Ka tafai safe ma nbangal Ratu Smwangtany
4:1-6
1 Wangur ma kwamis a kmi,
tomwatar yadin rfalak feti nir anftutwar a ne nof Ratu Smwangtany.
Ka kete misnyalik ma milele sir,
nempa ka msyalan fen ngamone fuky feti nir anftutwar a ne nof Ratu Smwangtany nre tate.
Fali tomwatar yadin rose felnir far Ratu Ni nabyar ma ramin monuk saryamprene.
2 Kmi bise ma mifai feti safe ma raftutu ne nof Ratu Smwangtany nre tate,
ka msyalan farye:
Farlan ryoding feti Yesus ninr Ray Silai nma saryamprene neluk tomwate,
iane feti safe ma raftutu ne nof Ratu.
3 Nempa tomwatar ma to ryoding feti Yesus nma saryamprene ma neluk tomwate,
sir a ne ma rbangal Ratu Smwangtany.
Ma kmi mdyengar lo feti smwangat ma nbangal ninr Ray Silai ne keta nma saryamprene ye,
mpe lere ye namin lo.
4 Angkur ma kwamis a kmi,
kmi ye myeluk Ratu angkir.
Mpa noak ma nabi lepuskwar a ne rma ma rfule kmi e to mlyangun nir anftutwar a ne.
Iane feleles farlan ma kmi mifufu sir lo,
fali Ratu Smwangtany ma namin a kmi a ne,
Ni kuase nlengan nof smwangat yatkar nir ulun ni kuase ma nkuase tomwatar na saryamprene ye.
5 Sir ma raftutu anftutw lepuskwar a ne rof saryamprene ma to ralele Ratu.
Ma raftutu anftutw saryamprenar mpa keta tomwatar na saryamprene ma rdengar nir anftutwar a ne.
6 Nempa kit ye teluk Ratu Ni tomwatar,
mpa keta tomwatar ma ralele Ratu ma rdengar ninr anftutwar.
Nempa tomwatar ma to ralele Ratu,
keta sir to rdengar ninr anftutwar.
Nof a ne kit bise ma tafai feti anftutw mpeye ma botuan ma anftutw mpeye ma nlepusuk.
Ratu Ni ankamis nlie nlengan ber kit mpa tmorip e ka takamis kit
4:7-21
7 Wangur ma kwamis a kmi,
mya ma takamis kit,
fali lan Ratu Ni ankamis ma nose ma takamis kit.
Ma tomwate ma nkamis wainy ma nalele Yesus,
i a ne Ratu anaky,
ma i nkaul nal safe-safe na Ratu.
8 Tomwate ma to nkamis wainy ma nalele Yesus,
iane feti i to nkaul nal safe-safe na Ratu fali Ratu Ni adat a ne dedesar ma nkamis tomwatar.
9 Ratu nfatutu Ni ankamis ber kit nalyole Anaky mesan.
I nsiduk Anaky ma nma saryamprene ye nema nalyole Anaky a ne kit tonri momorip dedesar.
10 Ratu Ni ankamis a ne farye:
Kit to tkamis Ratu baluan nempa Ratu ma nkamis kit baluan.
Ma I nfatutu Ni ankamis ne noak ma I nsiduk Anaky neluk snyompe la ntebus ninr salar nema Ratu nlure kit.
11 Wangur ma kwamis a kmi,
Ratu Ni ankamis ber kit a ne nlie nlengan desar.
Iane nwayat ma kit a nbal e ka takamis kit.
12 To tomwate fen lese ma nsalan Ratu fuky.
Nempa farlan takamis kit,
iane nfatutu feti Ratu namin dalminrar ma Ni ankamis a ne nose ma takamis kit farlan ma I nkamis kit.
13 Ma fali I nal Smwangtany ber kit lo mpa kit tafai feti dalminrar lese tor I ma I a nbal e dalam lese nor kit.
14 Ma kam msalan desar ma Ratu nsiduk Anaky ma nfair tomwatar na saryamprene.
Iane ma kam mafwibar ber a kmi.
15 Tomwate ma nyoding feti Yesus ye Ratu Anaky,
i nmorip e dalam lese nor Ratu ma Ratu dalamy lese nor i a nbal.
16 Kit tafai ma talele feti Ratu nkamis desar kit.
Ma Ratu Ni adat a ne,
dedesar ma nkamis tomwatar.
Mpa tomwate ma nkamis wainy,
i nmorip dalamy lese nor Ratu,
ma Ratu dalamy lese nor i a nbal.
17 Wangur,
noak ma dalminrar lese tor Ratu,
Ni ankamis ne nose ma takamis kit farlan ma I nkamis kit.
Mpa nait ni lere ma Ratu nal tetetak ber tomwatar,
kit to tamtaut fali ninr wewelmpampane na saryamprene ye farlan Yesus ninr Ray Silai Ni wewelmpampane.
18 Tomwate ma nkamis Ratu nor dalamy kateman keta to namtaut ma Ratu nukun i.
Ratu Ni ankamis ma nlie nlengan a ne nafkoran dalminrar ma nose ma to tamtaut.
Mpa ise ma namtaut iane feti i nkamis Ratu nor dalamy tubun motak.
19 Mpa kit bise ma takamis kit fali Ratu nkamis kit baluan lo.
20 Farlan tomwatar sa nfalak feti i nkamis Ratu nempa nkedan wainy,
iane i nlepusuk.
Fali ise ma nkedan wainy ma lerar e nsalan i,
keta to bise ma nkamis Ratu ma to nsalan I a fuky.
21 Ma ka minremi farete ma Ratu nal ber kit farye:
Ise ma nkamis Ratu,
ka nkamis wanir ma ralele Yesus a nbal.