Yesus ninr Ray Silai neluk lenre ma nafdiat kit na Ratu sounlury
2:1-6
1 Angkur, mdyengar ma kfwalak, yakw kurengi ngriar ye ber a kmi, nema kete myose sale. Nempa farlan tomwat sa nose sale, kit ninr tomwat sa ma neluk lenre ber kit ma nafdiat kit a na Amninrar Ratu sounlury, iane Yesus ninr Ray Silai. I ye ma nose lan kabain botunar. 2 I ye ma nmat ma neluk snyompe ma ntebus ninr salar. I to ntebus lan kit ninr salar, nempa ntebus tomwatar monuk na saryamprene ye nir salar a nbal.
3 Ma farlan tose tlarat Ratu Ni faretar iane nfatutu feti tafai I. 4 Ise ma nfalak feti nafai Ratu nempa to nlarat Ni faretar iane nlepusuk, ma nfatutu feti to nmorip a nlarat Ratu Ni anftutw botunar. 5 Nempa ise ma nmorip a nlarat Ratu Ni ngribatnir, botuan feti i nkamis desar Ratu nor dalamy kateman. Iane nfatutu feti tmorip e dalminrar lese tor Ratu. 6 Ise ma nfalak feti nmorip e dalamy lese nor Ratu, ka i nmorip a nlarat Yesus ninr Ray Silai Ni wewelmpampane.
Farlan tmorip a na ngaodir dalam ka takamis kit
2:7-17
7 Wangur ma kwamis a kmi, safe ma kurengi ber a kmi ye to faret beberi, nempa faret wangim. Farete ye Ratu Ni ngribatnir ma kmi mdyengar a ne noak ma betno milele Yesus ninr Ray Silai. 8 Boloka farane farete ma kurengi ye farlan faret beberi. Ma kmi bise ma msyalan desar faret beberi ne myof safe ma Yesus ninr Ray Silai nose na Ni momorip. Ma myof safe ma kmi myose na mir momorip a nbal. Kmi myose farane fali to myorip a na makrokap dalam, nempa myorip a na ngaodir dalam lo. Iane feti makrokap to dodo e nlai lo, ma ngaodir a nma lo. 9 Ise ma nfalak feti nmorip a na ngaodir dalam, nempa nkedan wainy ma nalele Yesus, i lolone nmorip a na makrokap dalam terik lere ye. 10 Ma ise ma nkamis wainy ma nalele Yesus, i nmorip a na ngaodir dalam, ma to ni adat sasaf ma rwayat i ma nfufw far sale dalam. 11 Nempa ise ma nkedan wainy ma nalele Yesus, i nmorip a na makrokap dalam. Ma i nmpan a na makrokap dalam mpa to nafai feti nal farpe, fali makrokap resi nwayat ma to nkeban sasaf.
12 Angkur, yakw kurengi surat ye ber a kmi, feti Ratu nlure mir salar lo fali safe ma Yesus ninr Ray Silai nose. 13 Makene batmakene, yakw kurengi surat ye ber a kmi fali kmi mifai Yesus ninr Ray Silai. I ye ma namin nof luryain lo. Ma ber usberyar, yakw kurengi nbal surat ye ber a kmi fali mifufu smwangat yatkar nir ulun lo.a 14 Yakw kurengi surat ye ber kangkir a kmi, fali kmi mifai Amninrar Ratu. Ma yakw kurengi ber makene batmakene kmi, fali mifai Yesus ninr Ray Silai ma namin nof luryain a ne. Yakw kurengi surat ye ber usberyar kmi a nbal, fali dalmir a ramkoran ma dedesar ma mlyarat Ratu Ni ngribatnir, ma kmi mifufu smwangat yatkar nir ulun lo.
15 Mpa ka kete mkyamis saryamprene ma safe-safe motak ma ramin a ne, fali ise ma nkamis kabain saryamprenar, iane nfatutu feti to nkamis Amninrar Ratu. 16 Fali kabain saryamprenar monuk a ne to nof Amninrar Ratu nempa nof saryamprene. Kabanir a ne farlan: makeus yatkar, matmir fulun kabanir, ma ngriar ma nose ma mifdas a kmi. 17 Saryamprene nor ni makeus yatkar to dodo e rlai, nempa tomwate ma nose nlarat Ratu Ni mpempeang, keta nmorip dedesar.
Tomwat sa ma nbangal Yesus ninr Ray Silai
2:18-29
18 Angkur, mdyengar ma kfwalak, saryamprene ye ketla namsos. Ma keta tomwat sa ma nbangal Yesus ninr Ray Silai nma far ma mfalak ber a kmi a ne. Ma lere ye, tomwatar yadin ma rbangal Yesus ninr Ray Silai ne rbotin lo, iane nfatutu desar feti saryamprene ketla namsos. 19 Tomwatar a ne luryain e ror kit nempa lere ye to dalmir lese ror kit mpa rti a rtate kit, ma rbangal Yesus ninr Ray Silai. Farlan botuan feti dalmir lese ror kit e, keta dedesar ma ror kit. Nempa rti a rtate kit la rfatutu feti to dalmir lese ror kit. 20 Nempa Yesus ninr Ray Silai nal Ratu Smwangtany ber a kmi lo, nwayat ma kmi monuk mkyaul myal Ratu Ni anftutw botunar. 21 Yakw kurengi surat ye ber a kmi e to feti kmi to mifai anftutw botunar. Ni botuan e mkyaul myal desar anftutw botunar a ne, ma mifai feti na Ratu Ni anftutw botunar a ne to kabain lepusuk fen lese nbal.
22 Wangur, ni botuan e tomwate ma to nyoding feti Yesus ye Ray Silai ma Ratu nyoding I, tomwate ne nlepusuk rut. Tomwate ne dedesar ma nbangal Yesus ninr Ray Silai, ma i to nyoding Ratu Ame ma Anaky. 23 Fali ise ma namsoal feti Yesus ye Ratu Anaky iane to dalamy lese nor Ratu Ame. Ma ise ma nyoding feti Yesus ye Ratu Anaky iane dalamy lese nor Ratu Ame nbal.
24 Mpa ka dedesar ma myose mlyarat anftutw botunar ma luryain e kmi mdyengar noak ma betno milele Yesus ninr Ray Silai. Ma farlan myose farane keta dalmir lese myor Ratu Ame ma Anaky. 25 Ma I nyoding ber kit farye: keta tonri momorip dedesar.
26 Yakw kurengi kabanir monuk a ne ber a kmi, fali tomwatar ketnir rareke ma rfule kmi. 27 Nempa Yesus ninr Ray Silai nal Ratu Smwangtany ber a kmi lo ma dedesar e namin a kmi. Mpa kete minriak tomwat walyetar ma raftutu kmi, fali Ratu Smwangtany koko I ma naftutu kmi na safe-safe monuk. Ma safe ma I naftutu ne botuan ma to nlepusuk. Mpa dedesar ma mlyarat safe ma Ratu Smwangtany naftutu ber a kmi a ne, ma dalmir lese myor ninr Ray Silai.