
kmi mifai tomwatar ma raftutu anftutw lepuskwar a ne nir adat.
Mpa ka mijake kmi nema kete myose mlyarat tomwat yatkar a ne nir anftutw lepuskwar.
Fali iane nwayat ma keta to mlyarat Ratu Ni anftutw botunar a nbal.
18 Mpa yakw ktwak ma ka myorip e,
mtyafal ma milele Yesus ninr Mangnrure.
I a ne ninr Ray Silai ma nfair kit a nbal.
Ka mtyafal ma milele I nema mifai Ni dalamy ngamone ma nfatutu ber a kmi a ne.
Ma mya ma tdangin I lere ye terik ma dedesar.
Amen.
Nater lan ye.
Salam nof kam Petrus.