Yohanes ni surat pertama
Ratu Ni ngribatnir nal momorip ber kit
1:1-4
1 Surat ye nasaur na Yesus ninr Ray Silai,
I a ne Ratu Ni ngribatnir ma nal momorip ber tomwatar.
Ma noak ma saryamprene to namin a fuky e,
I namin lo.
I ye ma kam mtungan,
msalan,
momat,
ma mdengar ma I natanuk.a
2 Botuan feti I ma nal momorip a ne nma saryamprene lo,
ma kam msalan desar I.
Mpa kam bise ma mafwibar ber a kmi feti I ye ma nal momorip dedesar.
Luryain e I nor Ratu Ame ma Ratu koko I ma nafbotin I ber kam.
3 Safe ma kam msalan ma mdengar a ne,
kam mafwibar ber a kmi,
nema dalmir lese myor kam.
To lan iane nempa kit a nbal e dalminrar lese tor Amninrar Ratu ma Anaky Yesus ninr Ray Silai.
4 Kam marengi ngriar monuk a ne ber a kmi nema dalminrar rsenang resi.
Ratu neluk ngaodir ber kit
1:5-10
5 Wangur,
ye ibar ma kam mdengar mof Yesus ninr Ray Silai,
ma mpeang ma mafwibar ber a kmi a nbal.
Ibar a ne feti,
“Ratu ye nanglerap ma to Ni sal sasaf.
I farlan ngaodir ma to makrokap fen rufuky a nbal.”
6 Mpa farlan kit tfalak feti,
dalminrar lese tor I,
nempa tmorip a na makrokap dalam,
iane tlepusuk ma to tlarat Ratu Ni anftutw botunar.
7 Nempa farlan kit tmorip a na ngaodir dalam farlan Ratu ma nmorip a na ngaodir dalam,
mpe keta tmorip e dalminrar lese tor tomwat walyetar ma ralele Yesus.
Ma Ratu naflerap ninr salar monuk,
nalyole Anaky Yesus darany ma ntarbui na katutun sangwalu.
8 Farlan kit tfalak feti to ninr sal sasaf,
iane tlepusuk a tbali kit,
ma iane nfatutu feti to tlarat Ratu Ni anftutw botunar.
9 Farlan kit tyoding feti tose salar ber Ratu lo,
keta I nlure ninr salar ma naflerap kit tof ninr adat yatkar monuk.
Ratu nose farane fali I dedesar ma nlarat Ni yoyoding ma nose lan kabain botunar.
10 Ratu nfalak feti tomwatar monuk rose sale,
mpa farlan kit tfalak feti to tose sale,
iane feleles farlan to tlangun Ni anftutwar,
ma tfalak feti Ratu nlepusuk.