Inyarubha ya okwamba ya Pawuro
ku‑Timoteewo
Obhutangati
Inyarubha inu, ꞉yaakaamirwe na Pawuro, itumwa ya Yeesu Kirisito. ꞉Aakaamiiye omuunu unu aariga ˆnaatogwa Timoteewo, okusooka mu‑musi gwa Risitura. Nyiramwene aariga ari Muyawudigasi, na esemwene aariga ari Muyunaani (Ebhikorwa bhya Jitumwa 16:1). Timoteewo ꞉aachungukire okutura ku‑mirimu ja Pawuro, niyo isonga Pawuro kaamubhirikira ati, “omwana waani wa echimari mu‑riikirisya” (1:2). Timoteewo ꞉aaribhatire na Pawuro ku‑mirimu myafu ja okuraasya Emisango ja Ekisi inguru ya Yeesu Kirisito (Ebhikorwa bhya Jitumwa 17:14-15, 18:5). Omwanya gunu Pawuro aariga achaari okukaama inyarubha inu, ꞉aayaaye Timoteewo emirimu ja okwimereegururu abheekirisya mu‑musi gwa Yefeeso (1:3).
Obhukarariiye bhwa Pawuro okukaama inyarubha inu, bhwariga bhuri kubhwira Timoteewo kutyo jiiyire okusora na okwiyigisya abhakaruka na abhasakisi bha rikanisa. Pawuro endega ati Timoteewo na abhakaruka abho bhabhe bharengeresi, bheeyigisye echimari na jitungwa ja ekisi ku‑bheekirisya. Ka wone, aariga akarariiye okubhwira Timoteewo ati abhe echijekekanyo cha ekisi ku‑bhaanu bhoone (4:12). Obhukarariiye bhwaye obhundi, bhwariga bhuri kusomboorera Timoteewo kutyo kaatura okusakira abheekirisya mu‑makomeeye ganu gaariga gari‑wo. Ka wone, Timoteewo abhe na amanaga okurema ameeyigisyo goone ga orubheeyi (1:3-7, 4:1-5, 6:3-5).