Petrus ni surat kedua
Salam
1:1-2
1 Ye surat nof yakw Simon Petrus. Yakw kweluk Yesus ninr Ray Silai Ni mangkaryae ma Ni mangsiduk a nbal. Yakw kurengi surat ye ber kmi ma milele Yesus farlan kam a nbal. Yesus ninr Ray Silai ye ninr Ratu ma nfair kit. I nose ma kmi bise milele I farlan kam a nbal, fali I namlonry ma to nasalan sou. 2 Yakw ktwak ma weni Ratu nfatutu Ni dalamy ngamone ma nlie nlengan, ma nal maline ber a kmi. Ma kmi myonri berkat a ne fali mifai Amninrar Ratu ma Yesus ninr Mangnrure.
Tomwatar ma ralele Yesus ka rmorip a rlarat Ratu Ni mpempeang
1:3-15
3 Wangur, Ratu nal Ni kuase ma ntulung kit na safe-safe ma ubany ber kit nema bise ma kit tmorip a tlarat Ni mpempeang. Ma kit bise ma tose farane fali kit tafai I botuan. Ratu nfil kit ma teluk Ni tomwatar fali Ni dalamy ngamone ma Ni kuase ma nlie nlengan. 4 Ma fali Ni dalamy ngamone ma Ni kuase ma nlie nlengan a ne, mpa nafdiat safe ma nyoding ma nal berkat ma nlie nlengan ber kit. I nose farane nema ninr adat feleles farlan I, ma bise ma tliak kit tof makeus yatkar ma nafyatak ninr momorip. 5 Farlan mpyeang ma mir adat feleles farlan Ratu, ka mtyafal ma myose kabanir ye na mir momorip: ka dedesar ma mimkoran ma milele Yesus ninr Ray Silai, ma mtyafal ma myose kabain ngamonar. To lan iane nempa ka mireke nbal ma mifai botuan Ratu. 6 Ma ka mtyayan myal mir makeus a nbal. Ma ka mireke ma bomir myal ma mibare suse, ma ka myose mlyarat Ratu Ni mpempeang a nbal. 7 Ma ka mkyamis waninrar ma ralele Yesus ninr Ray Silai nbal, ma mkyamis a nbal tomwatar monuk. 8 Farlan myose monuk safe ma kfwalak a ne, ma mtyafal ma myose monuk kabanir a ne nbal keta ubany desar na mir momorip. Fali kabanir monuk a ne rose ma mtyafal ma mifai Yesus ninr Ray Silai ma neluk ninr Mangnrure. 9 Nempa ise ma to nose nlarat safe ma kfwalak a ne, ni andaun naktem farlan tomwate ma nabol fali namlufe lo feti Ratu nlure ni salar ma luryain e nose ne.
10 Mpa wangur, ka mireke ma myose kabanir a ne, la mfyatutu ber tomwat walyetar feti ni botuan e Ratu nfil a kmi ma myeluk Ni tomwatar. Farlan myorip farane keta mimkoran ma milele Ratu ma to mitliur I. 11 Farlan myose monuk kabanir ma kfwalak ye, keta Ratu nlangun a kmi nor dalam senange, ma mimin ain ma Yesus ninr Mangnrure neluk Rai ma nfarete terik ma dedesar. I ye ma neluk ninr Ray Silai ma nfair kit.
12 Mpa boloka mifai kabanir monuk a ne, ma dedesar ma mlyarat anftutw botunar ma raftutu ber a kmi a ne, nempa keta dedesar ma kfwalak kabanir a ne ber a kmi ma ka minremi. 13 Noak ma lolone kmworip e kdwaun feti ka dedesar ma kswurat a kmi na kabanir a ne ma ka minremi. 14 Yakw kufai feti ketla kmwat fali Yesus ninr Ray Silai ma neluk ninr Mangnrure ne nafbotin ber yakw lo. 15 Iane nwayat ma kureke ma kufbwotin kabanir monuk ye ber a kmi, nema boloka kmwat lo nempa dedesar ma minremi safe ma kfwalak ne.
Petrus nafbotin safe ma koko i a nsalan na Yesus ninr Ray Silai
1:16-21
16 Wangur, kam maftutu ber a kmi feti keta Yesus ninr Ray Silai ma neluk ninr Mangnrure nma nbali saryamprene nor Ni kuase. Noak ma kam maftutu ne kam to masaur mamy lepuskwar ber a kmi, fali koko kam a msalan desar Yesus Ni dadangin ma nlie nlengan a ne. 17 Ma kam msalan desar noak ma Amninrar Ratu nafdas I ma nfatutu Ni kuase. Ma kam mdengar Ratu Mangkuase liriny nof langit ma nfalak, “I ye Yakw Anakw ma kwamis I ma nafsenange dalangw.” 18 Noak a ne kam maktem Yesus mamin ain lelerap na bubuar ma Ratu nafbotin I a na. Ma kam mdengar desar liriny nof surga.
19 Iane nwayat ma kam mtafal ma malele snyurat nof Ratu ma luryain e nabyar a rfalak na Yesus. Mpa ni ngafele e ka mdyengar ma myose mlyarat safe ma rfalak a ne, fali iane feleles farlan damar ma idak na makrokap dalam. Ka mdyengar ma myose mlyarat snyurat a ne terik ma Yesus ninr Ray Silai nma nbali saryamprene. Ma Yesus Ni mamae ne feleles farlan lere ma nma das na bobolisin, ma keta I nodir dalmir farlan telyawar ma nma das. 20 Ka minremi safe ma kfwalak ye koli ngrie ye ma ubany desar nof safe-safe monuk. Iane feti tomwate to bise ma nal ni andaun la nfalyole snyurat nof Ratu ma nabyar rfalak na Kitap Lelerap dalam. 21 Fali to tomwate fen lese bise ma nafbotin snyurat nof Ratu ne nlarat koko i ni mpempeang. Nempa Ratu Smwangtany nkuase i mpa bise ma nafbotin Ni snyurat a ne.