Ise ma nalele Yesus to kabain yatkar na saryamprene ma nkete i
5:1-5
1 Tomwatar ma ralele feti Yesus ye Ray Silai ma Ratu nyoding I,
sir a ne Ratu angkir.
Ma tomwatar ma rkamis Ratu Ame,
keta rkamis Ni angkir a nbal.
2 Farlan tkamis Ratu ma tose tlarat Ni faretar iane nfatutu feti tkamis Ratu angkir.
3 Mpa farlan tkamis Ratu,
iane feti tose tlarat Ni faretar.
Ma ni botuan e Ni faretar a ne to maberat.
4 Ise ma neluk Ratu Anaky,
keta i nafufu saryamprene.
Iane feti to kabain yatak fen lese na saryamprene ye ma nkete i.
I bise ma nose farane fali nalele Yesus ninr Ray Silai.
5 To tomwate fen lese ma nafufu saryamprene,
lan tomwate ma nalele feti Yesus ye Ratu Anaky.
Lan Yesus ninr Ray Silai ma nal momorip dedesar ber tomwatar ma ralele I
5:6-12
6 Yesus ninr Ray Silai ye ma nma saryamprene.
I ye ma Yohanes nadiris I nor weye.
I ye ma darany a ntarbui na katutun sangwalu nbal.
Mpa botuan feti I nma saryamprene e to lan ma radiris I,
nempa ma nmat a nbal ma darany ntarbui na katutun sangwalu.
Ma Ratu Smwangtany koko I ma nfalak safe-safe na Yesus,
ma safe ma nfalak a ne botuan ma to nlepusuk.
7 Mpa ni botuan e ngriar tel ye ma rfatutu feti Yesus ye Ratu Anaky.
[Ngriar tel ma ramin surga ne:
Ratu Ame,
Ratu Ni ngribatnir,
Ratu Smwangtany.
Ma ratel ye lese.a
8 Ma ngriar tel ye ma rfatutu feti Yesus nmorip a na saryamprene] Iane:
nof safe ma Ratu Smwangtany a nfalak,
nof ma radiris I ror weye,
ma nof ma darany a ntarbui na katutun sangwalu.
Ngriar tel ye rordeng fali rfatutu monuk na Yesus Ni momorip na saryamprene.b
9 Kit bise ma talele tomwate ma neluk mangtungan na ngriar sa,
nempa farlan Ratu koko I a nfalak keta nlengan nof safe ma tomwatar rfalak fali Ratu I.
Mpa ka talele safe ma Ratu nfalak na Anaky a ne.
10 Ise ma nalele Ratu Anaky,
iane i nalele feti safe ma Ratu nfalak na Anaky a ne botuan.
Ma ise ma to nalele Ratu,
iane feleles farlan ma nfalak feti Ratu nlepusuk,
fali i to nalele safe ma Ratu nfalak na Anaky.
11 Ma safe ma Ratu nfalak a ne farye:
Ratu nal momorip dedesar ber kit,
ma kit bise ma tonri momorip a ne farlan talele Anaky.
12 Ise ma nmorip dalamy lese nor Ratu Anaky,
i nonri momorip dedesar;
ma ise ma to nmorip dalamy lese nor Ratu Anaky,
i to nonri momorip dedesar.
Kit tonri momorip dedesar
5:13-21
13 Wangur,
yakw kurengi surat ye ber a kmi ma milele Ratu Anaky,
nema mifai feti kmi myonri momorip dedesar lo.
14 Ma noak ma tloik dalminrar ber Ratu to tamtaut.
Fali kit talele feti farlan kit tak safe-safe motak tlarat Ratu Ni mpempeang,
I nbali ninr tatakar a ne.
15 Ma farlan kit tafai feti I nlangun ninr tatakar mpe bise ma tafai nbal feti tonri safe-safe motak ma tak tof I a ne.
16 Noak ma msyalan wamir sa ma nalele Yesus ma nose sale,
ka msyampayang ber i nema Ratu nlure i ma nal momorip dedesar ber i,
boloka ni sale ne to nwayat ma nmat dedesar.
Ka myose farane ber tomwatar ma rose sale nempa nir salar a ne to nwayat ma rmat dedesar.
Botuan feti tomwatar ketnir rose sale ma nir salar ne rwayat ma rmat dedesar.
Yakw to kfwalak ber a kmi ma msyampayang ber tomwatar ma farane.c
17 Kabain yatkar monuk ma tomwatar rose ne iane sale,
nempa to salar monuk ma rwayat ma rmat dedesar.
18 Kit tafai feti tomwatar monuk ma reluk Ratu angkir a ne sir to rose sale dedesar,
fali Ratu Anaky najake sir,
mpa smwangat yatkar nir ulun to bise ma nose sasaf sir.
19 Kit tafai feti kit ye Ratu Angkir,
ma tafai nbal feti smwangat yatkar nir ulun nfarete tomwatar na saryamprene ma to ralele Ratu.
20 Nempa kit tafai feti Ratu Anaky nma saryamprene lo ma naftutu kit nema tafai Ratu ma botuan.
Ma kit tmorip dalam lese tor Ratu ma botuan fali kit dalminrar lese tor Anaky Yesus ninr Ray Silai.
I ye Ratu ma botuan ma nal momorip dedesar ber kit.
21 Mpa angkur ma kwamis a kmi,
ka mijake kmi ma kete myose safe-safe motak ma neluk ratw walyetar la mlikur Ratu ma botuan.