Ka mijake kmi myof tuanggurw lepuskwar
2:1-22
1 Luryain e,
nabi lepuskwar ramin ror tomwat Israelar lo.
Ma lere ye tuanggurw lepuskwar rma ma ror kmi a nbal.
Ma keta sir raftutu ramudim anftutw lepuskwar,
nwayat ma tomwatar ramsoal Yesus ninr Ray Silai.
Ma keta sir to ryoding a nbal feti Yesus ye nir Mangnrure ma ntebus sir nof nir salar a ne.
Sir rose farane mpa keta metryat e,
Ratu nukun sir ma rmat desar.
2 Boloka farane,
tomwatar yadin rose rlarat tuanggurw lepuskwar a ne nir adat yatkar.
Sir a ne raosangri bolar motak rlarat nir makeus.
Sir rose farane nwayat ma tomwatar rarikan Yesus safo I neluk dalamten malonri ma takmat Ratu.
3 Tuanggurw lepuskwar a ne rmate doit,
mpa rasaur lan nir ansaur lepuskwar la ranriak doit rof a kmi.
Nempa nof luryain e,
Ratu ntetak ma nukun sir lo,
mpa la nfen sir monuk.
4 Kit tafai feti Ratu Ni malaektar ma rose sale motak e I to nlompang ma nukun sir,
ma nau sir a na naraka.
Na iano nkete sir nor rewe ma nau sir a na ain makrokap desar,
ma keta ramin iane terik ma Ratu nukun sir.
5 Ma luryain e,
Ratu to nlompang ma nukun tomwatar monuk na are ne.
Ma I nose kjaip silai la natloram tomwatar ma rbangal Ratu na saryamprene.
Nempa I nfair lan Nuh nor tomwatar itw fali Nuh ye ma naftutu tomwatar ma rmorip a rlarat Ratu Ni mpempeang.
6 Feleles farlan kote Sodom ma Gomora nbal.
Ratu ntolar au ma napu nafere sir terik ma rmat monuk.
I nose farane neluk faniak feti keta nukun tomwatar ma rbangal I.
7 Nempa noak ma Ratu to nukun sir a fuky e I nfair Lot,
fali lan i ma nose kabain ngamonar nlarat Ni mpempeang.
Lerar monuk e,
i nsalan tomwatar ma to rose rlarat Ratu Ni faretar,
ma raosangri bolar rlarat nir makeus,
mpa dalam suse desar.
8 Lot ye dedesar ma nlarat Ratu Ni mpempeang.
Ma lerar monuk e,
i nsalan ma ndengar ma tomwatar rose kabain yatkar mpa dalam a nlor desar fali nmorip nor sir.
9 Ratu nose kabanir monuk a ne la nfatutu feti I Ni kuase ma nfair tomwat ngamonar noak ma sir rkoman suse.
Ma Ni kuase nbal ma nukun tomwat yatkar lere ye,
ma na lere ma nma ne noak ma I nukun tomwatar monuk na saryamprene ye.
10 Nempa tomwatar ma dedesar ma rose rlarat nir makeus yatkar,
keta Ratu nukun sir maberat desar.
Sir a ne rose kabain yatkar la rafngeryai tenir,
ma to releng Ratu Ni kuase.
Tuanggurw lepuskwar a ne nbal rafdas desar sir,
ma rbaran ma rarikan malaekat lelerpar ma ramin surga.
11 Safo malaektar a ne ramkoran ma nir kuase rlengan rof tuanggurw lepuskwar a ne.
Nempa sir to rbaran ma rarikan malaekat walyetar noak ma rsidang sir na Ratu sounlury.
12 Tuanggurw lepuskwar a ne sir farlan binatngar ma to nir andaun.
Sir rarikan malaekat lelerpar ma smwangat walyetar ma ramin surga,
safo to rafai sasaf a na sir.
Ma sir rafai lan ma rose kabanir rlarat nir makeus,
mpa keta Ratu nfen monuk sir farlan binatngar ma rtalir ma tomwatar romat sir ma rfen sir.
13 Tuanggurw lepuskwar a ne keta rkoman suse fali kabain yatkar ma sir rose ne.
Sir rmpeang desar ma raosfesta la rafsenange tenir na ler fardu langit.
Ma noak ma rtame ror a kmi e,
to nir memeat ma rose kabanir rlarat nir makeus.
14 Ma noak ma sir rsalan batar e,
rdaun lan ma rkoil sir.
Sir to rafelingat ma rose kabain yatkar.
Ma sir rfule nbal tomwatar ma betno ralele Yesus,
ma rlarat sir ma rose kabain yatkar.
Sir biase nbal ma rkampres tomwatar nir kabanir.
Sir rose farane mpa la Ratu nukun sir.
15 Sir to rlarat Ratu Ni dalamten malonri nwayat ma rmpan sale rlarat safe ma Bileam nose.
Bileam ye Beor anaky.
I nmate desar doit mpa nose kabain yatkar nema nonri dotyar.
16 Bileam ye nabi i.
I ni keledai biase motak ma to natanuk,
nempa Ratu nose ma ni keledai ne natanuk ma ntampu i,
nema kete nose kabain modar a ne.
17 Tuanggurw lepuskwar a ne rfule tomwatar ma rfalak feti farlan rlarat sir e keta ubany ber sir,
safo to ronri sasaf.
Iane farlan weye matan ma nmangretw,
ma farlan a nbal mutnar ma mnaur naflae kalin sir motak,
mpa keta to udan.
Iane nwayat ma Ratu nau ain ma makrokap desar ber sir.
18 Ma sir ratanuk e rafdas sir nempa nir ngribatnir a ne to ubnir sasaf.
Sir rfule tomwatar ma betno ralele Yesus nema rose rbali kabain yatkar.
Ma nir makeus yatkar a ne rwayat ma tomwatar a ne rkoil lamain tomwatar.
19 Sir raftutu tomwatar a nbal feti farlan rlarat sir e,
keta yayatrwar to rkete sir,
mpa bise ma rose safe-safe motak rlarat nir mpempeang.
Nempa koko sir e,
nir makeus yatkar lolone nkete sir,
nwayat ma nir momorip nayatak.
Fali tomwatar ma kabanir a rakawar sir a ne,
keta rlarat dedesar.
20 Tomwatar bise ma rtate nir makeus yatkar fali rafai Yesus ninr Ray Silai lo.
I ye ma neluk ninr Mangnrur Silai ma nfair kit.
Nempa farlan rose kabain yatkar ma rakawar a rbali ber kabanir a ne,
keta nir momorip nayatak nlengan nof luryain.
21 Ni ngafele e,
tomwatar ma farane to rafai desar Ratu Ni anftutw botunar,
nlengan nof ma rafai lo nempa to rose rlarat.
22 Mpa ngribatnir ye snyain desar ber tomwatar ma rmorip farane,
“Sir farlan asu ma nane nbali ni mute,
ma babi ma radiris i lo nempa natowat a nbali.”