Injogere mu‑musi gwa Tesaroonike
17
1 Pawuro na Siira nibhatura mu‑musi gwa Amufipoori na ogwa Aporooniya, nibhakinga mu‑musi gwa Tesaroonike. Awo yaariga iri‑wo inju ya eriikofyanyo rya Abhayawudi. 2 Pawuro ˆneengira mu‑nju eyo, okuruubhana na itungwa yaaye kutyo yaariga iri. Jisabhaato esatu joone jinu ꞉jaaruubheene, eeresyaga abhaanu emisango jinu jiri mu‑Bhikaame Ebhyeru, 3 ˆnaabheeresyaga abhwerubhweru ati, Kirisito aariga akenerwe anyaasibhwe na okwitwa na ati ni bhusibhusi asuuruke okusooka mu‑bhafuuwe. Pawuro ˆnaagenderera okubhabhwira ati, “Kirisito unu enibhabhwira omusango gwaye, niwe Yeesu.” 4 Jinu Pawuro ꞉aayikire, Abhayawudi abharebhe nibhajiikirisya, aamwi na Abhayunaani abhaafu bhanu bhaaramyaga Nyamuwanga. Nibheekirisya noorwo abhagasi abhaafu bha echibharo. Abho bhoone nibharuubhana na Pawuro na Siira.5 Nawe ejo nijikora Abhayawudi bharebhe okubhona orwiso. Nibhagenda mw‑iguriro, nibhabhona abhaanu abharangirangi. Abhaanu abho, nibheekumanya awo, nibhaamba okukora injogere nyafu mu‑musi ogwo. Nibhagenda mu‑nju ya Yasooni, nibharondaga Pawuro na Siira, korereki bhabhareete ku‑chise echo. 6 Bhejire bhaabhurwa, nibhagega Yasooni omwene aamwi na abheekirisya abharebhe. Nibhabhasira imbere ya abhakuru bha omusi, nibhamwayiraga inguru ati, “Abhaanu bhanu nibho bhaariga nibhakora injogere nyafu mu‑bhyaro bhyafu, nibho bhakingire mu‑musi gweswe anu. 7 Yasooni unu abhakumire iika ewaaye. Aamwi na ejo, bhoone abhagaya ebhiraagiro bhinu bhiteeywe‑wo na Kayisaari, abhaayika ati, ari‑wo omukama owundi risiina ryaye kaatogwa Yeesu.” 8 Abhakuru bha omusi ogwo, aamwi na echise echo bhunu ꞉bhoonguuwe emisango ejo, nibhatitibhara muno. 9 Yasooni na abheejaabho abho nibhasinyirisibhwa okusoosya yifwayini, nibhayisoosya, na abhakuru abho nibhabheekirisisya ati bhasubhe iika.
Obhutinge bhwa abhaanu bha Bherooya
10 Omwanya gwa mu‑ngeta irya, abheekirisya nibhasira bhwangwe Pawuro na Siira mu‑musi gwa Bherooya. Bhejire bhaakinga eyo, nibheengira mu‑nju ya eriikofyanyo rya Abhayawudi. 11 Abhaanu bha Bherooya awo, bhaariga bhari na obhutinge bhwa kisi okukira abha Tesaroonike. Nibhakora Pawuro, abharaasisye omusango gwa Nyamuwanga, nibhaguramira kwa amanaga goone. Bhaaringiraga mu‑Bhikaame Ebhyeru bhuri rusuku, korereki bhamenye ati ejo aayikaga Pawuro ni ja echimari. 12 Abhayawudi bhaafu agati yeebhwe nibheekirisya Yeesu, aamwi na Abhayunaani, abhagasi bha ebhibharo na abharume wone.
13 Abhayawudi bha Tesaroonike abho, bhejire bhaamenya ati Pawuro keeyigisya omusango gwa Nyamuwanga mu‑musi gwa Bherooya, nibhagenda‑yo ku‑songa ya okukungirisya echise chinu chaariga chiri awo, okukingira injogere niibha‑wo. 14 Awo abheekirisya abheejaabho nibhagega Pawuro, nibhamusira ku‑njekekera ya inyanja. Nawe Siira na Timoteewo abheene nibhasigara Bherooya awo. 15 Abheekirisya bhanu ꞉bhaayeregesiisye Pawuro, ꞉bhaamukingiisye mu‑musi gwa Ateene. Bhunu bhaasubhaga, Pawuro ˆnaabharagirira ati bhabhwire Timoteewo na Siira ati bhamujee‑ko bhwangu.
Pawuro kaayika na abhaanu bha Ateene
16 Omwanya gunu Pawuro aarindiriraga Siira na Timoteewo mu‑musi gwa Ateene awo, ˆnaarora ati, omusi ogwo gwone gwijuuye amasusano ga amasambwa. Ejire aarora kutyo, omwoyo gwaye nigusurumbara muno. 17 Kurwa ejo eengiraga mu‑nju ya eriikofyanyo rya Abhayawudi, ˆnaayikanaga na Abhayawudi aamwi na abhandi bhanu bhaaramyaga Nyamuwanga, inguru ya Emisango ja Ekisi ja Yeesu. Wone aaraasyaga ku‑bhaanu bhoone bhanu aariga ˆnaasongʼana mw‑iguriro bhuri rusuku. 18 Niwo abhaanu abharebhe bha obhwengeeso bhanu bhaatogwaga ati Abhayepukiriyo,a aamwi na Abhasitoyiko,b nibhaamba okubhambasyanya na Pawuro na okurema emisango jaaye. Abhandi mu‑bheene nibhabhuusya ati, “Ni misango ki jinu omuromiromi unu kaayika?” Abhandi nibhaayika ati, “Eyibhonekana ati kaayikira inguru ya amasambwa ga echaaro echindi.” ꞉Bhaayikire kutyo kwa okubha Pawuro aabharaasisyaga inguru ya Yeesu na inguru ya okusuuruka mu‑bhafuuwe.
19 Kurwa ejo nibhagega Pawuro nibhamusira imbere ya riromero rikuru rinu ryatogwaga ati, Arewopaago. Riromero eryo nirimubhwira ati, “Eswe wone echikena okuungwa ameeyigisyo amayaaya ganu owiyigisya abhaanu. 20 Awe owaayika emisango jinu ejichiruguusya, echikena okumenya obhugajuro bhwajo.” 21 Omwanya ogwo abhaanu bha Ateene, aamwi na abhagenyi bha kura bhanu bhaariga bheekaaye eyo, bhaariga bhatakukora omusango ogundi, tari bhaategeresyaga emisango emiyaaya na okwayika inguru yaajo.
22 Mbe Pawuro ˆneemereeguru mw‑iromero rikuru eryo, ˆnaayika ati, “Emwe abheekasi bha Ateene! Enirora ati omuruubha muno emisango ja idiini yeemwe. 23 Okubha bhunu naagosoraga mu‑musi gunu, ꞉naarorere bhinu omuramya. ꞉Naarorere ku‑chigabhiro mukaamire‑ko ati, KW‑ISAMBWA RINU RITAKUMENYEKANA. Nyamuwanga unu omuramya okumumenya wuri, niwe unu niijire okubhamenyesya.
24 “Nyamuwanga ni Raatabhugenyi wa orwire na owa echaaro, niwe ꞉aabhumbire echaaro na bhyone bhinu bhiri‑mo. Omwene atakwikara mu‑mayekaru ganu goombakirwe na amabhoko ga abhaanu. 25 Niwe kaayaana abhaanu bhoone obhurame, obhuwanga na ebhiinu ebhindi bhyone. Atakukorerwa na amabhoko ga abhaanu, wuti keenda choonechoone. 26 ꞉Aabhumbire abhaanu bha amaanga goone okusooka ku‑muunu umwi, korereki bheekare mu‑chaaro choone. ꞉Aabhatereeye‑wo na omwanya gwa okwikara okusookerera kara, nyabhuriko ꞉aabhatereeye‑wo na jimbibhi anu abhaja okwikara. 27 Nyamuwanga ꞉aakorere ejo joone, korereki abhaanu bhamuyenje, noorwo yaakabheeye ku‑njira ya okuyenjeresyayenjeresya, okukingira bhamubhone. Noorwo kutyo Nyamuwanga atari kura na bhuri umwi weeswe. 28 Okubha kwa okugwatana nage, chiikaaye na chiri bhaanga. Rwa kutyo abheembi bha amasyayiri ꞉bhaayikire ati, ‘Eswe, chiri abhaana bhaaye.’
29 “Eswe chiri abhaana bha Nyamuwanga. Kurwa ejo chiteeyire okwiganirisya ati Nyamuwanga kaasusana na risusano rinu rikonjerwe na inaaryo, amwi jiyera, amwi ribhuyi. Ebhyo bhyone ebhikorekana era ku‑bhuturo bhwa abhaanu. 30 Kara awo, abhaanu bhaariga nibhakora ejo mu‑bhumuumu, Nyamuwanga aariga atakuringira obhumuumu obhwo. Nawe woori, kaabhwira abhaanu bhoone bha bhuri rubhaara ati bhasige ebhibhiibhi bhyebhwe. 31 Kurwa ejo ꞉aateeye‑wo orusuku runu ariramura abhaanu bhoone kwa echimari, ku‑njira ya omusorwa waaye. ꞉Eeresiisye abhaanu bhoone echimari cha ejo kwa okumusuurura omuunu oyo okusooka mu‑bhafuuwe.”
32 Abhakuru abho, bhejire bhoongwa ati Pawuro kaayika inguru ya okusuuruka kwa abhafuuwe, abhaanu bheebhwe abharebhe nibhamuseka na okumugaya. Nawe abhandi nibhamubhwira ati, “Echija okukutegeresya rindi inguru ya emisango ejo.” 33 Awo Pawuro ˆnaasooka mw‑iromero eryo. 34 Abhaanu bharebhe nibheekirisya Yeesu, nibhabha orubhaara rwa Pawuro. Agati yeebhwe aariga ari‑wo Diyoniisiyo, owumwi wa riromero rikuru rya Arewopaago, na omugasi umwi, risiina ryaye ni Damaari, aamwi na abhaanu abhandi.