Kit teluk Ratu angkir
3:1-10
1 Wangur,
mdyengar fen ngamone,
Amninrar Ratu nkamis desar kit.
Ma Ni ankamis ma nlie nlengan a ne nwayat ma nal kit neluk angkir,
ma botuan feti Ratu angkir ber kit.
Nempa tomwatar na saryamprene sir to rafai feti Ratu angkir ber kit fali to rafai Ratu.
2 Wangur ma kwamis a kmi,
lere ye kit teluk Ratu angkir,
ma na lere ma nma ne to tafai botuan fuky feti keta ninr momorip farpe.
Nempa kit tafai lo feti noak ma ninr Ray Silai nma nbali saryamprene keta kit tbalak I,
fali keta tsalan desar felany.
3 Tomwatar monuk ma dedesar ma rdaf ma rsalan I,
ka rajake tenir nema kete rose sale farlan ninr Ray Silai ma to Ni sal.
4 Ise ma nose sale,
iane nlangas Ratu Ni faretar,
fali tomwate ma nlangas Ratu Ni faretar iane sale lo.
5 Ma kmi mifai feti ninr Ray Silai nma saryamprene ma nkes kalin tomwatar nir salar,
ma I desar e to Ni sal sasaf.
6 Ma tomwatar monuk ma dalmir lese ror ninr Ray Silai,
to rose sale dedesar.
Nempa tomwatar ma dedesar e rose sale,
to rkaul ral sasaf na I ma to rafai I.
7 Angkur,
ka kete myinrang ma tomwatar rfule kmi.
Tomwate ma nose nlarat Ratu Ni mpempeang iane nose diat,
feleles farlan ninr Ray Silai ma dedesar e I nose diat.
8 Nempa ise ma nose sale dedesar,
i neluk smwangat yatkar nir ulun anaky fali nof luryain e,
smwangat yatkar nir ulun a ne nose sale.
Iane nwayat ma Ratu Anaky nma saryamprene ma nafyatak safe ma smwangat yatkar nir ulun nose ne.
9 Tomwatar ma reluk Ratu angkir lo,
to rose sale dedesar fali Ratu namtoran narwayan sir.
Ma fali Amnir ber Ratu mpa to bise ma rose sale dedesar.
10 Ma kit bise ma tafai tal feti,
Ratu angkir ber mpear ma smwangat yatkar nir ulun angkir ber mpear.
Tomwatar ma to rose rlarat Ratu Ni mpempeang,
ma to rkamis wanir ma ralele Yesus,
sir a ne to reluk Ratu angkir.
Tomwatar ma ralele Yesus ka rakamis sir
3:11-18
11 Wangur,
noak ma betno milele Yesus e,
kmi mdyengar ibar feti ka takamis kit.
12 Kete tose tbalak Kain ma smwangat yatkar nir ulun nkuase i mpa nfen wainy Habel.
Kmi mifai nre tate,
safema nfen wainy Habel?
I nfen wainy Habel fali i nose kabain yatkar ma wainy e,
nose kabain ngamonar na Ratu sounlury.*
13 Mpa wangur,
farlan tomwat saryamprenar rkedan a kmi e,
kete myetrat.
14 Farlan tkamis waninrar ma ralele Yesus iane kit tafai feti smwangtinrar to rmat lo,
ma tonri momorip dedesar fali dalminrar lese tor Ratu.
Mpa tomwatar ma to rkamis waninrar iane smwangtir lolone rmat.a
15 Ma tomwatar ma rkedan wanir ma ralele Yesus,
sir feleles farlan tomwatar ma rafen.
Ma kit tafai feti sir ma rafen a ne keta to ronri momorip dedesar.
16 Yesus ninr Ray Silai nanrenre I ma nmat la ntebus kit.
I nose farane ma nfatutu ber kit feti ka tose farpe ma tkamis waninrar.
Mpa kit a nbal e,
ka tanrenre ninr momorip la tulung waninrar.
17 Farlan tomwatar sa ma ni kabanir a nres,
ma i nsalan wanir sa ma na ni momorip e to dengan,
nempa to nfaduli nor i,
iane feti to nkamis Ratu.
18 Mpa angkur,
ka kete tfalak tor sukninrar motak feti tkamis waninrar ma to tal sasaf la tulung sir.
Nempa ka tfatutu na ninr langtwar feti tkamis sir,
fali iane feti tkamis botuan sir.
Ka tbali Ratu tor dalminrar lelerap
3:19-24
19 Farlan tkamis waninrar ma ralele Yesus e,
kit tafai feti tmorip a tlarat Ratu Ni anftutw botunar.
Iane nwayat ma dalminrar mperane noak ma tsampayang ber Ratu.
20 Boloka tdaun feti nre kete Ratu to nlangun kit fali dalminrar lolone rarai,
ka tanremi feti Ratu ye silai I ma nafai safe-safe monuk ma tose ne.
Iane nwayat ma dalminrar mperane noak ma tsampayang ber Ratu.
21 Mpa wangur ma kwamis a kmi,
farlan trase feti dalminrar rlerap,
keta to tamtaut noak ma tsampayang ber Ratu.
22 Ma keta nal safe-safe motak ma tak tof I fali tlarat monuk Ni faretar,
ma tose kabanir ma tafsenange dalamy.
23 Ma Ni farete ber kit farye:
ka kit talele feti Yesus ninr Ray Silai ye Ratu Anaky,
ma ka takamis kit tlarat ninr Ray Silai Ni farete ber kit.
24 Ise ma nlarat Ratu Ni faretar,
keta i nmorip dalam lese nor Ratu ma Ratu dalam lese nor i a nbal.
Ma Ratu nal Smwangtany ber kit lo la nfatutu feti Ratu namin dalminrar.